…………………………………..

………………………………….

ஓய்வுபெற்று பத்தாண்டுகளாகின்றன. ஆனாலும் அதே பரபரப்போடு இயங்குகிறார் நீதிபதி சந்துரு.
சிறார் கூர்நோக்கு இல்லங்களைச் சீரமைப்பதற்கான குழு,
ஆன்லைன் சூதாட்ட பாதிப்புகள் குறித்து ஆய்வு செய்வதற்கான குழு, மாணவர்களிடையே சாதி, இனப் பிரிவினைகள் இல்லாத சூழ்நிலையை உருவாக்க அரசுக்கு ஆலோசனை வழங்குவதற்கான குழு
என பொறுப்புகள் குவிந்திருக்கின்றன.

இன்னொரு பக்கம் சட்டக்கல்லூரி மாணவர்களுக்காக
அவர் உருவாக்கியுள்ள சத்யதேவ் அகாடமி பணி.

(நன்றியுடன் – விகடன் இதழின் நேர்காணலிலிருந்து சில பகுதிகள் –

‘‘உங்கள் சத்யதேவ் அகாடமியில் சூர்யா எப்படி இணைந்தார்?
நிறுவனத்தின் செயல்பாடுகள் பற்றிச் சொல்லுங்கள்?’’

‘‘சூர்யாவின் ‘ஜெய்பீம்’ திரைப்படக் கதை மூலம், ஆவணத் திரட்டலுக்காகவும், படத்தில் என் பெயரைப் பயன்படுத்தியதற்காகவும்
எனக்கு ஏதேனும் தொகை தர திரைப்பட நிறுவனம் விரும்பியது.
நான் மறுத்தேன். ஆனாலும் நான் முறைப்படி அனுமதி தந்ததற்கான
ஆவணம் அவர்களுக்குத் தேவைப்பட்டது. அதற்காக 100 ரூபாய் மட்டும் காசோலை பெற்றுக்கொண்டு கையெழுத்து போட்டுக் கொடுத்தேன்.

அந்த நேரத்தில்தான் ‘சட்டம் படிக்கும் மாணவர்களுக்கு ஏதாவது
செய்ய வேண்டும்’ என்று சூர்யா சொன்னார். அதன் அடிப்படையில் தோன்றியதுதான் சத்யதேவ் லா அகாடமி. முதற்கட்டமாக,
சட்டக் கல்லூரி மாணவர்களுக்கான பாடங்களை யூடியூப் மூலம்
வெளியிட முடிவு செய்தோம். அதற்கான செலவையும் கட்டமைப்பையும் ஏற்படுத்த சூர்யா முன்வந்தார்.

ஆனால் சட்டப் பாட வகுப்புகளை அரசு அமைப்புகள் மூலமே செய்து கொள்ளலாம் என்று முதல்வர் ஸ்டாலின் சொல்லிவிட்டார். மேலும், பாடத்திட்டங்களைச் சில தனியார் நிறுவனங்களில் இலவசமாகத் தயாரிப்பதற்கு அனுமதி கிடைத்துவிட்டது. அதனால் பெரிய செலவுகள்
இல்லை என்று ஆகிவிட்டது. சூர்யாவின் ஆர்வமும் மாணவர்களுக்கு
உதவி செய்யும் அவரது நோக்கமும் பாராட்டத்தக்கது. சத்யதேவ் லா
அகாடமி மூலம் இளம் வழக்கறிஞர்களுக்குத் தொழிற்பயிற்சி அளிக்கத்
திட்டம் உள்ளது. எதிர்காலத்தில் இது இன்னும் விரிவாகும்.’’

‘‘அரசு நியமிக்கும் ஆணையப் பொறுப்புகளுக்கு சம்பளம்
பெறமாட்டேன் என்று கூறியிருக்கிறீர்கள். சம்பளம் வாங்குவது நடைமுறைதானே?’’

‘‘நான் ஆறே முக்கால் ஆண்டுகள் உயர் நீதிமன்ற நீதிபதியாகப்
பணியாற்றி ஓய்வு பெற்றேன். குறைந்தபட்ச ஓய்வூதியம் பெற ஒருவர்
ஏழு ஆண்டுகளாவது நீதிபதியாக இருந்திருக்க வேண்டும். அதனால்
எனக்குக் கிடைக்காது என்ற நிலை இருந்தது. இந்நிலையில் உச்ச
நீதிமன்றம் ஒரு வழக்கில், எங்களது வக்கீல் பணிக்காலத்தின் பத்தாண்டுகளையும் சேர்த்துக்கொள்ள வேண்டும் என்று கூறி
முழு ஓய்வூதியம் வழங்க உத்தரவிட்டது. அதனால் என்னைப்
போன்றோருக்கு முழு ஓய்வூதியத்தோடு மருத்துவ உதவி போன்ற சில சலுகைகளும் வழங்கப்படுகின்றன. நான் ஏழாண்டுகளுக்குக் குறைவாக வேலை செய்திருந்தாலும், தற்பொழுது 11 வருடங்களாக ஓய்வூதியம் பெற்றுவருகிறேன்.

இப்படி அரசிடமிருந்து உதவிகள் கிடைக்கிற சூழலில் மேலும் மதிப்பூதியம் பெற எனது மனம் இடம் கொடுக்கவில்லை. என்னைப் போன்று ஓய்வூதியம் பெறுபவர்கள் சமுதாயப் பணியும் ஆற்ற வேண்டும் என்று நான் நினைக்கிறேன்.

அதுமட்டுமன்றி, ஓய்வுபெற்ற நீதிபதிகள் அரசிடமிருந்து சலுகைகள் பெற வரிசையில் நிற்கிறார்கள் என்ற குற்றச்சாட்டு பரவலாக இருக்கிறது.
கௌரவ ஊழியம் புரிவதன் மூலம் அத்தகைய குற்றச்சாட்டுகளைத்
தவிர்க்க முடியும் என்பது என் கருத்து.’’

‘‘நீதிபதிகளை நியமிக்கும் கொலிஜியத்தில் அரசின் பிரதிநிதிகளையும் சேர்த்துக்கொள்ளவேண்டும் என்கிறதே மத்திய அரசு?’’

‘‘நீதிபதிகளை நீதிபதிகளே நியமனம் செய்யும் நடைமுறை உலகில் வேறெங்கும் இல்லை. உச்ச நீதிமன்றத் தீர்ப்புகளின் மூலம்
உருவாக்கப்பட்டதே நமது கொலிஜிய நியமன நடைமுறை. நீதித்துறையின் சுதந்திரத்தை அரசின் பிடியிலிருந்து காக்கவே இந்த நடைமுறையைக் கொண்டுவந்ததாக உச்ச நீதிமன்றம் சொன்னது.

ஆனால், கடந்த 30 ஆண்டுகளாகப் பல அரசியல் பின்னணி உள்ள
வழக்குகளில் நீதிமன்றங்கள் கொடுத்துள்ள தீர்ப்புகளைப் பார்க்கும்போது அந்தக் கூற்றை நம்ப முடியவில்லை. எனவேதான் 2014-ல் தேசிய
நீதிபதிகள் நியமன ஆணையத்தை ஏற்படுத்தியதை நான் வரவேற்றேன்.

ஆனால், 2016-ல் உச்ச நீதிமன்றத்தின் ஐந்து நீதிபதிகள் அமர்வு அந்தச்
சட்டத் திருத்தத்தை ரத்து செய்துவிட்டது. மீண்டும் முறையான அமைப்பு ஒன்றை ஏற்படுத்த ஒன்றிய அரசு முன்வரவில்லை. ஏனெனில், கொலிஜிய நியமன நடைமுறையில் அவர்கள் விரும்புபவர்களையும் நீதிபதிகளாக நியமிக்கக்கூடிய வாய்ப்பு அதிகமாக இருக்கிறது.

விக்டோரிய கௌரி என்ற வக்கீல் பா.ஜ.க மகளிர் அணியில் பதவியில் இருந்தவர். சிறுபான்மையினருக்கு எதிராகக் கருத்துகளைத் தொடர்ந்து வெளியிட்டவர். அவரை நீதிபதியாக நியமிக்கக்கூடாது என்று போட்ட
வழக்கை உச்ச நீதிமன்றம் ரத்து செய்துவிட்டது. இதுபற்றி சமீபத்தில்
கருத்து தெரிவித்த தலைமை நீதிபதி சந்திரசூட், ‘அரசியலில் மாற்றுக்
கருத்து இருக்கிறது என்பதற்காக நீதிபதி நியமனத்தை மறுக்க முடியாது’
என்று தெரிவித்தார்.

ஆனால், கடந்த இரண்டு ஆண்டுகளாக கொலிஜியம் பரிந்துரைக்கும்
ஜான் சத்யன் பெயருக்கு உளவுத்துறை அறிக்கையின் அடிப்படையில்
ஒன்றிய அரசு எதிர்ப்பு தெரிவித்தது. அவர் பேஸ்புக்கில் பிரதமரை
விமர்சித்த ஒரு பதிவை ஷேர் செய்ததாகக் கூறப்பட்டது.

அவரது பெயரை ஒன்றிய அரசு மறுத்தாலும் உச்ச நீதிமன்ற கொலிஜியம் மறுபடியும் அவரது பெயரைப் பரிந்துரைத்தது. இருப்பினும் இன்றுவரை அவருக்கு நீதிபதி பதவி கிடைக்கவில்லை. இதிலிருந்து நாம் புரிந்து
கொள்வது என்னவென்றால், அரசியல் கருத்து அரசுக்கு ஆதரவாக
இருந்தால் பதவி கிடைப்பது நிச்சயம். மாற்றுக்கருத்து இருந்தால்
ஜான் சத்யன் போல் காத்திருப்புப் பட்டியலில்தான் இருக்க வேண்டும்.

கொலிஜியத்தில் அரசுப் பிரதிநிதிகள் என்ற ஆலோசனை, போகாத
ஊருக்கு வழி தேடுவதுதான். தேசிய நீதிபதிகள் நியமன ஆணையம்
பற்றி உச்ச நீதிமன்றம் கூறிய புகாரை மதிப்பீடு செய்து, தேர்வுக்
குழுவின் அடிப்படையை மாற்றி புதிய நியமன ஆணைய சட்டத்தை நாடாளுமன்றம் கொண்டுவருவதுதான் ஒரே வழி.’’

‘‘நீதிபதிகள் ஓய்வுக்குப் பிறகு அரசியலுக்கு வருவதை எப்படிப் பார்க்கிறீர்கள்?’’

‘‘நீதிபதியும் இந்நாட்டின் ஒரு குடிமகன்தானே. அரசியல் பேசுவதற்கும் அரசியலில் செயல்படுவதற்கும் அவருக்கு முழு உரிமை உண்டு. அவர்கள் தங்களின் சட்டம், நீதித்துறை அனுபவங்களை மக்கள் உரிமைக்காகப் பயன்படுத்த முன்வர வேண்டும். உதாரணமாக, வி.ஆர்.கிருஷ்ணய்யர்.
ஓய்வு பெற்ற பிறகும் 35 ஆண்டுக்காலம் தனது இறுதிமூச்சு வரை மக்களுக்காகப் பாடுபட்டார்.’’

‘‘உச்ச நீதிமன்றத் தலைமை நீதிபதியாக இருந்து ஓய்வுபெற்ற ரஞ்சன் கோகாய் எம்.பி ஆன பிறகு நீதிபதிகளின் ஓய்வுக்காலம் அதிகம் விமர்சிக்கப்படுகிறதே?’’

‘‘நீதிபதிகள் ஓய்வுபெற்ற அடுத்த நாளே ஒரு அரசுப் பதவிக்கு வருவது தவறான முன்னுதாரணம்.

தலைமை நீதிபதி கோகாய் பதவிக்காலம் முடிந்தவுடன் குடியரசுத்
தலைவரால் மாநிலங்களவை உறுப்பினராக நியமிக்கப்பட்டார்.
தேர்தலில் போட்டியிட்டு வெற்றிபெறாத இந்நபர்கள் பின்வாசல்
வழியாக ஒன்றிய அரசின் ஆசியுடன் பதவி நியமனம் பெறுவது,
அவர்கள் வகித்த பதவியையே அசிங்கப்படுத்துவதாகும்.

தலைமை நீதிபதியாக இருந்த சதாசிவம் கேரள ஆளுநராக
நியமிக்கப்பட்டதும், தற்போது, உச்ச நீதிமன்ற நீதிபதியாக இருந்த
அப்துல் நசீர் ஆந்திராவின் ஆளுநராகப் பதவி ஏற்றுக்கொண்டதும்
ஏற்க முடியாத பிழைகள். இதுமாதிரி செயல்களை, சட்ட அமைச்சராக
இருந்து மறைந்த பா.ஜ.க-வின் அருண் ஜெட்லியே நாடாளுமன்றத்தில் கடுமையாக விமர்சனம் செய்திருக்கிறார்.’’

‘‘நாங்குனேரி விவகாரத்துக்குப் பிறகான ஒரு நபர் கமிஷனின்
தற்போதைய நிலை எனன?’’

‘‘நாங்குனேரியில் சாதி அடிப்படையில் ஒருசில மாணவர்கள்
வீடு புகுந்து தலித் மாணவரையும் அவரின் சகோதரியையும் தாக்கியதையொட்டி, ‘கல்வி நிறுவனங்களில் சாதி வன்முறையை
ஒழிப்பது எப்படி’ என்று ஆராய்ந்து அறிக்கை தரும்படி தமிழக அரசு
என் தலைமையில் ஒரு நபர் குழுவை அமைத்துள்ளது. இதற்கு
ஆறு மாத கால வரையறையும் தரப்பட்டது. அதற்காகக் கல்வி
நிறுவனங்கள், ஆசிரியர்கள், மாணவர் அமைப்புகள், கல்வியாளர்கள்
என இதுவரை 400 பேரின் கருத்துகளைப் பெற்றுள்ளேன். வரும்
பிப்ரவரியில் அறிக்கை அரசிடம் ஒப்படைக்கப்படும். இப்பொழுது
அதுபற்றி விரிவாக விவாதிக்க முடியாது.’’

‘‘சிறார் கூர்நோக்கு இல்லங்கள் குறித்து நீங்கள் அளித்த
அறிக்கை பற்றி?’’

‘‘விரிவாகப் பேச முடியாது. சில விஷயங்களைப் பகிர்ந்து கொள்ளலாம். ‘சட்டத்திற்கு முரண்பட்ட இளம் சிறார்கள்’ என்று அவர்களைக்
குறிப்பிடலாம். குற்றச்சாட்டு நிரூபிக்கப்பட்டாலும் அவர்களுக்குச் சிறைத்தண்டனை இல்லை. சிறப்பு இல்லங்களில் தங்க வைக்கப்பட்டு சீர்திருத்தி, மைய நீரோட்டத்தில் அவர்களை மீண்டும் சேர்க்க வேண்டும் என்பதுதான் 2015-ம் வருட இளம் சிறார் சட்டம்.

ஆனால், சமீபத்தில் சென்னைப் பல்கலைக்கழக குற்றவியல் துறை
நடத்திய ஆய்வில், புழல் சிறையில் இருக்கும் 173 சிறைவாசிகளில்
77 பேர் கூர்நோக்கு இல்லங்களிலும், 31 பேர் சிறப்பு இல்லங்களிலும் ஏற்கெனவே இருந்தவர்கள் என்று தெரியவந்திருக்கிறது.
இது மிகவும் அதிர்ச்சியளிக்கும் செய்தி. அதனால் சிறார் இல்லங்களில்
18 வயதுக்கு உட்பட்டவர்களை வைத்துத் திருத்த முற்படுவது,
முடியாத காரியம் போல் தோன்றுகிறது. இதுபற்றி விரிவான
அறிக்கையை முதல்வரிடம் ஒப்படைத்திருக்கிறேன். அரசு உரிய நடவடிக்கைகளை எடுக்கும் என்று அவர் தெரிவித்திருக்கிறார்.’’

‘‘தமிழகச் சட்டப்பேரவையின் முடிவுகளை கவர்னர் தொடர்ந்து நிராகரிக்கிறார். இதுபற்றி உங்கள் கருத்து?’’

‘‘அண்ணா கூறியதுபோல், ‘ஆட்டுக்கு தாடி எதற்கு, நாட்டுக்கு
கவர்னர் எதற்கு’ என்ற கேள்வியை மக்கள் எழுப்ப வேண்டிய நேரம் வந்துவிட்டதைத்தான் காட்டுகிறது. தமிழக அரசு தொடுத்துள்ள
வழக்கில் கவர்னருக்குப் போதுமான கண்டனங்கள் கிடைத்தது.
ஆனால், ஆளுநர் பதவியே தேவையில்லை என்ற நிலையை
உருவாக்குவதே லட்சியமாக இருக்க முடியும்.’’

‘‘முன்பு ஈழப் போராளி கௌதமிக்கு மருத்துவ உதவிகள் கிடைக்கவும் விடுதலை கிடைக்கவும் சட்டப்போராட்டம் நடத்தினீர்கள். ராஜீவ்
கொலை வழக்கில் கைதாகி விடுதலை செய்யப்பட்ட 4 பேர் இன்னமும் தடுப்புக்காவலில் வைக்கப்பட்டுள்ளார்கள். இதுபற்றி என்ன நினைக்கிறீர்கள்?’’

‘‘சிகிச்சையைவிட நோயே மேல் என்ற நிலைமையை ரா உளவு
நிறுவனமும் மாநில அரசின் உளவு நிறுவனங்களும் உருவாக்கி
வருகின்றன. தண்டனைக் கைதிகளாக இருந்த 4 பேரும்
சிறையிலிருந்தபோது தனிமைச் சிறை என்பதைத் தவிர
சிறை விதிகளிலுள்ள அனைத்து உரிமைகளும் வழங்கப்பட்டன.
ஆனால், உச்ச நீதிமன்றத்தின் தலையீட்டால் ‘விடுதலை’ பெற்ற அந்த நால்வரும் தற்பொழுது புதிய ஒரு தண்டனையை அனுபவித்து
வருகிறார்கள்.

அவர்கள் அகதிகளும் அல்லர், குற்றவாளிகளும் அல்லர். ஆனால்,
24 மணி நேரக் கண்காணிப்புக் கொட்டடியில் அடைக்கப்பட்டு,
எந்தவித உரிமைகளும் வழங்கப்படாத நிலையில் உள்ளார்கள்.
அவர்களது தாய்நாட்டிற்குத் திரும்பிச் செல்வதற்கு அனுமதி
வழங்குவதற்கும் ஒன்றிய அரசு காலம் தாழ்த்திவருகிறது.
‘நாம் சிறையிலேயே இருந்திருக்கலாம்’ என்ற சிந்தனையை
அவர்களுக்கு உருவாக்கியிருப்பது, இந்த நாட்டின் நீதி அமைப்பையே கேலிக்குள்ளாக்குவது போல் உள்ளது.’’

‘‘உங்கள் வாழ்க்கையில் ‘ஜெய் பீம்’ படம் ஏற்படுத்திய மாற்றங்கள் என்னென்ன? அப்படத்திற்கு எதிராக நிறைய வழக்குகள் போடப்பட்டன. அவற்றின் நிலை என்ன? ‘ஜெய் பீம்’ இரண்டாம் பாகம் எப்போது?’’

‘‘ ‘ஜெய்பீம்’ வெளியான பிறகு அதையொட்டி எழுந்துள்ள
புதிய அலை எனக்குப் பல படிப்பினைகளைக் கொடுத்துள்ளது.
விளிம்புநிலை மனிதர்களின் உண்மை நிலையை விவரிக்கும் ஒரு படம்
மக்கள் மத்தியில் இவ்வளவு பெரிய வரவேற்பைப் பெறும் என்று யாரும் ஆரம்பத்தில் நம்பவில்லை. ஆனால், மொழி எல்லைகளைக் கடந்து
உலக ரீதியாக அந்தத் திரைப்படம் பெரும் வரவேற்பைப் பெற்றது.
இயக்குநர் த.செ.ஞானவேலுக்கும் சூர்யாவின் திரைப்பட நிறுவனத்துக்குமே அதன் பெருமை சேரும். ‘ஜெய் பீம்’ வெளியான பிறகு காஷ்மீர் முதல் கன்னியாகுமரி வரை பல கல்வி நிறுவனங்களில் மாணவர்களுடன் பேச எனக்கு வாய்ப்பு கிட்டியது.

அவ்வழக்கில் முக்கியமான சாட்சியாக இருந்த கம்மாபுரம் பார்வதிக்கு நிவாரணம் கிடைத்ததுடன், இருளர் பாதுகாப்புச் சங்கத்துக்கும் திரைப்பட நிறுவனம் ரூபாய் ஒரு கோடி நன்கொடை வழங்கியது அரிய செயல்.

படத்தைப் பார்த்த தமிழக முதல்வர் ஸ்டாலின், தமிழ்நாட்டிலுள்ள பூர்வகுடிகளுக்கு அரசுத் திட்டங்கள் சென்றடைந்திருக்கிறதா என்பதை
மாவட்ட ஆட்சியர்கள் வாராந்தர அறிக்கையாக அளிக்க வேண்டும்
என்று உத்தரவிட்டார். சாதிச் சான்றிதழ், நிலப் பட்டா வழங்கும் பணிகளும் விரைவுபடுத்தப்பட்டன.

சிலர் படத்துக்கு எதிராக சாதி சார்ந்த தாக்குதலைத் தொடுத்தார்கள்.
படம் ஓ.டி.டி-யில் வெளியானதனால் படப்பெட்டியைக் கடத்த முடியவில்லை. எனவே நீதிமன்றங்களில் பொய்வழக்குகள் போட்டார்கள். வழக்கை
உயர் நீதிமன்றம் ரத்துசெய்தது. ராஜாக்கண்ணுவின் உறவினர் என்று
ஒருவர் காப்புரிமை கோரிய வழக்கும் தள்ளுபடி செய்யப்பட்டது.
குறிப்பிட்ட சமுதாயத்தின் தலைவர் பெயரைக் கூறுவதாகக் கூறி
சிதம்பரம் நீதிமன்றத்தில் போடப்பட்ட வழக்கும் ஆதாரமில்லை என்று சமீபத்தில் தள்ளுபடி செய்யப்பட்டது. ஆதாரபூர்வமற்ற அவதூறை
அள்ளி வீசியவர்கள் இனியாவது பகிரங்க மன்னிப்பு கோரி தங்கள்
மீதுள்ள கறைகளைத் துடைத்துக்கொள்ள முன்வர வேண்டும்.
ஜெய்பீம் இரண்டாம் பாகத்தை 2025-ல் கொண்டுவரப்போவதாக சூர்யா
கோவா திரைப்பட விழாவில் கூறியிருக்கிறார். வரும் என்று நம்புவோம்’’

.
…………………………………………………………………………………………………………..……………