உண்மையில் வெற்றி யாருக்கு ?

ஒரு வழியாக  வாக்குப்பதிவு முடிந்து விட்டது.

தமிழ்நாட்டில் குறைந்த பட்சம் 73% ஆகவும் அதிக பட்சம் 86 %
ஆகவும்  சராசரியாக 75 முதல் 80 % வரை வாக்குகள்
பதிவாகி இருக்கலாம் என்று தேர்தல் அதிகாரி கூறுகிறார்.

வழக்கம் போல் –
எல்லாரையும் முந்திக்கொண்டு வீரமணி கூறி விட்டார்
அடுத்த ஆட்சி கலைஞருடையது தான் என்று.
(ராஜாவுக்கு மிஞ்சிய ராஜ விசுவாசி ?)
கலைஞர், அழகிரி, ஸ்டாலின், கனிமொழி, தயாநிதி
ஆகிய திமுக தலைவர்கள் (!)  அனைவரும் ஒருமனதாக
வழிமொழிந்து விட்டனர்.

அந்த பக்கம் அம்மாவும்  கூறி விட்டார் – அடுத்த ஆட்சி
அவருடையது தான்  என்று.
த.பாண்டியனும், சரத்குமாரும் இது வரை வழிமொழிந்து
இருக்கிறார்கள்.

நம்முடைய ஆசையை கடந்த இடுகையில் வெளியிட்டு
இருந்தோம். அதைத் தொடர்ந்து  மறுமொழிகள் மூலமாக
ஒரு சுவையான  விவாதம் உருவாகியது. இரண்டு பக்கமும்
தீவிரமான காரணங்களைப் பார்த்தோம். நமது ஆசை,
எதிர்பார்ப்புகள்  எதுவாக இருந்தாலும் அதன் விதி இன்று
தமிழ்நாட்டு மக்களால் தீர்மானிக்கப்பட்டு விட்டது !

நம் தலைவிதியைத் தெரிந்து கொள்ள –
இனி ஆவலோடு ஒரு மாதம் காத்திருப்பதைத் தவிர
வேறு வழி இல்லை.  நம்மைப் பொருத்த வரை இது ஒரு ஆவல்
மட்டுமே.

ஆனால் – அரசியல்வாதிகளுக்கு இது ஒரு வேதனை –
பிரசவ வேதனை !
ஒரு மாதப் பிரசவம் !!
ஒரு பக்கம் பார்த்தால் மேற்கு வங்க தேர்தல் முடிவதற்காக
நம்மைக் காத்திருக்கச்சொல்வது அபத்தமாக
இருந்தாலும் –
இன்னொரு பக்கம் யோசித்தால் – இது போல் ஒரு தண்டனை
நம்மைப் பாடாய்ப் படுத்தும் இந்த அரசியல்வாதிகளுக்குத் தேவை
தான் என்றும் தோன்றுகிறது !

யார் என்ன சொன்னாலும் சரி – இந்த தேர்தலின் மூலம் ஒரு
புது ஹீரோ உருவாகி இருக்கிறார் –  பிரவீண்குமார் என்கிற
தமிழக தலைமை தேர்தல் அதிகாரி !
அலட்டிக்கொள்ளாமல்,  டென்ஷனே இல்லாமல், இவ்வளவு
சிக்கலான ஒரு தேர்தலை அருமையாகக் கையாண்டு
வெற்றிகரமாக  நடத்தி முடித்து விட்டார் !

இரண்டு மாதங்களுக்கு முன்னர் யார் சொல்லி இருந்தாலும்
நம்பி இருக்க மாட்டோம் – இப்படிக் கூட ஒரு தேர்தலை
நடத்த முடியும் என்று ! இனி எல்லாம் திருமங்கலம்
பார்முலா தான் என்று மொத்த தமிழ் நாடும் நினைத்திருந்த
வேளையில் –  அஞ்சா நெஞ்சருக்கெல்லாம் தண்ணி காட்டி
விட்டாரே !

யாருக்கும் பயப்படாமல்,  எந்தவித அழுத்தத்துக்கும்
உட்படாமல், பணமோ – பதவியோ  எதைப்பற்றியும்
கவலைப்படாமல் – எந்தவித பாரபட்சமும் இன்றி –
நேர்மையான முறையில்  ஒரு  தேர்தலை  நடத்தி
முடித்திருக்கும்  பிரவீண்குமாரை – எதிர்காலத்தில்
அரசு அதிகாரிகள்  அனைவரும் ஒரு முன் உதாரணமாக
எடுத்துக்கொண்டு செயல்பட்டால் – இந்த நாட்டை
அரசியல்வாதிகள்  எவ்வளவு முயன்றாலும்
கெடுக்க முடியாது !

இது தான் இந்த தேர்தலில் கிடைத்துள்ள  செய்தி !
இது  நேர்மையான, துணிச்சலான அரசு
அதிகாரிகளுக்கு கிடைத்த வெற்றி !
யார் யாரோ  பட்டம் போட்டுக்கொள்கிறார்கள் –
ஆனால் – உண்மையான அஞ்சா  நெஞ்சன் –  இவர் தான் !
தமிழக தலைமை தேர்தல் அதிகாரி பிரவீண்குமார் அவர்களுக்கு
நான் தெரிவிக்கும் பாராட்டுக்களிலும்,
வாழ்த்துக்களிலும்  நீங்கள் அனைவரும் கூட
சேர்ந்து கொள்வீர்கள் என்றே நம்புகிறேன்.

வாழ்த்துக்கள்  பிரவீண்குமார்.
(இவர் மூலம் பீகார் தமிழகத்திற்கு  வந்து கொண்டிருக்கிறது
என்று நம்புவோம் !)