சில மாதங்களுக்கு முன்பு, டெல்லியிலிருந்து – பதான்கோட் வரை ரெயிலில் சென்றேன் ( ஏசி- 2-ஆம் வகுப்பு )… டெல்லியிலிருந்து நான் இருந்த பெட்டியில் ஒரு சீக்கியரும் பயணித்தார்… என்னருகேயே அவருக்கும் இருக்கை…!!!

எனக்கு நிறைய சீக்கியர்களுடன் நல்ல பரிச்சயம் உண்டு. பொதுவாகவே சீக்கியர்கள் சிவந்த நிறத்தவராக இருப்பர். இவர் இன்னும் கொஞ்சம் கூடவே சிவப்பாக இருந்தார்….அவரையும், அவரது லக்கேஜுகளை பார்த்தால்,
வெளிநாட்டிலிருந்து விமானத்தில் வந்திருப்பார் என்று தோன்றியது.

புதிய இடங்களுக்கு பயணிப்பதும், வித்தியாசமான மனிதர்களை பார்த்து, அவர்களுடன் பேசிப்பழகுவதும் எனக்கு மிகவும் பிடித்தமான விஷயம்…. அவரிடம் பேச்சு கொடுத்தேன் – ஹிந்தியில் தான்….
மிகவும் ஜாலியான மனிதர்….அவரும் நிறைய பேசினார். நான்
தமிழ்நாட்டை சேர்ந்தவன் என்பதும், ஹிந்தியில் சகஜமாகப் பேசியதும் அவருக்கு மிகுந்த மகிழ்ச்சியை கொடுத்தது என்பது அவருடனான உரையாடலில் தெரிந்தது. மனிதர் இடையிடையே இஷ்டத்திற்கு ஆங்கிலத்திலும் பேசினார்….!!! வித்தியாசமான அரைகுறை ஆங்கிலம்…!

அவர் கனடாவில் வசிக்கும் சீக்கியர் என்பது தெரிய வந்தது….அவருக்கு 45-50 வயது இருக்கலாம். அவரது வயதான பெற்றோர்கள் தனியே பஞ்சாபில் வசிக்கின்றனர்… அவர்களை பார்ப்பதற்காகவே, சர்வ சகஜமாக, நாலைந்து மாதங்களுக்கு ஒரு முறை, கனடாவிலிருந்து – பஞ்சாப் வரை வந்து செல்கிறார்….!

பொதுவாகவே வட இந்தியர்கள் – ( நம்மைப்போல் அல்லாமல்…!)
-பெற்றோர்களிடம் மிகுந்த அன்பும், மரியாதையும் உள்ளவர்கள் ….அதை ஒவ்வொரு நிமிடமும் வெளிப்படுத்தவும் செய்வார்கள்… கடைசி வரை அவர்களை சந்தோஷமாக வைத்திருப்பது தங்கள்கடமையும், பாக்கியமும் என்று கருதுபவர்கள்.

ஏன் – அவர்களை கவனித்துக்கொள்ள இங்கே உங்கள் சகோதரர்கள் யாரும் இங்கே இல்லையா என்று கேட்டேன்….

மேற்கொண்டு அவரிடம் பேசியதில், கடந்த 15-16 வருடங்களாக அவர் கனடாவில் இருப்பதாகவும், தனது நெருங்கிய உறவினர்கள், நண்பர்கள் என்று சுமார் 25 பேர் வரை ஏற்கெனவே கனடாவிற்கு அழைத்துக் கொண்டு போய் செட்டில் செய்து விட்டதாகவும் தெரிந்தது.

ஒரே வியப்பு எனக்கு… என்ன, கனடாவில் போய் செட்டில் ஆவது
அவ்வளவு சுலபமா, குடியுரிமை சுலபமாக கிடைக்கிறதா – என்று கேட்டேன்… அவ்வளவு தான் பிடித்துக் கொண்டு விட்டார் மனிதர்…. !

உங்களை எனக்கு மிகவும் பிடிக்கிறது… நீங்களும் வாங்களேன்… நல்ல வாழ்க்கை…நல்ல standard of living…. நீங்கள் அங்கேயே செட்டிலாகி விடலாம் என்றார்…

எனக்கெல்லாம் குடியுரிமை சுலபமாக கிடைக்குமா என்றதற்கு, உங்களைப்பற்றிய டாக்குமெண்ட்ஸ் எல்லாவற்றையும் கொடுங்கள்… 3 மாதம் டைம் கொடுங்கள்…. உங்களை கனடிய குடியுரிமையோடு என் வீட்டிற்கு பக்கத்திலேயே குடியமர்த்துவது என் பொறுப்பு என்றார்…. சீரியசாகவே…!!!

அப்புறம் அவரிடம் பேசிக்கொண்டிருந்ததில் – எட்டாவது வரை மட்டுமே படித்திருக்கும் அவர் இரண்டு மூன்று வகை வியாபாரங்களில் ஈடுபட்டிருப்பதாகவும், ( முக்கியமாக ஆட்டோமொபைல் ) – இங்கிருந்து அவர் அழைத்துக் கொண்டு போன அனைவரும் (25 பேர்) குடும்பத்தோடு அவரைச் சுற்றியே தான் இருப்பதாகவும், நல்ல standard of living, கல்வி, வேலை
வாய்ப்பு, மருத்துவ வசதி அனைத்தும் கிடைக்கின்றன என்றும் தெரிய வந்தது.

எனக்கு அப்படி எல்லாம் கனடாவில் குடியேற ஆசை எதுவும் இல்லை என்று அவரை கன்வின்ஸ் செய்வதற்குள் எனக்கு போதும் போதுமென்றாகி விட்டது…!

கனடா குறித்த சில விவரங்களை நான் ஏற்கெனவே அறிவேன்…

உலகிலேயே பரப்பளவில் 2-வது பெரிய நாடாக இருந்தாலும், ஜன-அடர்த்தி மிகக்குறைந்த நாடு…

மொத்த மக்கள் தொகையே தமிழ்நாட்டில் பாதிதான்
( சுமார்மூன்றரை கோடி…? ) என்பதும், இயற்கை வளங்கள் நிறைய உள்ள நாடு என்றும் கேள்விப்பட்டிருக்கிறேன்.

சில வருடங்கள் முன்பு கனடாவிற்கு ஒரு சுற்றுப்பயணம் போகலாமா என்று கூட நினைத்தேன்…. பல இடங்களையும் பார்ப்பதோடு, கனடாவில் வசிக்கும் இலங்கைத் தமிழர்கள் சிலரையாவது நேரில் சந்தித்து அவர்களது தற்போதைய வாழ்க்கை பற்றி அறிய விரும்பினேன்.

ஆனால், கனடாவின் குளிர் பற்றி நான் கேள்விப்பட்டவை என்னை மிகவும் பயமுறுத்தியிருந்தது…. பின்னர், பல காரணங்களால் அது கைகூடவில்லை…

இப்போது இந்த இடுகையை எழுதத் தூண்டியதற்கு ஒரு காரணம் –
குளிர்காலத்தில் – நயாகரா நீர்வீழ்ச்சியும், வட-கனடாவில்
ஆறுகளும், எப்படி உறைந்து போயிருக்கின்றன என்பது குறித்த
ஒரு செய்தியையும், சில வீடியோக்களையும் பார்த்தது –
அந்த வீடியோக்களை நீங்களும் பார்க்க கீழே தந்திருக்கிறேன்.

snow storm –

…

நயாகரா-

…
MELTING RIVER –

…

மற்றொரு காரணம், கனடாவில் வசிக்கும் இலங்கைத் தமிழர்களின் தற்போதைய நிலையைப்பற்றி நான் தெரிந்து கொள்ள விரும்புகிறேன். கிட்டத்தட்ட 3 லட்சம் தமிழர்கள் அங்கே வசிப்பதாக உணர்கிறேன்.

அவர்களது வாழ்க்கை, பொருளாதார நிலை, எப்படி இருக்கிறது…?
அவர்களின் அடுத்த தலைமுறைக்கு நல்ல கல்வி கிடைக்கிறதா..?
அவர்கள் தங்கள், மொழி, பண்பாடு, பழக்க வழக்கங்களை
இன்னமும் தொடர்கிறார்களா..? தொடர முடிகிறதா…?
தமிழ்நாட்டிலிருந்து அவர்கள் எதையாவது எதிர்பார்க்கிறார்களா..?
இவ்வாறு எனக்கு பல கேள்விகள்…!!!

இந்த விமரிசனம் தளத்தை உலகம் முழுவதுமிருந்து தமிழர்கள் படிப்பதை என் dash-board -லிருந்து தெரிந்துகொள்ள முடிகிறது.

கனடா நாட்டிலிருந்து தினமும் குறைந்தது 25-30 பேராவது படிப்பதும் தெரிகிறது… ஆனால் அவர்கள் யாரென்பது குறித்த விவரங்கள் எதையும் என் தளத்திலிருந்து அறிய முடியாது… அவர்களாகவே தெரிவித்தால் தான் உண்டு.

அங்கு வாழும் தமிழர்கள் யாராவது, இந்த தளத்தில் பின்னூட்டம் மூலம் தொடர்பு கொண்டு, தங்களது தற்போதைய சமூக, வாழ்க்கை நிலை பற்றி தெரிவித்தால் மகிழ்ச்சியடைவேன்….

ஒருவேளைதமிழில் எழுதக்கூடிய நிலையில் இல்லையென்றால் –
ஆங்கிலத்தில் கூட எழுதலாம்…. ஒருவேளை பின்னூட்டத்தில்
வெளிப்படையாக எழுத தயக்கம் இருந்தால், தனிப்பட
kavirimainthan@gmail.com என்கிற என் மின்னஞ்சலுக்கு கூட எழுதி அனுப்பலாம்…..

கனடா மட்டும் அல்லாமல், நார்வே, ஸ்வீடன், ஸ்விஸ், ஜெர்மனி,
ஃப்ரான்ஸ், ஆஸ்திரேலியா என்று பல நாடுகளிலிருந்தும் இலங்கை
தமிழர்கள் இந்த தளத்தின் மூலம் தினமும் என்னை வாசிக்கிறார்கள்…. அவர்கள் யாராவது என்னுடன் மெயிலில் தொடர்பு கொண்டால் மகிழ்வேன்…..