யார் போனை யார் ஒட்டுக்கேட்டாலென்ன…..?
சுவாமிக்கென்ன நஷ்டம் ….?

இவர் போனை ஒட்டுக்கேட்காத வரைக்கும்
சந்தோஷப்பட வேண்டியது தானே….!!!!!

நரி ……. வலம் போனாலென்ன,
இடம் போனாலென்ன –

மேலே விழுந்து பிடுங்காத வரை சரி ….
என்று தானே….சுவாமி இருக்க வேண்டும்…!!!

________________________________________________________________________

பெகாசஸ் ஸ்பைவேர்-க்கு பணம் கொடுத்தது யார்….?: சு.சுவாமி கேள்வி
Updated : ஜூலை 20, 2021

( https://www.dinamalar.com/news_detail.asp?id=2806029 )

புதுடில்லி: ‘பெகாசஸ் ஸ்பைவேர்-க்கு யார் பணம் கொடுத்தார்கள்
என்பது தவிர்க்க முடியாத கேள்வி’ எனவும், ‘அது இந்திய அரசு
இல்லையெனில் வேறு யார் கொடுத்தார்கள் என்பதை மக்களுக்கு
சொல்வது மோடி அரசின் கடமை,’ என்றும் பா.ஜ., மூத்த தலைவர்
சுப்பிரமணியன் சுவாமி கூறியுள்ளார்.

இஸ்ரேலின் என்.எஸ்.ஓ. நிறுவனம் தயாரித்த பெகாசஸ் ஸ்பைவேர்
மூலம் பல்வேறு அரசியல் தலைவர்கள், பத்திரிகையாளர்களின்
போன்களை உளவு பார்த்தது மட்டுமல்லாமல் ஒட்டுக்கேட்டதாக
குற்றச்சாட்டு எழுந்துள்ளது. இந்த விவகாரம் பூதாகரமாகி வரும்
சூழலில், இது தொடர்பாக விளக்கமளிக்க வேண்டும் என பா.ஜ.,
மூத்த தலைவர் சுப்பிரமணியன் சுவாமி தெரிவித்துள்ளார்.

இது குறித்து தனது டுவிட்டர் பதிவில், ‛ஒட்டுக்கேட்பு விவகாரம்
மிகவும் பெரிய பிரச்னை.
தொலைபேசிகளை ஒட்டுக் கேட்டு தரவுகளை சேகரித்து வரும்
இஸ்ரேல் நிறுவனத்துடன் எந்தவித தொடர்பும் இல்லை என்பது
குறித்து உள்துறை அமைச்சர் அமித் ஷா பார்லி.,யில் விளக்கம்
அளிக்க வேண்டும். இல்லையென்றால், அமெரிக்காவின்
வாட்டர்கேட் ஊழல் போன்று இது பா.ஜ.,விற்கு பெரும்
சோதனையாக மாறும்,’ எனப் பதிவிட்டுள்ளார்.

மற்றொரு டுவிட்டில் சுப்பிரமணியன் சுவாமி பதிவிட்டுள்ளதாவது:
பெகாசஸ் ஸ்பைவேர், கட்டண ஒப்பந்தங்களில் பணியாற்றும்
ஒரு வணிக நிறுவனம் என்பது தெளிவாக உள்ளது. இந்திய
“நடவடிக்கைக்கு” அவர்களுக்கு யார் பணம் கொடுத்தார்கள் என்பது
தவிர்க்க முடியாத கேள்வி எழுகிறது. அது இந்திய அரசு
இல்லையென்றால் வேறு யார்? அதை மக்களுக்கு சொல்வது
மோடி அரசின் கடமை. இவ்வாறு அவர் பதிவிட்டுள்ளார்.