நம்மிடையே மீடியாக்களின் ஊடுருவல் / தாக்கம் (influence .. )
அளவு கடந்து போய் விட்டது. நாம் எதைப்பார்க்க வேண்டும்,
எதைக்கேட்க வேண்டும், எதை பயன்படுத்த வேண்டும்
என்பதில் துவங்கி இன்று எதைப்பற்றி சிந்திக்க வேண்டும்,
எப்படிச் சிந்திக்க வேண்டும் என்கிற நிலை வரையில் கொண்டு
போய் விட்டு விட்டது.

ஏழு கோடி மக்கள் வாழும் தமிழகத்தில், எங்காவது ஒரு
மூலையில் தினமும் எதாவது குற்றங்கள் – கொலை,
கொள்ளை,கற்பழிப்பு, ஜாதி மோதல்கள், விபத்துகள், அரசியல்
கட்சிகளின் போராட்டங்கள் என்று வித்தியாசமான பிரச்சினைகள்
இருக்கத்தான் செய்யும்….

ஆனால், எங்கே நெகடிவ் (எதிர்மறை) சமாச்சாரங்கள் கிடைக்கும்
என்று கழுகு போல் காத்து, பார்த்திருந்து – அதை பூதாகாரமாக்கி
திரும்ப திரும்ப தொலைகாட்சிகளில் பரவலாக, விவரமாக,
விவாதப்பொருளாக காட்டி, மக்களை எப்போதும் எதிர்மறை
சிந்தனையிலேயே வைத்து விட்டன இந்த மீடியாக்கள்.

இப்போதெல்லாம் நம்மில் பலரும் நேர்மறையாக (positive)
யோசிக்கும் பழக்கத்தையே விட்டு விட்டோம்…

நாட்டில் எவ்வளவோ நல்ல விஷயங்கள் நடக்கின்றன…
கற்றுக் கொள்ள வேண்டியவை, தெரிந்து கொள்ள வேண்டியவை
பின் தொடர வேண்டியவை – என்று நிறைய நல்ல செய்திகள்
இருக்கின்றன…. ஆனால், மீடியாக்கள் மக்களை அந்தப்பக்கம்
எல்லாம் போக விடாமல், காந்தம் போல் தாங்கள் காட்டும்
அவலங்களிலேயே உழல வைத்துள்ளன.

நான் என்னால் இயன்ற வரையில், இந்த வலைத்தளத்தில் –
நான் பார்க்க நேரிடும், படிக்க நேரிடும், தெரிந்து கொள்ள
நேரிடும் பல நல்ல செய்திகளை தகுந்த இடைவெளிகளில்
பரிமாறிக்கொள்ள விரும்புகிறேன்…. அவ்வப்போது அதை
செய்துகொண்டும் இருக்கிறேன்..

( ஆனால், தொடர்ந்து இதை மட்டுமே செய்து கொண்டிருந்தால்,
இந்த வலைத்தளத்தை நானும், நண்பர் அப்பண்ணசுவாமியும்
மட்டுமே படித்துக் கொண்டிருக்க வேண்டும் என்பதையும் உணர்கிறேன்.. 🙂 🙂 🙂 – அதனால் தான்… தகுந்த இடைவெளி….!!! )

இந்த இடுகையின் மூலம், நான், நமது நண்பர்களுக்கு சொல்ல
விரும்புவது – விழுப்புரம்-உளுந்தூர்பேட்டை அருகே
அமைந்துள்ள ஸ்ரீ சாரதா ஆசிரமத்தின் அற்புதமான சமூகத்
தொண்டு, செயல்பாடுகள் பற்றி –

—————————————————

அன்னை சாரதா தேவி அவர்களின் பெயரில் “ஸ்ரீ சாரதா
ஆசிரமம்” என்கிற பெயரில் இயங்கும் இந்த சமூக நல
நிறுவனத்தை நிர்வகிப்பது முற்றிலும் பெண் துறவிகளே
என்பது ஒரு வித்தியாசமான விஷயம்…

மனிதருக்கு செய்யும் சேவையே
மகேஸ்வரனுக்கு செய்யும் சேவை….

சுவாமி விவேகானந்தரின் வார்த்தைகளில் சொல்ல
வேண்டுமானால் –

” one has to serve humanity, through that service bring happiness
around you and through that very service, elevate yourself also
morally and spiritually. If you want to do “real service”,
Renunciation must be the bedrock for service! ”

இந்த வார்த்தைகளினால் ஈர்க்கப்பட்டு – தமிழ்நாட்டின் பல
பகுதிகளையும் சேர்ந்த, உயர் கல்வித் தகுதியையும், வெளியே
பணியாற்றினால் நன்கு சம்பாதிக்கக்கூடிய திறனையும் உடைய
45 பெண்கள், தங்கள் சொந்த பந்தங்களையும், நல்ல வாழ்க்கை
வசதிகளையும் துறந்து சந்நியாச வாழ்க்கையை மேற்கொண்டு,
இந்த ஆசிரமத்தை நிர்வகித்து வருகிறார்கள்.

இவர்களில் 8 எஞ்சினீயர்களும், பல முதுகலைப்பட்டதாரிகளும்,
பல்வேறு தகுதிகளுடைய பட்டதாரிகளும் அடக்கம்.

இந்த ஆசிரமத்தின் முக்கிய நோக்கங்கள் –

கல்வி –

இதைச்சுற்றிலும் அமைந்துள்ள, ஏழ்மையான, பின் தங்கிய
கிராமங்களில் வாழும் மக்களுக்கு நல்ல கல்வியறிவும்,
ஆரோக்கியமும், உடல்நலனும், நல்ல பண்பாட்டுச் சூழலும்,
பொருளாதார உயர்வும், விவசாய முன்னேற்றமும், கிடைக்கச்
செய்வது…

ஆண்டு தோறும் 1000-க்கும் மேற்பட்ட மாணவர்களுக்கும்,
பெண்களுக்கும், படிப்பும், தொழிற்கல்வியும் கற்றுக்கொடுத்து,
அவர்களை தொழில் செய்யும் தகுதியுடன் உருவாக்குவது…

இங்கு இயங்குபவை –

ஸ்ரீ சாரதா சேவாலயா – என்னும் பிரிவு மூலம் –

எந்தவித ஆதரம் அற்ற சுமார் 150 கிராம பெண்களுக்கு,
கட்டணம் ஏதும் இல்லாமல், உணவு, உடை, தங்குமிடம்,
கல்வி, மற்றும் தொழிற்பயிற்சி அளிக்கப்படுகிறது.

வித்யார்த்தி ரக்ஷா யோஜனா – என்னும் பிரிவு மூலம் –

பிழைப்பிற்கு வேறு வழியின்று, பகலில் பலவிதமான
வேலைகளில் ஈடுபட்டிருக்கும், சிறுவர்களுக்கு, மாலை/இரவு
நேரங்களில் படிப்பு சொல்லிக் கொடுத்து சத்தான உணவும்
அளிக்கப்படுகிறது.

கஸ்தூரிபா காந்தி பாலிகா வித்யாலயா – என்னும் பிரிவு மூலம்-

பள்ளிக்கூடம் பக்கமே எட்டிப்பார்த்திராத அல்லது
பாதியில் படிப்பை நிறுத்தி விட்ட வசதியற்ற கிராமத்து
பெண்கள் 100 பேருக்கு, உணவு, உறைவிடத்துடன் கூடிய
கல்விப்பயிற்சியும், தொழில்பயிற்சியும் அளிக்கப்படுகிறது.

தன்னலம் சிறிதுமற்ற பெண் துறவிகளின் நேரடிப்பார்வையில்,
அவர்கள் அன்பும், கருணையும் சேர்த்து ஊட்டி திறன்மிக்க
பெண்களாக உருவாக்கப்படுகிறார்கள்.

மருத்துவம் –

ஆசிரமத்தைச் சுற்றியுள்ள கிராம மக்களின் உடல்நலன் காக்க,
ஒரு நடமாடும் (mobile dispensary) மருத்துவமனையும்,

ஈசிஜி,ஸ்கேன்,எக்ஸ்ரே,மினி ஆபரேஷன் தியேட்டர் வசதிகளுடன்
கூடிய ஒரு மருத்துவ மனையும்,

புதுச்சேரி அர்விந்த் கண் மருத்துவமனையின் உதவியுடன்,
ஒரு கண்மருத்துவ மனையும் ….இயக்கப்படுகின்றன.

குடும்ப நலம் –

சுமார் 30 பேர் நிரந்தரமாக தங்கும், ஆதரவற்ற பெண்களுக்கான
ஒரு முதியோர் இல்லம்….

தேவைப்படும் கிராம மக்களுக்கு இலவசமாக சத்துணவு
அளிக்கும் ஸ்ரீ அன்னபூரணி செண்டர்…

குடும்பப் பெண்களுக்கு ஏற்படக்கூடிய பிரச்சினைகளுக்கு,
கனிவுடனும், அக்கறையுடனும், ஆலோசனை கூறி உதவவும்,
சுயவேலை வாய்ப்பு திட்டங்களின் மூலம்
அவர்களது வாழ்க்கைத் தரத்தை மேம்படுத்திக்கொள்ளவும்,

அவர்களிடையே எழுச்சியும், உற்சாகமும் ஏற்படுத்த –
கலாச்சார நிகழ்ச்சிகள், விளையாட்டு போட்டிகள், யோகா
மற்றும் இதர பயிற்சிகள்….அளிக்கவும் – சாரதா சேவா சமிதி….

நீர் பராமரிப்பு –

மழை நீர் சேகரிப்பு முறைகளையும், பழைய குளங்கள்,
குட்டைகள், ஏரிகள், வாய்க்கால்களை மீட்டு – உயிர்ப்பித்து,
குடிநீர் மற்றும் பாசன நீர் வசதிகளை பெருக்கும் முறைகளை
விஞ்ஞானபூர்வமாக கிராமத்து மக்களுக்கு சொல்லிக் கொடுத்து,
அவர்களுடன் சேர்ந்து இயங்கி, பல நீர்நிலைகள் மீட்பது….

இவை அனைத்தையும் தாண்டி –
ஒரு மிகப்பெரிய விவசாயப்புரட்சியையே உருவாக்கிக்
கொண்டிருக்கிறது இந்த ஆசிரமம்.

இடுகை நீண்டு விட்டதால், அதுபற்றிய விவரங்களுடன்
அடுத்த இடுகையில் சந்திப்போம்….