கெஜ்ரிவாலை நம்பலாமா ..? டில்லியில் பாஜக
என்ன செய்ய வேண்டும் …?
—
நான்கு மாநிலங்களில் சட்டமன்ற தேர்தல் முடிவுகள்
வெளிவந்த நிலையில், டில்லியில் மட்டும்
எந்த கட்சிக்கும் பெரும்பான்மை இல்லை. யாரும் –
யாருடனும் சேரத்தயார் இல்லை –
தேர்ந்தெடுக்கப்பட்ட அரசு அமைக்க முடியாத நிலை.

மொத்தம் -70

பாஜக -32
ஆம் ஆத்மி -28
காங்கிரஸ் -8
ஜ.த.-1
சுயேச்சை -1

பாஜகவுக்கு தனிப் பெரும்பான்மை இல்லாத நிலையில்,
ஆம் ஆத்மி கட்சியும் ஒத்துழைப்பு தரத்தயாராக இல்லாத
போது – பாஜக ஆட்சி அமைக்க முயற்சி செய்யவே கூடாது.
(பாஜக வும் அதுபோன்ற விருப்பத்தை இதுவரை
தெரிவிக்கவில்லை.)

ஆம் ஆத்மி கட்சியோ – காங்கிரஸ், பாஜக ஆகிய இரு
கட்சிகளிடமும் ஆதரவு கோரவும் மாட்டோம் –
ஆதரவு கொடுக்கவும் மாட்டோம் என்று சொல்லி விட்டது.

இந்த நிலையில் – கவர்னர் ஆட்சியும்,
பின்னர் மீண்டும் தேர்தலும் தான் கண் முன்
தோன்றும் தீர்வு.

ஆனால் – இது சரியான முடிவாக இருக்க முடியாது.
உடனே இன்னொரு தேர்தல் என்பது –
காங்கிரஸ் கட்சிக்கு எதிராக தீர்ப்பு கொடுத்திருக்கும் டில்லி
மக்களுக்கு கொடுக்கப்படும் தண்டனையாகி விடும்.

டில்லி மக்கள் 70 இடங்களில், 60 இடங்களை
எதிர்க்கட்சிகளுக்கு கொடுத்ததன் மூலம் காங்கிரசுக்கு
எதிரான தங்கள் எண்ணத்தை தெளிவாக வெளிப்படுத்தி
இருக்கிறார்கள்.

எனவே காங்கிரஸ் அல்லாத – உருப்படியான ஒரு
ஆட்சியை அமைக்க வேண்டியது பாஜக மற்றும்
ஆம் ஆத்மி ஆகிய இரண்டு கட்சிகளுக்கும் உள்ள
அடிப்படைக் கடமை. இதற்கு அவர்கள் கூட்டணி
அமைத்தால் தான் முடியும் என்பதில்லை.

வேறு என்ன செய்யலாம் ..?

அதில் நுழையும் முன் –
ஆம் ஆத்மி கட்சியைப் பற்றியும்,
அதன் நிறுவனத்தலைவர் அர்விந்த் கெஜ்ரிவால் பற்றியும்
சில விஷயங்களை கவனத்தில் கொள்ள வேண்டி இருக்கிறது.

இரண்டு – மூன்று ஆண்டுகளுக்கு முன்னர் அர்விந்த்
கெஜ்ரிவாலை பற்றி டில்லிக்கு வெளியே யாருக்கும் தெரியாது.
டில்லியில் அவர் பணியாற்றிய ஒரு தொண்டு நிறுவனத்தின்
காரணமாக சிலருக்கு மட்டும் தெரியும்.

இரண்டு ஆண்டுகளுக்கு முன்பு -மத்திய அரசில்
ஊழல்கள் வரிசையாக ஆதர்ஷ், 2ஜி, காமன்வெல்த்
கேம்ஸ் -என்று வெளிப்படத் துவங்கியதும் – இந்தியா
முழுவதும் மக்களும், மீடியாக்களும், கொதித்தெழுந்து
மத்திய அரசின் ஊழல் நடவடிக்கைகளை
எதிர்க்கத் துவங்கினார்கள்.

அண்ணா ஹஜாரே கடந்த 30 ஆண்டுகளாக
மஹாராஷ்டிராவில் ரலேகான் சித்தி கிராமத்தில்
இருந்து கொண்டு ஆற்றிய மக்கள் நலப்பணிகள் காரணமாக
மஹாராஷ்டிர மக்களின் அபிமானத்தையும்,
மரியாதையையும் பெற்றிருந்தார்.
அவர் டில்லியை மையமாகக் கொண்டு அகில இந்திய
அளவில் ஊழலுக்கு எதிராக மிகப்பெரிய அளவில்
செயல்பட வேண்டும் என்று பல சமூக ஆர்வலர்கள்
(team anna )விரும்பினர்.

ஜஸ்டிஸ் சந்தோஷ் ஹெக்டே, கிரண் பேடி, பிரசாந்த்
பூஷன்,ஸ்ரீ ஸ்ரீ ரவிஷங்கர்ஜி ஆகியோரும், கூடவே
அர்விந்த் கெஜ்ரிவாலும் அதில் அடங்குவர்.

இதில் – கெஜ்ரிவால் தன் தனிப்பட்ட ஆளுமைத்திறன்,
புத்திசாலித்தனம், பேச்சுத் திறமை, வயது
ஆகிய காரணங்களால் முன் வரிசையில் நின்றார்.

India Against Corruption இயக்கம்
மக்களிடையே பெருத்த வரவேற்பைப் பெற்றது.
ஊழல் அரசியல்வாதிகளையும், அதிகாரிகளையும்
விரைவாக விசாரித்து தண்டிக்க “ஜன் லோக்பால்” சட்டம்
தேவை என்பது முதல் பெரிய கோரிக்கையாக மத்திய அரசின்
முன் வைக்கப்பட்டது.

அதை ஏற்று செயல்பட மத்திய அரசு வெளிப்படையாக
முன்வராத நிலையில் – அதனைத் தொடர்ந்தும்,
அதன் பிறகும் – டில்லியில் நடந்த அண்ணா ஹஜாரேயின்
உண்ணாவிரத போராட்டங்கள் இந்தியாவையே குலுக்கியது.

இந்தியாவின் பெரிய நகரங்கள் அனைத்திலும்
அண்ணா ஹஜாரேயின் ஊழலுக்கு எதிரான இயக்கத்திற்கு
படித்த, நடுத்தர மக்களிடையே மிகப் பெரிய, பரவலான
ஆதரவு உண்டானது. (இதை நான் விவரமாக சொல்ல
வேண்டிய அவசியம் இல்லை – அனைவருக்கும்
தெரிந்ததே ). இந்த இயக்கத்திற்கு ஒரு மிகப்பெரிய
இமேஜ் உருவானது. மீடியாக்களும் ஆதரவு கொடுத்தன.
ஆனால் – ஒரு கட்டத்தில், தடாலென்று
உண்ணாவிரதங்களால் பலன் ஏதும் கிடைக்கவில்லை.
இந்த இயக்கமே
தீவிர அரசியலில் இறங்குவது தான் ஊழலை ஒழிக்க
ஒரே வழி என்கிற கருத்தை கெஜ்ரிவால் முன் வைத்தார்.
அண்ணா ஹஜாரே இதை அரசியல் இயக்கமாக மாற்ற
ஒத்துக்கொள்ளாத நிலையில் –

கெஜ்ரிவால் தானும், தன்னைச் சேர்ந்தவர்களும்
புதிய அரசியல் கட்சியை -ஆம் ஆத்மி பார்ட்டி (சாதாரண
மனிதனின் கட்சி) என்கிற பெயரில் துவக்குவதாகவும்,
மிகுந்த வேதனையுடன், வேறு வழியின்றி
அண்ணா ஹஜாரேயைப் பிரிவதாகவும்,
வரவிருக்கும் டில்லி சட்டமன்ற தேர்தலில் தங்கள் கட்சி
போட்டியிடும் என்றும் அறிவித்தார்.

(டில்லிக்கு வேண்டுமானால் இது புதிதாக இருக்கலாம்-
ஆறு பத்தாண்டுகளுக்கு முன்னரே தமிழகம்
இத்தகைய ஒரு சூழலை சந்தித்து விட்டது …! )

ஓட்டு அரசியலில் தனக்கு சம்மதமில்லையென்றும்,
புதிய அரசியல் கட்சிக்கு தன் பெயரையோ,
India Against Corruption இயக்கத்தையோ
பயன்படுத்தக் கூடாது என்று அண்ணா ஹஜாரே
கண்டிப்பாகவே தெரிவித்து விட்டார்.

இங்கு ஒரு முக்கியமான விஷயம் கவனிக்கப்பட
வேண்டி இருக்கிறது.
அண்ணா ஹஜாரே மட்டுமல்ல.
ஊழல் ஒழிப்பு இயக்கம் அரசியல் கட்சியாக மாறினால்,
ஓட்டு பெறுவதற்காக
பல விஷயங்களில் விட்டுக்கொடுக்க
(compromise பண்ணிக்கொள்ள ) வேண்டி இருக்கும்.
எனவே அரசியல் அதிகாரங்களிலும், தேர்தல்களிலும்
தன்னை ஈடுபடுத்திக் கொள்ளாமல் –

எந்த கட்சி அதிகாரத்திற்கு வந்தாலும்,
எந்த ஆட்சி ஊழலில் ஈடுபட்டாலும்,
அவர்களை எதிர்த்து நேர்மைக்காகவும்,
நியாயத்திற்காகவும் -செயல்படக்கூடிய
ஒரு சுதந்திரமான மக்கள் சக்தி இயக்கமாகவே எப்போதும்
இருக்க வேண்டும் என்பதே பெரும்பாலான மக்களின்
விருப்பமாக இருந்தது.(என்னுடைய விருப்பமும் அதுவே)

கெஜ்ரிவாலின் நோக்கம் குறுகியதாக இருந்ததாகவே
தோன்றுகிறது. அவருக்கு பொறுமை இல்லை. உடனடியாக
அரசியலில் இறங்கி அதிகாரத்திற்கு வர வேண்டும் என்பதில்
ஆர்வம் காட்டினார். அவர் கூறிய காரணங்கள் ஏற்றுக்கொள்ள
கூடியதாக இல்லை.

டில்லி மாநில சட்டமன்ற தேர்தலில் ஈடுபடுவதன் மூலம்
அகில இந்திய அளவில் ஊழலை எப்படி ஒழிக்க முடியும் ?

“ஜன் லோக்பால்” என்பது மத்திய அரசால்,
பாராளுமன்றத்தில் நிறைவேற்றப்பட வேண்டிய ஒரு
அகில இந்திய தேவை. அந்தத் தேவை
டில்லி சட்டமன்றத்தை கைப்பற்றுவதன் மூலம்
எப்படி நிறைவேறும் ?

கெஜ்ரிவால் பெற்ற புகழ் – அண்ணா ஹஜாரேயின்
தலைமையில் நிகழ்ந்த ஊழல் எதிர்ப்பு இயக்கத்தில்
பங்கு கொண்டதால் வந்த புகழ்.அந்த புகழையும்,
அண்ணா ஹஜாரேயுடன் தனக்கு இருந்த நெருக்கத்தையும்
முதலீடாக்கியே கெஜ்ரிவால் தன் கட்சியைத் துவக்கி
இருக்கிறார்.

லட்சக்கணக்கான மக்கள் மிகத்தீவிரமாக பங்குகொண்ட
அண்ணா ஹஜாரேயின் போராட்டங்கள் அனைத்தும்
டில்லியில், ஜந்தர்மந்தரிலும், ராம்லீலா மைதானத்திலும்
நடைபெற்றதால் டில்லி மக்களின் மனதில் கெஜ்ரிவாலின்
பின்னணியில் அந்த போராட்டங்கள் இன்னும் நினைவில்
நிற்கின்றன.
இப்போது கெஜ்ரிவாலின் ஆம் ஆத்மி கட்சி டில்லியில்
பெரிய அளவில் வெற்றி பெற்றதற்கான காரணங்களை
கீழ்க்கண்டபடி வரிசைப்படுத்த இயலும் –

1)ஊழல் ஒழிப்பு இயக்கத்தின் போராட்டங்கள் இன்னும்
டில்லி மக்களின் மனதில் நிற்பது. அதில் முக்கிய பங்கு
ஏற்றவர் என்கிற முறையில் அர்விந்த் கெஜ்ரிவாலுக்கு
ஏற்பட்டிருக்கும் செல்வாக்கு –
(கெஜ்ரிவால் கட்சியினரின் வெள்ளைத் தொப்பி
ஒன்றே போதுமே அண்ணா ஹஜாரேயை நினைவுபடுத்த.!)

2) நிஜமாகவே அவர் கட்சியை வெளிப்படைத்தன்மை
உடையதாக அமைத்திருப்பது –

3) கட்சியின் நன்கொடை விவரங்களை,
இதர நடவடிக்கைகளை – வெளிப்படையாக
வலைத்தளத்தில் ஏற்றி இருப்பது –

4) இவற்றை   மட்டும்   நினைத்து டில்லி மக்கள்
கெஜ்ரிவாலுக்கு ஓட்டளிக்கவில்லை. இன்னொரு
முக்கியமான விஷயம் இருக்கிறது. அதை மீடியாக்கள்
கவனிக்கவில்லை.

டில்லி மக்களுக்கு உடனடியாக பலன் அளிக்கக்கூடிய
பல சலுகைகளை அவர் அறிவிப்பில் அள்ளி வீசினார் –
-மின்சக்தி விலையை (electricity bill )
பாதியாக (50 %) குறைப்பதாக,

– டில்லி முழுவதும் இலவசமாக
அத்தனை குடும்பங்களுக்கும்
தினமும் குறைந்த பட்சம் 700 லிட்டர்
நல்ல தண்ணீர் அளிப்பதாக,

-காய்கறிகளின் விலையை பாதியாக
(50%) குறைப்பதாக,

-பெண்களுக்கான தனி கமாண்டோ உதவி,

-தரமான இலவச சுகாதார, கல்வி வசதிகள்,
சாதாரண மக்களுக்கு கட்டுப்படக்கூடிய செலவில்
வீட்டு வசதிகள்…

-காண்ட்ராக்ட் வேலைகள் ஒழிக்கப்பட்டு,
ஊழியர்கள் அனைவரும் நிரந்தரமாக
அரசு வேலையில் அமர்த்தப்படுவதாக…

கெஜ்ரிவால் வெற்றி பெற இந்த வாக்குறுதிகளும்
மிகப்பெரிய காரணங்களாக இருந்துள்ளன.

இந்த நிலையில் கெஜ்ரிவாலைப் பற்றிய சில தகவல்கள்
பாதகமாகவும் உள்ளன-

– பிற்காலத்தில், தீவிர அரசியலில் இறங்குவது என்கிற
உள்நோக்கத்துடனே அண்ணா ஹஜாரேயின் இயக்கத்தில்
முக்கிய பங்கேற்றார் என்கிற கணிப்பு.

-அவரது தற்போதைய டில்லி சட்டமன்ற வேட்பாளர்கள்
சிறப்பானவர்கள் அல்ல என்கிற தகவல். (குறைந்த பட்சம்
இரண்டு போக்கிரிகள், 8 கோடீஸ்வரர்கள் )

– டில்லி முதலமைச்சர் ஆவது என்கிற அளவிற்கு
தன் வட்டத்தை, எல்லையை குறுக்கிக் கொண்டது.

– நன்கு ஆங்கிலம் பேசத்தெரிந்த இவர், பெரும்பாலும்
இந்தியிலேயே பேசுகிறார். டில்லி ஆங்கில
தொலைக்காட்சிகளில், ஆங்கில பேட்டிகளிலும் கூட –
வேண்டுமென்றே இந்தியில் பதில் அளிக்கிறார்.

இதற்கான காரணம் – இது தனது தற்போதைய
ஆதரவாளர்களுக்கு போய்ச்சேர வேண்டும் என்பதாகத்
தான் இருக்க முடியும். அகில இந்தியா என்கிற பார்வை
இருந்தால் – இவர் ஆங்கிலத்தில் கேட்கப்படும்
கேள்விகளுக்கு ஆங்கிலத்தில் தான் பதில் சொல்லி
இருப்பார் ?
– எப்போது delhi chief minister candidate
என்கிற உருவாக்கத்துக்குள் தன்னை இருத்திக் கொண்டாரோ
பிறகு இவர் அகில இந்திய அரசியல் பேசுவது இயலாத
காரியம். அகில இந்திய அளவில் இவரது கட்சியை
விரிவாக்குவதும் நடக்கவே இயலாத ஒரு விஷயம்.

(- சென்னையில் ஆம் ஆத்மி பார்ட்டிக்கு என்ன ஓட்டு
கிடைக்கும் ? -யோசிக்கவே முடியவில்லை !)

– எந்த ஒரு முயற்சியையும் துவக்கி,பாதியில் விட்டு
விட்டு அடுத்த விஷயத்திற்கு போய் விடுகிறார் –
(வாத்ரா ரியல் எஸ்டேட் விவகாரங்கள்,
சல்மான் குர்ஷித்/மனைவி சம்பந்தப்பட்ட
மாற்றுத் திறனாளிகளுக்கான நிதியில் சுரண்டல்,
HDFC வங்கியில் ஹவாலா மோசடி,
அம்பானி சகோதரர்களின் ஸ்விஸ் வங்கிக் கணக்கு…)
எல்லாமே துவக்கியதோடு சரி …! மேலே தொடரவே
இல்லை.

– இதில் மிகப்பரிதாபமான விஷயம் –
இவரை உருவாக்கிய அண்ணா ஹஜாரே, ரலேகான் சித்தி
கிராமத்தில் “ஜன் லோக்பால்” சட்டத்தை கொண்டு வர
வலியுறுத்தி –

இன்று முதல் மீண்டும் கால வரையற்ற உண்ணாவிரதம்
துவங்குகிறார். கெஜ்ரிவாலும் அவரது ஆதரவாளர்களும்
இதைக் கண்டு கொள்ளவே இல்லை …!
அவர்கள் அந்த அளவிற்கு டில்லி அரசியலில் “பிஸி”.!

எனவே – அர்விந்த் கெஜ்ரிவால் சம்பந்தப்பட்ட வரையில்
அவரது உள்நோக்கம் சந்தேகத்திற்குரியதாகவே இருக்கிறது.

அர்விந்த் கெஜ்ரிவால் கேள்விக்குரியவர் தான் ..!
ஒரு வேளை நமது சந்தேகம் தவறாகக் கூட இருக்கலாம்.

இந்த சந்தேகத்தை அவரது எதிர்கால நடவடிக்கைகள்
மட்டும் தான் தீர்த்து வைக்க முடியும்.

அவர் நேர்மையாக,
நிறைவேற்றக்கூடிய வாக்குறுதிகளை தான்,
அவற்றை செயல்படுத்த முடியுமென்று நம்பித்தான்
கொடுத்தாரா அல்லது தேர்தலில் ஜெயிக்க வேண்டும்
என்பதற்காக அவை அள்ளி விடப்பட்டனவா ?

டில்லியைப் பொறுத்த வரையில் பாஜக கெஜ்ரிவால்
எந்த அளவிற்கு உண்மையானவர் என்பது நிரூபணமாகும்
வரையில் பொறுமையாக இருக்க வேண்டும்.

அவர் தன் வாக்குறுதிகளை நிறைவேற்ற ஒரு சந்தர்ப்பத்தை
ஏற்படுத்திக் கொடுத்து, அவர் செய்கிறாரா இல்லை
நழுவி விடுகிறாரா என்பதை உறுதிப்படுத்திக் கொள்ள
வேண்டும்.
அர்விந்த் கெஜ்ரிவால் உண்மையானவராக இருந்தால் –
தனது வாக்குறுதிகளை நிறைவேற்றுவதற்கு அவருக்கு
ஒரு சந்தர்ப்பத்தை கொடுத்துப் பார்க்க வேண்டும்.
இது டில்லி மக்களின் விருப்பம் கூட என்பதை
பாஜக கருத்தில் கொள்ள வேண்டும்.

தற்போது, பாஜக வால் ஆட்சிப் பொறுப்பை ஏற்க
முடியாத நிலையில், அடுத்த பெரிய கட்சி என்கிற
முறையில் ஆம் ஆத்மி கட்சியை மைனாரிடி அரசாக
பொறுப்பேற்க வழி விட வேண்டும்.
ஆம் ஆத்மி கட்சி ஆதரவு கேட்டாலும், கேட்காவிட்டாலும்
பாஜக இதைச் செய்ய வேண்டும்.

ஆம் ஆத்மி கட்சி டில்லியில் ஆட்சி அமைக்க தான்
தடையாக இருக்காது என்றும் –
குறைந்த பட்சம் ஆறு மாதங்களுக்கு
பாஜக சட்டமன்றத்தில் அந்த ஆட்சிக்கு
எதிராக செயல்படாது
என்றும் வாக்கு கொடுத்தால் இது நடக்கலாம்.

இதை ஆம் அத்மி கட்சி தட்டிக்கழிக்காமல்
ஆட்சிப் பொறுப்பை ஏற்க முன்வர வேண்டும்.
டில்லி மக்களுக்கு தான் கொடுத்த வாக்குறுதிகளை
நேர்மையாக நிறைவேற்ற முன்வர வேண்டும்.

இதை கூட்டணி என்றோ, உள்ளேயிருந்தோ, வெளியே
இருந்தோ ஆதரவு என்றெல்லாமோ வகைப்படுத்த வேண்டிய
அவசியமே இல்லை.

ஆறு மாதங்கள் ஆம் ஆத்மி கட்சிக்கு ஆட்சி செய்ய
வாய்ப்பு கொடுத்து, தன் வாக்குறுதிகளை அது எந்த
அளவிற்கு செயல்படுத்துகிறது என்று பார்க்கலாம்.

இது -சட்டமன்ற தேர்தலில் காங்கிரஸ் கட்சிக்கு எதிராக
தீர்ப்பளித்த டில்லி மக்களுக்கு செய்யப்படும்
ஒரு நியாயமாக இருக்கும்.

கெஜ்ரிவால் எந்த அளவிற்கு உண்மையானவர் என்று
தெரிந்து கொள்ளவும் இது உதவும்.
அவர் தவறானவர் இல்லை என்றால் – அவர் அரசியல்
பொறுப்புகளுக்கு வருவதில் எந்த தவறும் இல்லை.

பாஜக வும், மக்கள் ஆதரவான செயல்பாடுகளுக்கு
தங்கள் கட்சி குறுக்கே இல்லை என்பதை தெளிவுபடுத்தலாம்.