……………………………………………………….

………………………………………………………..

பாருக்குள்ளே நல்ல நாடு – எங்கள்
பாரத நாடு

ஞானத்தி லேபர மோனத்திலே – உயர்
மானத்தி லேஅன்ன தானத்திலே,
கானத்தி லேஅமு தாக நிறைந்த
கவிதையி லேயுயர் நாடு – இந்தப் (பாரு)

தீரத்தி லேபடை வீரத்திலே – நெஞ்சில்
ஈரத்தி லேஉப காரத்திலே,
சாரத்தி லேமிகு சாத்திரங் கண்டு
தருவதி லேயுயர் நாடு – இந்தப் (பாரு)

நன்மையி லேயுடல் வன்மையிலே – செல்வப்
பன்மையி லேமறத் தன்மையிலே,
பொன்மயி லொத்திடு மாதர்தங் கற்பின்
புகழினி லேயுயர் நாடு – இந்தப் (பாரு)

ஆக்கத்தி லேதொழி லூக்கத்திலே – புய
வீக்கத்தி லேயுயர் நோக்கத்திலே,
காக்கத் திறல்கொண்ட மல்லர்தஞ் சேனைக்
கடலினி லேயுயர் நாடு – இந்தப் (பாரு)

வண்மையி லேயுளத் திண்மையிலே – மனத்
தண்மையி லேமதி நுண்மையிலே,
உண்மையி லேதவ றாத புலவர்
உணர்வினி லேயுயர் நாடு – இந்தப் (பாரு)

யாகத்தி லேதவ வேகத்திலே – தனி
யோகத்தி லேபல போகத்திலே
ஆகத்திலே தெய்வ பக்திகொண் டார்தம்
அருளினி லேயுயர் நாடு – இந்தப் (பாரு)

ஆற்றினி லேசுனை யூற்றினிலே – தென்றற்
காற்றினி லேமலைப் பேற்றினிலே
ஏற்றினி லேபய னீந்திடுங் காலி
யினத்தினி லேயுயர் நாடு – இந்தப் (பாரு)

தோட்டத்தி லேமரக் கூட்டத்திலே – கனி
யீட்டத்தி லேபயி ரூட்டத்திலே
தேட்டத்தி லேயடங் காத நிதியின்
சிறப்பினி லேயுயர் நாடு – இந்தப்

பாருக்குள்ளே நல்ல நாடு – எங்கள்
பாரத நாடு

• சுப்ரமணிய பாரதியார்
  (சுதந்திரம் பெறுவதற்கு பல ஆண்டுகள்
  முன்னரே இயற்றிய பாடல் ….)

……………….

பெற்ற சுதந்திரத்தை பேணிக்காக்கவும் –

நம் நாட்டை சீர்குலைக்கும் – தீவிரவாதிகளையும்,
அவர்களை பின்னில் இருந்துக்கொண்டு இயக்கும்
அயோக்கியர்களையும்,

அவர்கள் எங்கே ஓடி ஒளிந்திருந்தாலும் –
தேடிப் பிடித்து அழிக்கும் உயர்ந்த பணியில்
ஈடுபட்டிருக்கும், இந்தியாவின் முப்படையினருக்கும் –

அவர்கள் தம் பணியில் முழு வெற்றி பெற நம் அனைவரின் நெஞ்சார்ந்த வாழ்த்துகளும்,
உளமார்ந்த பாராட்டுகளும் உறு துணையாக
இருக்கட்டும்.

வாழ்க பாரதம்…
வெல்க இந்தியா … ஜெய் ஹிந்த் …👍👍👍

……………………………………………………………………………………………………………………………………………………………..