முதலிலேயே சொல்லி விடுகிறேன்….
பாஜக நண்பர்கள் என் மீது பாயக்கூடாது.
இந்த இடுகையில் ஒரு கருத்து கூட என்னுடையதாக
இல்லை. செய்தித்தளங்களில் நேற்றும் இன்றும் வெளியான
சில செய்திகளை நான் இங்கு தொகுத்து மட்டுமே
தருகிறேன்…..

நேற்றைய தினம் உச்சநீதிமன்றத்தில் (சுப்ரீம் கோர்ட்டில்)
மூத்த வழக்குரைஞரும், லஞ்ச ஊழல் சம்பந்தமாக பல
முக்கிய வழக்குகளைத் தொடுத்திருப்பவருமான
திரு.பிரசாந்த் பூஷண் அவர்கள் –

வருமான வரி இலாகா மற்றும் சிபிஐ நடத்திய ரெய்டில் – சில
மாநில முதலமைச்சர்கள் மற்றும் பல அரசியல்
தலைவர்களுக்கு கொடுக்கப்பட்ட லஞ்சப்பணம் தொடர்பாக
கிடைத்த பல ஆவணங்களை அப்படியே போர்த்தி மூடி,
மேல் நடவடிக்கை இல்லாமல் செய்து விட்டதாகவும்,

அந்த ஆவணங்களை வெளிகொணர்ந்து, அவற்றின் மேல்
நடவடிக்கைகளை எடுக்க, Central Board of Direct Taxes மற்றும்
Central Vigilance Commission ஆகியவற்றிற்கு சுப்ரீம் கோர்ட்
உத்திரவிட வேண்டுமென்றும் கோரி ஒரு வழக்கு
தொடர்ந்திருக்கிறார்.

இதே செய்தியை டெல்லி சட்டமன்றத்தில், நேற்றைய தினம்
டெல்லி முதல்வர் திரு.அர்விந்த் கெஜ்ரிவால் தெரிவித்து
பேசி இருக்கிறார்….

வலைத்தல நண்பர்கள் சுலபமாக புரிந்துகொள்ள வசதியாக,
டெல்லி சட்டமன்ற நிகழ்வுகள் பற்றிய பத்திரிகைச் செய்தியை
நான் அப்படியே கீழே தந்திருக்கிறேன்.

—————————————————————–

டெல்லி சட்டப்பேரவையில் இன்று ( 15/11/2016 ) முதல்வர்
அரவிந்த் கேஜ்ரிவால் பேசும்போது பிரதமர் நரேந்திர மோடி
மீது லஞ்ச-ஊழல் புகார் எழுப்பினார்.

அதாவது வழக்கறிஞரும் சமூக ஆர்வலரும் ஆன பிரசாந்த்
பூஷன், மத்திய நேரடி வரி ஆணையத்திற்கு அளித்த புகாரில்,
இரண்டு மிகப்பெரிய தொழிலதிபர் முதலைகளிடமிருந்து
வருமான வரித்துறையினர் பெற்ற ஆவணங்களின்படி பிரபல
அரசியல் தலைவர்களுக்கு பெரிய அளவில் தொகை
கொடுத்திருப்பது தெரியவந்திருப்பதாக கூறியிருந்தார், இதனை
தி இந்து (ஆங்கிலம்) செய்தியாக வெளியிட்ட பிறகு அரவிந்த்
கேஜ்ரிவால் இவ்வாறு தெரிவித்துள்ளார்.

ஆதித்ய பிர்லா நிர்வாகக் கார்ப்பரேஷன் தனியார் நிறுவனத்தின்
ஷுபேந்து அமிதாப் வருமான வரித்துறைக்கு அளித்துள்ள
அறிக்கையை மேற்கோள் காட்டி பேசினார் அரவிந்த்
கேஜ்ரிவால்.

கடந்த அக்டோபர் 2013-ல் நிலக்கரி சுரங்க முறைகேட்டு ஊழல்
விசாரணையில் ஆதித்ய பிர்லா குழுமத்தை சிபிஐ ரெய்டு
செய்த பிறகு இந்த உண்மைகள் தெரியவந்ததாக கேஜ்ரிவால்
குறிப்பிட்டார். இந்த ரெய்டின் போது ஆதித்ய பிர்லா
குழுமத்தில் பெரிய அளவில் ரொக்கம் கைப்பற்றப்பட்டது. இது
வருமானவரித்துறைக்கு தெரிவிக்கப்பட்டது.

“நவம்பர் 16, 2012 தேதியிட்ட குறிப்பு ஒன்று கைப்பற்றப்பட்டது
அதில் குஜராத் முதல்வர் ரூ.25 கோடி என்று
குறிப்பிடப்பட்டிருந்தது, எனவே குஜராத் முதல்வருக்கு
அப்போது ரூ.25 கோடி அளிக்கப்பட்டது இதன் மூலம்
தெரியவந்துள்ளது. இது குறித்து வருமான
வரித்துறையினரிடம் ஷுபேந்து அமிதாப் தெரிவிக்கும் போது
இதெல்லாம் சொந்தக் குறிப்புகளே என்று கூறியுள்ளார்.

வருமான வரித்துறையினர் ஷுபேந்து அமிதாப்பை கேள்வி
கேட்கும் போது, இவரோ அல்லது நிறுவனத்தின் எந்த ஒரு
அதிகாரியோ கடந்த காலத்தில் குழுமத்தின் நிறுவனமான
குஜராத் அல்காலி கெமிக்கல்சை குஜராத் சி.எம் என்று
குறிப்பிட்டுள்ளார்களா என்று கேட்ட போது ஷுபேந்து அமிதாப்
அந்த கேள்விக்கு மழுப்பினார்.

வருமான வரித்துறையினர் கைப்பற்றிய மற்றொரு
ஆவணத்தில், புரோஜெக்ட் ஜே.என்விரான்மெண்ட் அண்ட்
ஃபாரஸ்ட் தலைப்பில் ரூ.7.08 கோடி அளிக்கப்பட்டுள்ளதும்
காட்டப்பட்டுள்ளது. இது ஜெயந்தி நடராஜன் அமைச்சராக
இருந்த போது, இந்தக் காலக்கட்டத்தில் நவம்பர் 8, 2011 முதல்
ஜூன் 17, 2013 வரை ஆதித்ய பிர்லாவின் ஒரு 13
திட்டங்களுக்கு சுற்றுச்சூழல் அமைச்சகத்தின் அனுமதி
கிடைத்துள்ளது.

இது குறித்து பிப்ரவரி 27, 2014-ல் வருமானவரித்துறை தனது
அப்பிரைசல் அறிக்கையில் குஜராத் சிஎம் மற்றும் புரோஜெக்ட்
ஜே பெயரில் பணம் கொடுத்தது குறித்து கேள்வி எழுப்பப் பட்ட
போது ஷுபேந்து அமிதாப் நேரடியாக பதில் கூறாமல் மீண்டும்
மழுப்பியுள்ளார்.