ஸ்டாலின் வீட்டில் “ரெய்டு” -ப.சி.அவர்களின் அறிக்கை –
“எங்கள் அப்பா குதிருக்குள் இல்லை”

இப்போதெல்லாம் அரசின் முடிவுகளையோ, அமைச்சர்களின்
செயல்பாடுகளையோ குறித்து விமரிசித்தால்  கூட –
கிரிமினல் பிரிவுகளின் கீழ் “உள்ளே” தூக்கிப் போட்டு
விடுகிறார்கள். வலைத்தளங்களில் விமரிசனம் என்பது
ஜனநாயகத்தின் ஒரு பகுதியாக, கருத்து கூறலாகவே எடுத்துக்
கொள்ளப்பட  வேண்டுமே தவிர – அவமதிப்பாக அல்ல.

யாரையும் அவமதிக்கும் நோக்கம் நமக்குக் கிடையாது.
விமரிசனத்தில் சிறிது கிண்டலும் கேலியும் கலந்திருக்கலாம்.
அதையெல்லாம் கூட சீரியஸாக எடுத்துக் கொண்டால், பிறகு
ஜனநாயகத்திற்கு என்ன தான் அர்த்தம் ?

இருந்தாலும், ஒரு 4 நாட்கள் கூட  “உள்ளே” போய்
வசிக்கும் அளவிற்கு என் உடல் நிலை இல்லாததால்,மிகவும்
ஜாக்கிரதையாகவே என் கருத்துக்களை கூற விரும்புகிறேன்.

இன்று காலை பரபரப்பான செய்தி வெளிவந்திருக்கிறது.

– திரு மு.க.ஸ்டாலின் அவர்களின் வீட்டில் சிபிஐ ரெய்டு.
வெளிநாட்டுக் கார்கள் வாங்கியது-விற்றது தொடர்பான
முறைகேடுகள் நிகழ்ந்தது குறித்து சிபிஐ விசாரணை செய்தது.
ஆவணங்கள் தேடப்பட்டன – என்று செய்தி.

ஸ்டாலின் எத்தனை கார் வைத்திருக்கிறார் –
அதில் எத்தனை வெளிநாடு ?
எத்தனை உள்நாடு ? அவர் மகனும், மருமகனும்
எந்தெந்த வெளிநாட்டுக் கார்களை வைத்திருக்கிறார்கள் ?
அவர் மருமகன் வைத்திருந்த எந்தெந்த வெளிநாட்டு கார்கள்
குறித்து முன்னால் வழக்குகள் இருந்தன ?
அவை முன்பு  திமுக ஆட்சியின் போது எப்படி கைவிடப்பட்டன
-என்பது குறித்தெல்லாம் நமக்கு என்ன தெரியும் ? ஒன்றும்
தெரியாத நிலையில் இவற்றைப் பற்றி
கருத்து கூற நமக்கு அருகதை ஏது ?

ஆனாலும் பொதுவாக இந்த விஷயம் குறித்து
சில கேள்விகள் எழுகின்றன  !

முதல் கேள்வி – இந்த ரெய்டு குறித்து, மத்திய நிதியமைச்சர்
தொலைக்காட்சி நிருபர்களிடத்தே “நேற்றைய தினம்
திமுக கூட்டணியிலிருந்து விலகி இருக்கின்ற நிலையில் –
இன்று இந்த ரெய்டு நிகழ்ந்திருப்பது –  தவறாக  புரிந்து
கொள்ளப்படும். நான் இதை கடுமையாக ஆட்சேபிக்கிறேன்”
என்று கூறுகிறார்.

அமைச்சர் கூற வருவதென்ன ? சிபிஐ அன்றாட அரசியல்
சூழ்நிலைகளை கவனித்து, அதற்கேற்றாற்போல் தான் தங்கள்
நடவடிக்கைகளை அமைத்துக் கொள்ள வேண்டும் என்றா ?

“நேற்றைய தினம் ஆளும் கூட்டணியிலிருந்து
திமுக விலகிய நிலையில், இன்றைய தினம்
அதன் தலைவரின் மகன் வீட்டில் ரெய்டு நிகழ்த்தினால் –
மத்திய அரசுக்கு கெட்ட பெயர் வந்து விடுமே” என்று யூகித்து,
யோசித்து, இன்றைய ரெய்டை தவிர்த்திருக்க வேண்டும் என்றா ?

அப்படி என்றால் அதற்கு என்ன அர்த்தம் ?
-மத்திய அரசின் விருப்பு, வெறுப்பு, சௌகரியங்களைப்
பொறுத்தும், மத்திய அரசுக்கு எந்த விதத்திலும் கெட்ட பெயர்
வராமலும் சிபிஐ செயல்பட வேண்டும் என்றா ?

சிபிஐ என்பது முற்றிலும் சுதந்திரமான ஒரு அமைப்பு.
மத்திய அரசு அதன் மீது எந்தவிதமான செல்வாக்கையோ,
அதிகாரத்தையோ -பயன்படுத்துவதில்லை என்றல்லவா
அடிக்கடி மத்திய அரசு பாராளுமன்றத்தில்  கூறி வருவதாக
நினைவு ?

“எங்க அப்பன் குதிருக்குள் இல்லை” என்று
ஒரு கிராம வழக்குச் சொல் உண்டு. ஏனோ அது இப்போது
நினைவிற்கு வருகிறது !

வயதாகி விட்டதே தவிர என் சிற்றறிவிற்கு இதெல்லாம்
இலேசில் விளங்க மாட்டேனென்கிறது. புரிந்தவர்கள் யாராவது
இதை எனக்கும், மற்றவர்களுக்கும் புரியும்படி எடுத்துச்
சொன்னால் தேவலை !

இரண்டாவதாக இன்னொரு சந்தேகம்  –

ஸ்டாலின் கார் குறித்த புகார்கள் திடீரென்று நேற்று
முளைத்திருக்க முடியாது. ஏற்கெனவே –
மாதக்கணக்கிலோ, வருடக்கணக்கிலோ – சிபிஐ யிடம்
ஆலோசனையில் இருந்திருக்க வேண்டும்.
மத்திய நிதியமைச்சகத்தில் பழனிமாணிக்கம், பழனிமாணிக்கம்
என்று திமுகவைச் சேர்ந்த  தஞ்சாவூர்க்காரர் ஒருவர் இருந்தார்.
ஜீபூம்பா கதையில் பாட்டிலை அழுத்தி மூடி அடைத்திருந்த
கார்க்கை எடுத்தவுடன், பூதம் படீரென்று
வெளிவந்து விடுவது போல் –
இந்த பழனிமாணிக்கம் நேற்று ராஜினாமா செய்து நகர்ந்தவுடன் –
வெளிநாட்டு காருக்கு திடீரென்று வழி கிடைத்து,
வழக்கு நகர்ந்திருக்குமோ ?

ஸ்டாலின் காலையில் நிருபர்களிடம் பேசும்போது  “நேற்றிரவு
கூட்டணியில் இருந்து விலகியதன் விளைவு – இன்று இந்த
உருட்டல், மிரட்டல் எல்லாம் வந்திருக்கிறது –
நான் எதற்கும் பயப்பட மாட்டேன் –
எல்லாவற்றையும் சட்டப்படி சந்திப்போம்” என்று கூறி விட்டார்.

டி.ஆர்.பாலுவோ “நெருப்புடன் விளையாடுகிறார்கள்”
என்கிறார்.

தலைவர் கலைஞர் ஒருவர் தான் பொறுப்போடு –
“இது பழிவாங்கலாகவும் இருக்கலாம். இல்லாமலும்
இருக்கலாம்” என்று கூறுகிறார்.

நான் மட்டும் ஏன் எதையாவது சொல்லி –
வம்பை வரவழைத்துக் கொள்ள வேண்டும் ?

நான் எதையும் தவறாகச் சொல்லி விடவில்லை தானே ?