முல்லைப் பெரியாறு – ராணுவத்திடம் ஒப்படைக்க
டாக்டர் கலாம் கூறும் யோசனை …ராகுல் ஏற்பாரா ?

இன்று அதிகாரபூர்வமற்ற ஒரு செய்தி
வெளியாகி உள்ளது.

முல்லைப் பெரியாறு அணை காரணமாக தமிழ் நாடு-
கேரளா ஆகிய இரு மாநிலங்களிடையே உறவு
சீர்கெட்டு, சின்னாபின்னமாகி, மாநில எல்லைகளில்
கலவர நிலை ஏற்பட்டும் மத்திய அரசு
துரும்பைக் கூட கிள்ளிப்போடாத  இந்த நிலையில் –

டாக்டர் அப்துல் கலாம் அவர்கள் பிரதமர் மன்மோகன்
சிங்கிற்கு சில ஆலோசனைகள் கூறி ஒரு கடிதம்
எழுதி இருப்பதாக (அல்லது எழுத இருப்பதாக )-
இன்று அதிகாரபூர்வம் இல்லாத
ஒரு செய்தி வெளியாகி உள்ளது.

அதில் காணும் முக்கிய விஷயங்கள் –

1) இந்தியாவின் அனைத்து நதிகளும்,
ஏற்கெனவே கட்டப்பட்டுள்ள அனைத்து அணைகளும்,
புதிதாகக் கட்டப்படும் அணைகளும்
தேசிய மயமாக்கப்பட்டு ராணுவத்தின் பொறுப்பில்
ஒப்படைக்கப்பட  வேண்டும்.

2) உலகத்தில் ஏற்கெனவே(அமெரிக்கா உட்பட )
பல நாடுகளில் அணைகள்  ராணுவத்தின் பொறுப்பில்
தான்  இருக்கின்றன.

அதே போல் இந்தியாவிலும், இனி புதிதாக
அணைகளை கட்டும் பொறுப்பையும்,
அவற்றை நிர்வாகம் (மெயின்டெனன்ஸ்) செய்யும்
பொறுப்பையும், ராணுவத்திடம் ஒப்படைக்க வேண்டும்.

3) நதிகளை இணைக்கும் தேசிய திட்டம் உடனடியாக
துவங்கப்பட வேண்டும்.

4) முல்லைப் பெரியாறில் புதிய அணை எதுவும் கட்டாமல்,
இன்னொரு பக்கம் பாதுகாப்பு சுவரை மட்டும்162 அடி
உயரத்திற்கு எழுப்பி, அதன் மூலம்
பாதுகாப்பையும் பலப்படுத்தி
கிடைக்கக்கூடிய கூடுதல் மின்சாரத்தை கேரளாவிற்கும் –
தண்ணீரை தமிழ் நாட்டிற்கும் தந்து பிரச்சினையை
இருவருக்கும் பொதுவாக தீர்க்கலாம்.

இந்த யோசனையை தமிழ் நாடு முழு மனதுடன்
வரவேற்கும் என்பதில் எந்தவித சந்தேகமும் இல்லை.

ஆனால் –இந்த யோசனையின் முழு விவரங்களும் இன்னும்
அதிகாரபூர்வமாக வெளிவராத இந்த நிலையிலேயே –
கேரளாவில் எதிர்ப்பு கிளம்பி விட்டது.

அதுமட்டுமல்ல. ஏற்கெனவே இளவரசர் ராகுல் காந்தி
நதிகளை இணைத்தால், நில அதிர்ச்சி ஏற்படும்
என்று எக்ஸ்பர்ட் ஒபினீயன் கொடுத்திருக்கும் நிலையில்
இந்த யோசனைகள் மத்திய அரசால் எந்த அளவிற்கு
வரவேற்கப்படும் என்பது ஊகிக்கக்கூடியதே.

எனவே – இந்த யோசனை நிறைவேறக்கூடிய
வாய்ப்புகள் எள்ளளவும் இல்லை என்பது நமக்கு
இப்போதே தெரிந்தாலும் –  
நாம் அவசியம்  இதை வரவேற்போம்.

குறைந்த பட்சம் -அது,
பிரச்சினையைத் தீர்க்க மனமில்லாத கேரள அரசு,
செயல் படாத  மத்திய அரசு  மற்றும்
தூண்டி விடும் காங்கிரஸ் கட்சியின்
நிலையை அப்பட்டமாக
வெளிப்படுத்தும் அளவிற்காவது உதவும் அல்லவா ?