ஐசிஐசிஐ வங்கி மூலம் வீடியோகான் நிறுவனத்திற்கு முறைகேடாக
3250 கோடி ரூபாய் கடன் கொடுத்து –

அதன் மூலம் சொந்த முறையில் பண ஆதாயம் பெற்றதாக அந்த வங்கியின் (முன்னாள்) தலைமை நிர்வாக அதிகாரி சந்தா கோச்சார்,
அவரது கணவர் தீபக் கோச்சார், விடியோகான் குழும
நிர்வாக இயக்குநர் வேணுகோபால் தூத் ஆகியோருக்கு எதிராக சிபிஐ
விசாரணை நடத்தி வந்தது…

கடந்த சில மாதங்களாக நடத்தப்பட்டு வந்த
விசாரணையின் விளைவாககடந்த 22/01/2018 அன்று
இவர்கள் மீது ஒரு FIR பதிவு செய்யப்பட்டது.

உடல்நலக்குறைவு காரணமாக அமெரிக்கா சென்று, அங்கு மருத்துவமனையில் அனுமதிக்கப்பட்டு தீவிர சிகிச்சை பெற்று வருகிறார் திரு.அருண் ஜெட்லி.

என்ன வியாதி என்று வெளியே சொல்லப்படாமல் ரகசியமாக வைக்கப்பட்டிருக்கும் வேளையில், அவரது நண்பர்கள் ஒருவகை புற்று நோயாக இருக்கலாமென்று சந்தேகம் தெரிவித்துள்ளனர்.
( திரு.அருண் ஜெட்லி, விரைவில் உடல்நலம் பெற்று நாடு திரும்ப
வேண்டும் என்று மனிதாபிமானம் காரணமாக வேண்டுகிறோம்…)

அவர் உடனடியாக பணிக்குத் திரும்ப வாய்ப்பில்லை என்கிற காரணத்தால், அவரது இடத்தில் திருவாளர் பியூஸ் கோயல், தற்காலிக நிதியமைச்சராக நியமிக்கப்பட்டு, திரு.ஜெட்லி இலாகா இல்லாத அமைச்சராக ஓய்வில் /சிகிச்சையில் இருக்கிறார்…!!!

இது ஒரு பக்கம் இருக்க –

ஆயிரக்கணக்கான மைல்கள் தாண்டி டெல்லியில்
22-ந்தேதி நடைபெற்ற ஒரு நிகழ்வுக்கு அமெரிக்காவிலிருந்தே, துடிதுடித்துப்போய் கண்டனக்குரல் எழுப்பி இருக்கிறார் ஜெட்லிஜி…

அது என்ன நிகழ்வு …?

ஐசிஐசிஐ வங்கியில் நடத்தப்பட்ட முறைகேடுகளை காரணம் காட்டி,
அந்த வங்கியின் (முன்னாள்) தலைமை நிர்வாக அதிகாரி சந்தா கோச்சார், அவரது கணவர் தீபக் கோச்சார், மற்றும் விடியோகான் குழும நிர்வாக இயக்குநர் வேணுகோபால் தூத் ஆகியோருக்கு எதிராக சிபிஐ FIR போட்டு, வழக்கு பதிவு செய்த நிகழ்வு தான் அது.

துடித்துப்போய், சிபிஐ-க்கு தேவையில்லாத adventure -ல் ஈடுபடாதீர்கள்என்று அட்வைஸ் செய்கிறார்.

பொதுவெளியில் இப்படி எழுதுகிறோமே – இது குறித்து விமரிசனம் வருமே என்று கூட யோசிக்காமல், திரு.ஜெட்லி துடித்துப்போய் சிபிஐ பற்றி, நிறைய comments போட்டு, ட்விட்டர் செய்திகள் வெளியிடுகிறார்…கீழே அவற்றை பார்க்கலாம்.

…

…

…

…

இங்கே சில கேள்விகள் எழுகின்றன….

எந்த முறையில் திரு.ஜெட்லி இந்த கருத்துகளை வெளியிட்டிருக்கிறார்..?

அவர் இப்போது நிதியமைச்சர் இல்லை. மத்திய அரசின் எந்த இலாகாவும் அவரது நிர்வாகத்தில் இல்லை. ஒருவேளை நிதியமைச்சராக இருந்தால் கூட, சிபிஐ அவரது நிர்வாகத்தின் கீழ் வராது.

சட்டப்படி, சிபிஐ ஒரு சுயேச்சையான அமைப்பு..
அதன் செயல்பாடுகளில் இவர் குறுக்கிடுவதை எந்தவித சட்டங்களோ, முறைகளோ, நியாயப்படுத்தவில்லை.

அடுத்த கேள்வி, இவருக்கு இந்த வழக்கில் அப்படியென்ன விசேஷ ஈடுபாடு…? சிபிஐ அமைப்பு FIR தானே பதிவு செய்திருக்கிறது… ?

அதுவும், அவர்களிடம் உள்ள ஆதாரங்களின் அடிப்படையில்….?
எந்த ஆதாரங்களின் அடிப்படையில் வழக்கு பதிவு செய்யப்பட்டிருக்கிறது என்பது வழக்கு நீதிமன்றத்திற்கு வரும்போது தான் தெரியவரும்.

அந்த அடிப்படை ஆதாரங்கள் பற்றி எதுவும் அறிய வாய்ப்பில்லாத நிலையில், எந்த தகுதியில் இவர் சிபிஐ நிர்வாகத்தை – குறை கூறுகிறார்..?
( பயமுறுத்துகிறார் என்று சொல்வது தான் பொருத்தமாக இருக்கும்…! )

இவருக்கு இந்த வழக்கில் அப்படியென்ன அக்கறை…?

இத்தோடு தீர்ந்ததா விவகாரம்….?

இவர் அறிக்கை வெளியிட்டதன் விளைவு –

எந்த சிபிஐ அதிகாரி, FIR பதிவு செய்தாரோ, சுதான்ஷு தார் மிஸ்ரா,
என்கிற அந்த அதிகாரி, மறுநாளே தன் பொறுப்பிலிருந்து விடுவிக்கப்பட்டு, ஜார்க்கண்ட் மாநிலம் ராஞ்சிக்கு பணியிட மாற்றம் செய்யப்பட்டு விட்டார்.
…

..

…

இது ஜெட்லிஜியின் தலையீட்டின் விளைவு என்று அப்பட்டமாகத் தெரிகிறது….

தமிழில் ஒரு பழமொழி உண்டு… குதிரை
கீழே தள்ளியதோடு நில்லாமல் குழியையும் பறித்ததாம் என்று…

அதுபோல், இந்த அதிகாரி மாற்றம் செய்யப்பட்டதற்கு கண்டனங்கள்
வந்துவிடப்போகின்றனவே என்று எண்ணியோ என்னவோ சிபிஐ தரப்பில் ஒரு விளக்கமும் வெளியிடப்பட்டுள்ளது…?

இந்த வழக்கை மிக அதிக காலம் தாமதப்படுத்தியதற்காக – அந்த அதிகாரி பொறுப்பிலிருந்து விடுவிக்க்ப்பட்டிருக்கிறாராம்…!
( அது FIR பதிவு செய்யப்பட்டு, அருண்ஜி அமெரிக்காவிலிருந்து அறிக்கை விட்ட பிறகு தான், அவர்களுக்கு தெரிய வந்திருக்கிறது போலும்….)

முறைகேடுகள், முறைகேடுகள் – தொடர்ந்து நடந்துகொண்டே இருக்கின்றன…. யார் என்ன செய்து விட முடியும் எங்களை – என்கிற அலட்சியமும், அகம்பாவமும் தான் இந்த நிகழ்வுகளின் மூலம் வெளிப்படுகின்றன….!!!

நடப்பவற்றை, பொது மக்களும் கவனித்துக் கொண்டு தான் இருக்கிறார்கள்…!!!