..

முன்னால் போனால் கடிக்கும்…
பின்னால் போனால் உதைக்கும்…
சட்டம் – ஒரு கழுதை என்று சொன்னவர்கள் உண்டு.

சட்டம் ஒரு இருட்டறை –
வக்கீல்களின் வாதம் அதில் ஒரு விளக்கு
என்று சொன்னவர்கள் உண்டு.

ஒவ்வொரு வக்கீலும் ஒவ்வொரு கலர் விளக்கை காண்பித்தால்,
சட்டத்தின் வடிவம் எதைப் பிரதிபலிக்கும்…? குழப்பம் தான் விளையும்…!

சட்டம் – சில சமயங்களில் கட்டிப்பிடித்து முத்தமும் கொடுக்கும் என்பதை இன்று நிரூபிக்கிறது 7 பேர் வழக்கில்.

Criminal Procedure Code -432 மற்றும் 433 பிரிவுகள் தண்டனைக் கைதிகளின் தண்டனைக் காலத்தை குறைப்பது, ரத்து செய்வது என்பவை குறித்து மாநில அரசுகளுக்கு இருக்கும் அதிகாரம் குறித்து பேசுகின்றன.

Criminal Procedure Code -பிரிவு 435 –
மாநில அரசு இந்த அதிகாரத்தை பயன்படுத்தும்போது –

மத்திய அரசு சம்பந்தப்பட்ட வழக்குகளில், தண்டனைக் கைதிகளின்
தண்டனைகளை குறைப்பது, ரத்து செய்வது என்றால் – மத்திய அரசை கலந்து ஆலோசனை செய்த பிறகே செய்ய வேண்டும் என்று வலியுறுத்துகிறது.

அரசியல் சட்ட பிரிவு 161 – தண்டனைக்கைதிகளின் தண்டனைகளை
குறைப்பது, ரத்து செய்வது முதலியன குறித்து மாநில கவர்னருக்கு
உள்ள அதிகாரத்தைப் பற்றி பேசுகிறது.

இந்த 7 பேர் வழக்கில், மாநில அரசு Cr.P.C- பிரிவு 435 -ன் கீழ் நடவடிக்கை எடுத்து, அவர்களை மன்னித்து விடுவிக்கத் தீர்மானித்து சட்டத்தின் தேவைப்படி, அதை மத்திய அரசுக்கு தெரியப்படுத்தி அதன் கருத்தை கேட்டது…

மத்தியில் இருந்த காங்கிரஸ் கூட்டணி அரசு இதில் முடிவெடுக்காமல் காலம் தாழ்த்த வாய்ப்பு இருக்கிறது என்று கருதியபடியால், 3 நாட்களுக்குள் மத்திய அரசிடமிருந்து பதில் வரவில்லையென்றால்,

மாநில அரசு தன் தீர்மானத்தை நடைமுறைப்படுத்தும் என்றும் மத்திய அரசுக்கு தெரிவித்தது.

அன்றைக்கு மத்தியில் இருந்த காங்கிரஸ் கூட்டணி அரசு (அதில் திமுகவும் அடக்கம்…) தமிழகம் பயந்தபடியே இந்த தீர்மானத்திற்கு முட்டுக்கட்டை போட்டது.

தமிழக அரசின் கடிதத்தை உச்சநீதிமன்றத்திற்கு கொண்டு போய், மத்திய அரசின் ஒப்புதல் இல்லாமல் தமிழக அரசு முடிவெடுப்பது சட்டவிரோதம் என்று வழக்கு தொடர்ந்தது….

நீண்டுகொண்டே போனது வழக்கு…..
மத்திய அரசுக்கு அதைப்பற்றி என்ன கவலை…?

3 நீதிபதிகளை கொண்ட பென்ச், இதை உச்சநீதிமன்றத்தின் 5 நீதிபதிகள் கொண்ட அரசியல் சாசன பிரிவிற்கு விளக்கம் கோரி அனுப்பியது…. அரசியல் சாசன பென்ச் நீண்ட விவாதங்களுக்குப் பிறகு மாநில அரசு இதில் தன்னிச்சையாக நடவடிக்கை எடுக்க முடியாது என்றும் மத்திய அரசின் ஒப்புதல் அவசியமென்றும் விளக்கம் தந்து, மீண்டும் 3 நீதிபதிகள் அமர்வுக்கு அனுப்பியது.

3 நீதிபதிகள் அமர்வு, மாநில அரசின், கைதிகளை விடுதலை செய்வது குறித்த முடிவு பற்றி மத்திய அரசு தனது கருத்தை முதலில் தெரிவிக்க வேண்டுமென்று உத்திரவு போட்டது.

இப்போது ஆட்சியில் இருந்தது பாஜக அரசு…
ஆனாலும் காங்கிரஸ் அரசை விட கடுமையாக
இந்த விஷயத்தை எதிர்த்தது.
7 பேரை விடுதலை செய்வதை
தாம் முற்றிலும் எதிர்ப்பதாகச் சொல்லி விட்டது.

காங்கிரசாக இருந்தால் என்ன…
பாஜக வாக இருந்தால் என்ன…
தமிழகத்தைப் பொறுத்த வரையில் இரண்டும் ஒன்று தானே…?

இதற்குள்ளாக, பேரறிவாளன் – தான் அரசியல் சாசன பிரிவு 161-ன் கீழ் அனுப்பிய கருணை மனுவின்மீது இன்னமும் எந்த முடிவும் எடுக்கப்படாமல் இருக்கிறது என்று ஒரு நினைவுறுத்தல் கொடுத்தார். தமிழக அரசும் இதில் சுப்ரீம் கோர்ட்டின் இறுதி உத்திரவை கேட்டு அழுத்தம் கொடுத்தது.

அதன் விளைவே, இன்றைய இனிய திருப்பம்….

சுப்ரீம் கோர்ட்டின் 5 நீதிபதிகள் கொண்ட பென்ச் கொடுத்த
விளக்கத்தையும் தாண்டி, அதற்கு அப்பாலும்,
நீதியின் மனசாட்சி வேலை செய்திருக்கிறது.

3 நீதிபதிகளைக் கொண்ட அமர்வு – இறுதியாக, ( முன்னர் கிடைத்த அரசியல் சாசன பிரிவிலிருந்து கிடைத்த விளக்கங்களுக்கு மாற்றாக…)

மாநில கவர்னர் (அதாவது மக்களால்
தேர்ந்தெடுக்கப்பட்ட மாநில அரசு)-

அரசியல் சட்டம் 121-வது பிரிவு மாநிலங்களுக்கு
அளித்திருக்கும் அதிகாரத்தின் கீழ் –
(மத்திய அரசை கலந்தாலோசிக்க வேண்டிய தேவை இல்லாமல்… )
தானே சுயமாக இந்த விஷயத்தில்
முடிவெடுக்கலாம் என்பது தான் அந்த தீர்ப்பு….

வீட்டில் தாய் தன் மகளுக்கு –
“அந்த வழியாக போனால் தானே உன்னை வம்புக்கு இழுக்கிறார்கள்…
நீ இந்த வழியாக போ கண்ணா” என்று யோசனை சொல்வது போல்,

Cr.P.C.வழியில் போனால் தானே உங்களுக்கு பிரச்சினை… அரசியல் சட்டம் கொடுக்கும் அதிகாரத்தை பயன்படுத்திக் கொள்ளுங்கள் – (உங்களை எவன் தடுக்கிறான் பார்ப்போம் ) என்று சொல்லிக் கொடுத்திருக்கிறது….

( மாநில அரசு முதல் நிலையிலேயே இந்த பிரிவை பயன்படுத்துவதில்
சில சிக்கல்கள் இருந்தன… அவற்றை வெளிப்படையாக இங்கே
விவாதிப்பது சரியாக இருக்காது…. இப்போது உச்சநீதிமன்றமே சொல்லி
விட்டதால், இனி செயல்பட தடை இருக்காது … )

வாழ்க நீதியின் மனசாட்சி…

மாநில அரசு ஏற்கெனவே இந்த தீர்மானத்தில் உறுதியாக இருப்பதால்
– உச்சநீதிமன்ற தீர்ப்பு கையில் கிடைத்தவுடன், நிச்சயமாக அடுத்த கட்டத்திற்கு செல்லும் ….இனி எதுவும் இந்த விஷயத்தில் குறுக்கிட வழி இல்லை என்று நம்பலாம்….

இருந்தாலும், மாநில அரசு, உரிய சட்ட ஆலோசனைகளை மேற்கொண்டு தான் இதில் செயல்பட வேண்டும் என்பதால்….அதற்கான கால அவகாசம் அதற்கு தேவைப்படும்…

( மத்திய பாஜக அரசு வேண்டுமென்றே எதாவது வம்பு செய்து, கவர்னர் மூலம் குறுக்கிட்டாலொழிய… இந்த பிரச்சினை சுமுகமாக தீரும் என்று நம்பலாம்…)

இனியாவது அந்த சிறைப்பறவைகள் –
சுதந்திரமாக சிறகடித்துப்
பறக்கட்டும் …..என்று வேண்டுவோமாக.

.
———————————————————————————