நான் இங்கே சொல்வது 40-45 ஆண்டுகளுக்கு முந்தைய விஷயம்.
அப்போதெல்லாம் இன்று போல் தொழில் நுட்ப வளர்ச்சிகள் இல்லை. இலக்கிய கூட்டம் என்றால், நேரில் போய் கேட்டால், பார்த்தால் தான் உண்டு. டிவி, வீடியோ எல்லாம் கிடையாது.
..

..

காரைக்குடியில் (சட்டை அணியாத…) சா.கணேசன் அவர்கள் நடத்தும் கம்பன் விழா மிகவும் புகழ் பெற்று பரபரப்பாக பேசப்பட்ட காலம்….

புதுச்சேரி -பாண்டிச்சேரியாக இருந்தபோது, காரைக்குடியை தொடர்ந்து,

ஆண்டுதோறும் பாண்டிச்சேரியிலும் கம்பன் விழா நடத்துவது
வழக்கமானது… தமிழ் இலக்கியத்தில் தலைசிறந்த பேச்சாளர்கள் வந்து
பேசுவார்கள்.

எம்.எம்.இஸ்மாயில் (1921-2005) அவர்களைப்பற்றி, இந்தக்கால இளைஞர்களுக்கு தெரிந்திருக்காது…. ஆனால் முன்னாள் இலக்கியப்
பிரியர்கள் மறக்கவே மாட்டார்கள்.
..

..

சென்னை உயர்நீதிமன்ற தலைமை நீதிபதியாக பதவி வகித்த அவர் ஒரு மிகச்சிறந்த இலக்கியவாதி….
தமிழ்ப் பேச்சாளர்… ஒரு இஸ்லாமியராக இருந்தாலும் கூட
கம்ப ராமாயணத்தை கரைத்துக் குடித்தவர். கம்பன் கழகத்தின் தலைவராகவும் கூட செயலாற்றியவர்.

கம்ப ராமாயணத்தின் கதாபாத்திரங்களைப்பற்றி அவர் பேசினால்,
கேட்டுக்கொண்டே இருக்கலாம். பேசி முடித்து விட்டால் அடடா – முடித்து விட்டாரே என்று இருக்கும். அவர் கலந்துகொண்ட பல கம்பன் விழா நிகழ்ச்சிகளை பார்த்த பாக்கியம் எனக்கு உண்டு.

இப்போது இது ஏன் என்கிறீர்களா…?

இந்த வருடமும் ஜூன் 2018-ல், கம்பன் விழா புதுச்சேரியில் சிறப்பாக
நடந்திருக்கிறது….. நேரில் போகக்கூடிய வாய்ப்பு எனக்குத்தான்
கிடைக்கவில்லை…

ஆனால், அதற்கு பதிலாக, அண்மையில், புதுச்சேரி தொலைக்காட்சி
( தூர்தர்ஷன் ) ஒளிபரப்பிய, கம்பன் விழா காட்சிகள் சிலவற்றை காணும் வாய்ப்பு கிடைத்தது….

புதுச்சேரி கம்பன் விழாவில், நிஜமும், உருவகமும் பற்றி
திரு.சுகி சிவம் அவர்களின் அற்புதமான உரையொன்று …
நண்பர்கள் அவசியம் கேட்க வேண்டும்…

( முதலில் இந்த இடுகைக்கான தலைப்பாக நான் போடவிருந்தது –
“நிஜமும், உருவகமும் – புதுச்சேரி கம்பன் விழாவில்
திரு.சுகி சிவம் உரை…” – பின் ஏன் மாற்றப்பட்டது…?
தலைவிதி… அந்த தலைப்பின் தலைவிதி.. 🙂 🙂
அதைப்பற்றி பின்னர் – அதற்கான நேரம் வரும்போது – சொல்கிறேன் )

…..

.
———————————————————————————

.
பின் குறிப்பு –

10-ஆம் நூற்றாண்டின் இறுதியில், (நான் இதைத்தான் ஏற்கிறேன்…)
ஸ்ரீரங்கம் ரங்கநாதர் கோயிலில் தான் “கம்ப ராமாயணம்”
கவிச்சக்ரவர்த்தி கம்பரால், அரங்கேற்றப்பட்டது.

இராம காவியத்தை இயற்றிய கம்பர், ஒவ்வொரு பாடலாக அதை
வாசித்து விளக்கும்போது அமர்ந்திருந்த மண்டபமும்,
அதை ரசித்துக் கேட்ட மன்னன் குலோத்துங்க சோழன்
அமர்ந்திருந்த உயர் மேடையும், இன்றும் தாயார் சந்நிதி எதிரே,
அதற்குரிய குறிப்புகளுடன் அடையாளம் காட்டப்படுகிறது.

ஒவ்வொரு தடவையும் ஸ்ரீரங்கம் போகும்போது,
நான் இந்த மண்டபத்தில்
கொஞ்ச நேரம் அமர்ந்திருப்பேன்…
கம்ப ராமாயணம் அரங்கேறிய அந்த நாட்களில் இந்த இடம்
எப்படி இருந்திருக்கும் என்று கற்பனையில் நினைத்துப் பார்ப்பேன்…

இனிமையான கனவு(நினைவு..?)களிலிருந்து பிரிய மனமில்லாமலே
அங்கிருந்து கிளம்புவேன்.

தமிழ், சரித்திரம் – இரண்டுமே சுவையானவை.
பேசப்பேச, கேட்கக்கேட்க
அலுக்கவே அலுக்காது…!