ஒரு நாளிரவு 8 மணி – (2016-ஆம் ஆண்டு, நவம்பர் மாதம் 8-ந்தேதி) திடீரென்று ஒருவர் அனைத்து தொலைக்காட்சிகளிலும் தோன்றி, ஒரு அறிவிப்பை வெளியிட்டார்…. இந்த நாட்டு மக்கள் அனைவரையும்
கதிகலங்க வைத்த ஒரு அறிவிப்பு.

அதன் விளைவு –

அடுத்த ஆறு மாதங்களுக்கு நாம் படாதபாடு பட்டோம்.
சொல்லொணாத்துயரங்களுக்கு உள்ளானோம்…
கையில் புழக்கத்திற்கு பணம் இன்றி தவித்தோம்.
பொழுது விடிந்தால், பொழுது போனால் – தினமும்
வங்கியின் வாசலிலும், ஏடிஎம் வாசலிலும் காத்திருந்து
இன்று ஆயிரம் கிடைக்குமா, இரண்டாயிரம் கிடைக்குமா என்று
நமது சொந்தப்பணத்தை திரும்ப பெறுவதற்கே
பிச்சைக்காரர்களைப் போல் அலைந்தோம்.

..

AppleMark

சிறு வியாபாரிகள் திணறினார்கள்.
சிறு, குறு தொழிற்சாலைகள் பல மூடப்பட வேண்டியதாயின. பல்லாயிரக்கணக்கானோர் வேலையிழந்தனர். பொருளாதாரம் படுத்தது.

சுமார் 15 கோடி பேர் – தினக்கூலி வாங்குவோர் – பல வாரங்களுக்கு தங்கள் வேலைகளை இழந்தனர்.
..

..

குறைந்த பட்சம் 100 பேருக்கு மேல் உயிரிழக்க
இந்த அறிவிப்பு காரணமாக இருந்தது.

ஆனால் – இனிமையான வாக்குறுதிகள் தரப்பட்டன…
கலர் கலரான கனவுகள் சித்தரித்து காட்டப்பட்டன …

கருப்பு மார்க்கெட்காரர்கள் விலங்கு போடப்பட்டு இழுத்துச் செல்லப்படுவார்கள்…கள்ளநோட்டு கும்பல் கதி கலங்கும்…
அடியோடு ஒழியும்.
காஷ்மீரில் கல்லெரியும் கும்பல் காணாமல் போகும்.
வரி ஏய்ப்பு செய்தவர்கள் அனைவரும்
சிறை செல்லும் நிலை ஏற்படும்….

இன்னும் கொஞ்ச நாட்களில் அனைத்தும் சீர்படும்.
நாட்டில் பாலும் தேனும் ஆறாக ஓடும்…
புதிய வேலை வாய்ப்புகள் உருவாகும்…etc. etc.

ஆனால் நடந்ததென்ன…?

எத்தனையோ தடவை கேட்டும், ரிசர்வ் வங்கி இறுதி அறிக்கையை
அளிப்பதை தாமதப்படுத்தி கொண்டே வந்தது. ஏனோ…?
மத்திய அரசு தடுத்து வந்ததன் காரணமோ…?
சர்குலேஷனில் இருந்த பணத்தில் திரும்ப வந்தது எவ்வளவு…?
அதில் கள்ளநோட்டுகள் எவ்வளவு..?
பிடிபட்டவர்கள் எவ்வளவு பேர்…?

குஜராத்திலும், மும்பையிலும், டெல்லியிலும் –
கோடி கோடியாக – ஆயிரக்கணக்கான கோடிகள்
பெரும் செல்வந்தர்களால் புதிய நோட்டுகளாக மாற்றப்பட்டது
செய்திகளில் அரைகுறையாக வந்தது…
ஆனால், இன்று வரை ஒரு நபரும் கைது செய்யப்பட்டதாகவோ
சிறைக்குச் சென்றதாகவோ தெரியவில்லையே…?

காஷ்மீரில் கல்லெரிதல் நின்று விட்டதா…?

2000-500 ரூபாய் கள்ளநோட்டுகள் புழக்கத்தில் இருப்பது
நிறுத்தப்பட்டு விட்டதா…?

மூடப்பட்ட சிறு, குறு தொழிற்சாலைகள் அனைத்தும்
திறக்கப்பட்டு விட்டனவா…?

எத்தனை பேர் மீது வருமான வரிச்சட்டங்களை மீறியதாக
வழக்கு போடப்பட்டு, எத்தனை ஆயிரம் கோடி
புதிதாக வசூல் செய்யப்பட்டது…?

ஒரு விவரமும் தெரியவில்லை…
அனைத்தும், கிணற்றில் போட்ட கல்’லாக இருந்து வந்தது.

இறுதியாக இப்போது ரிசர்வ் வங்கி தனது ரிப்போர்ட்டை வெளியிட்டு
விட்டது. ரிப்போர்ட்டை பார்த்தாலே தெரியும்…காலதாமதம் செய்யப்பட்டதற்கு காரணமென்ன என்பது … என்ன சொல்கிறது அறிக்கை….?

சர்குலேஷனில் இருந்த பழைய 500-1000 ரூபாய் நோட்டுகளின்
மொத்த மதிப்பு – 15.42 லட்சம் கோடி ரூபாய்.

இதில் வெறும் 13 ஆயிரம் கோடி ரூபாயைத் தவிர மற்ற அனைத்தும்
ரிசர்வ் வங்கிக்கு திரும்ப வந்து விட்டன….
..

..

இந்த 13,000 கோடியை மிச்சம் பிடிப்பதற்காக, அச்சடிக்கப்பட்ட புதிய
நோட்டுகளின் அச்சடிப்பு செலவு சுமார் 30,000 கோடிகள்…!
நோட்டுகளை அச்சடிக்கும் இடத்திலிருந்து இந்த புதிய நோட்டுகளை மின்னல் வேகத்தில் நாடு பூராவும் விமானம் மூலம் எடுத்துச் சென்று விநியோகிக்க ஏற்பட்ட செலவு எவ்வளவு ஆயிரம் கோடிகளோ…?

ரூபாய் நோட்டுகள் செல்லாததாக அறிவிக்கப்பட்ட பிறகு கோட்டை
கொத்தளத்தில் தேசியக்கொடியை ஏற்றியவர் – நாட்டு மக்களிடம்
பெருமையுடன் சொன்னது – குறைந்த பட்சம் 3 லட்சம் கோடி ரூபாய்
பழைய நோட்டுகள் திரும்ப வராது. அது அத்தனையும் நாட்டுக்கு லாபம்.
அது தான் நோட்டு மதிப்பிழப்பின் உச்சகட்ட லாபம்…!!!

அந்த 3 லட்சம் கோடி ரூபாய் இப்போது
– வெறும் 13,000 கோடி ரூபாய் ஆனது ஏன்…?

..

..

அத்தோடு விட்டதா…..?
நாட்டின் வளர்ச்சி விகிதத்தில் 1.5 % வீழ்ச்சி….
2.25 லட்சம் கோடி ரூபாய் அளவிற்கு உற்பத்தி இழப்பு.
அன்று விழுந்த பொருளாதாரம் இன்னும் எழுந்திருக்கவே இல்லை.

இதனால் பலன் அடைந்தவர்கள் யாருமே இல்லையா…?

இருந்தார்களே… குஜராத்திலும், மும்பையிலும் –
சில தொழிலதிபர்கள்… பெரும் செல்வந்தர்கள்…
அதிகாரத்திற்கு நெருங்கியவர்கள்…
வேண்டப்பட்டவர்கள்…

..

..

தவிர, அடுத்து வந்த உ.பி. தேர்தலில் செலவழிக்க
எதிர்க்கட்சிகள் சேர்த்து வைத்திருந்த கணக்கில் வராத பணம்
அழிக்கப்பட்டு, அவர்கள் பலம் அடித்து உடைக்கப்பட்டது….
மத்தியில் அதிகாரத்தில் இருந்தவர்கள் – மாநிலத்திலும்
அமோக வெற்றி பெற்றார்கள்…!!!

இதற்காகவா –

இந்த 15-20 அதிகாரத்திற்கு நெருங்கிய பெரும் கோடீஸ்வரர்கள் தங்கள் கருப்பை வெள்ளையாக்கிக் கொள்ளவும், மத்தியில் ஆளும் கட்சி, உ.பி. மாநிலத்தில் ஆட்சியை கைப்பற்றவுமா இந்த நாடும், நாட்டு மக்களும் இவ்வளவு பெரிய விலை கொடுத்தார்கள்; அத்தனை இன்னல்களையும் அனுபவித்தார்கள்…?

நல்லவர் போல் வேடம் பூண்டு,
கவர்ச்சிகரமாகப் பேசி,
சுயநலத்தால், இந்த நாட்டையே சூறையாடிய இவர்களுக்கு ….

– என்ன தண்டனை கொடுக்கலாம்….?

.
—————————————————————————

பின்சேர்க்கை – நண்பர் புதியவன் விருப்பம் …..!!!
..

…