ஜூனியர் விகடனில் வந்த சில “சங்கதி”களை வைத்து,
தினமலர் தன் பங்கிற்கு இன்னும் கொஞ்சம் “சங்கதிகளை” சேர்த்து
“ரீலா” அல்லது “ரியலா” என்று கேட்க வைக்கும் ஒரு கூட்டணியை
உருவாக்கி இருக்கிறார்கள்.

” மரியாதையாக என்னுடன் கூட்டணி வைத்துக் கொள்ளுங்கள்
இல்லையேல், திமுகவை உடைத்து, திருவாளர் அழகிரியுடன் இணைந்து
நாங்கள் புதிய திமுக+பாஜக கூட்டணியை உருவாக்குவோம் ” என்று
திரு.ஸ்டாலினிடம், பாஜக தலைமை கூறி இருப்பதாக ரீல் அல்லது
ரியல் செய்தி உருவாக்கப்பட்டுள்ளது.

தினமலரில் இன்று காலை வெளியான அந்த கட்டுரையை கீழே தந்திருக்கிறேன்.

அதற்குள் போவதற்கு முன்பாக –

– தத்துவங்களை,
கொள்கைகளை – அடிப்படையாக வைத்து
கூட்டணிகள் உருவானது துவக்க காலம்.

– கொள்கைகளில் வேறுபாடுகள் இருந்தாலும்,
“பொது செயல் திட்டம்” (common agenda) ஒன்றினை
உருவாக்கி, கூட்டணிகள், கூட்டணி அரசுகள்
உருவானது அதன் அடுத்த கட்டம்….

– கொள்கையாவது, பொது கோட்பாடாவது –
அதிக பட்சம் சீட்’டுகளை பெற வேண்டும்…
அதிகாரத்தைப் பெற வேண்டும் என்கிற – ஒரே லட்சியத்திலாவது
இணைந்து சம்பந்தப்பட்ட கட்சிகள் கூட்டு வைத்துக் கொண்டது –
அதற்கும் அடுத்த கட்டம்….

– மரியாதையாக கூட்டணி வைத்துக் கொள்கிறாயா அல்லது
உன் கட்சியை உடைக்கட்டுமா…? என்று மிரட்டி கூட்டணிகளை
உருவாக்குவது அதற்கும் அடுத்த கட்டம்…!!!

– ஒரு விஷயம்….
இந்த காலத்து இளைஞர்களுக்கு தெரிந்திருக்க வாய்ப்பில்லை…
கட்சிகளை உடைக்கும் வேலையை தமிழ்நாட்டில் முதல் முதலில்
துவக்கியது கலைஞர் தான் என்பது… அதற்கு முதல் பலியாக இருந்தது –
அந்த காலத்து பா.ம.க….!!!!

காலம் இப்போது திரும்புகிறது….
ஒருவழியாக, அதிமுகவை உடைத்து சிதற வைத்து விட்டு,
திமுக-வின் பக்கம் திரும்பி இருக்கிறது பாஜக….

இன்று அரசியலில் –
எந்த கொள்கையும் இல்லை…
கோட்பாடுகளும் இல்லை…
லட்சியங்களும் இல்லை…
ஒரே ஒரு குறிக்கோள்…… ஒரே ஒரு லட்சியம் மட்டும் தான் –

எதைச் செய்தாவது ஆட்சியை, அதிகாரத்தை கைப்பற்ற வேண்டும்…
அதற்காக எதைச் செய்தாலும் பரவாயில்லை…
என்ன விலை கொடுத்தாலும் பரவாயில்லை…. என்பது தான் அது…!

தமிழக மக்கள்… இந்திய மக்கள்… ஒரு மிக மிக மோசமான அரசியல்
சூழ்நிலையில், காலகட்டத்தில் – பயணித்துக் கொண்டிருக்கிறார்கள்
என்பதற்கு இது இன்னொரு உதாரணம்….

—————————————————————————-

தினமலர் நாளிதழில் இன்று வெளியாகியுள்ள ஒரு செய்திக்கட்டுரை….
(http://www.dinamalar.com/news_detail.asp?id=2083448)

———————
பதிவு செய்த நாள் : ஆகஸ்ட் 18,2018,

தி.மு.க.,வுடன் கூட்டணி: விரும்புது பா.ஜ., மேலிடம் ஸ்டாலின் மறுத்தால் அழகிரியை ஆதரிக்க திட்டம்

வரும் லோக்சபா தேர்தலில், தி.மு.க., கூட்டணியில் இடம் பெற, பா.ஜ.,
மேலிடம் விருப்பம் தெரிவித்துள்ளது. தி.மு.க., தரப்பில், இன்னும், ‘கிரீன்
சிக்னல்’ தரப்படவில்லை.

இதனால், ‘மாஜி’ மத்திய அமைச்சர் அழகிரியை, பகடைக்காயாக பயன்படுத்தி, தி.மு.க.,விற்கு நெருக்கடி கொடுக்க, பா.ஜ., மேலிடம் திட்டமிட்டுள்ளதாக, தி.மு.க., வட்டாரங்கள் தெரிவிக்கின்றன.தி.மு.க., தலைவர் கருணாநிதி, உடல் நலக்குறைவு ஏற்பட்டு, மருத்துவமனையில் அனுமதிக்கப் பட்டதும், ‘அவருக்கு வேண்டிய உதவிகள் செய்ய தயாராக உள்ளோம்’ என, பிரதமர் மோடி அறிவித்தார்.

கருணாநிதி உடல் நலம் குறித்து, ஜனாதிபதி ராம்நாத் கோவிந்த், துணை ஜனாதிபதி வெங்கையா நாயுடு மற்றும் மத்திய அமைச்சர்கள், பா.ஜ., தலைவர்கள், மருத்துவ மனை வந்து விசாரித்தனர்.

கருணாநிதி மறைவை, தேசிய துக்கமாக, மத்திய அரசு அறிவித்தது. லோக்சபா,ராஜ்யசபாவில், இரங்கல் தெரிவித்து, சபைகளும் ஒத்தி வைக்கப்பட்டன. இப்படி, கருணா நிதியின் மறைவுக்கு முன், பின், தி.மு.க.,விடம் மத்திய அரசு நெருக்கத்தை காட்டி வருகிறது.

அபிமானம்

வரும், 30ம் தேதி, சென்னை, நந்தனம், ஒய்.எம்.சி.ஏ., மைதானத்தில்
நடக்கவுள்ள கருணாநிதி புகழஞ்சலி கூட்டத்திற்கு, பா.ஜ., தேசிய தலைவர் அமித் ஷாவுக்கு அழைப்பு விடுக்கப்பட்டுள்ளது.

இதில்,அமித் ஷா பங்கேற்றால், தி.மு.க.,தொண்டர்களிடம், பா.ஜ., மீதான அபிமானம் உருவாகும்.மறைந்த முன்னாள் பிரதமர் வாஜ்பாய்க்கு,தி.மு.க., செயல் தலைவர் ஸ்டாலின், மகளிர் அணி செயலர் கனிமொழி ஆகியோர், டில்லி சென்று, அஞ்சலி செலுத்தினர்.

வாஜ்பாய் மறைவுக்கு முன், ‘அவர் நலம் பெற வேண்டும்’ என, ஸ்டாலின், டுவிட்டரில் பதிவு செய்திருந்தார்.இந்நிலையில், லோக்சபா தேர்தலில், தி.மு.க., வுடன், பா.ஜ., கூட்டணி அமைத்து போட்டியிட்டால்,
30 முதல், 37 தொகுதி கள் வரை வெற்றி பெறலாம் என, மத்திய உளவுத் துறை கணித்துள்ளது.

அதாவது, லோக்சபா தேர்தலில் பதிவாகும் மொத்த ஓட்டுகளின் சதவீதத்தில், ஆளுங்கட்சி என்ற அடிப் படையில், அ.தி.மு.க.,வுக்கு, 25 சதவீதம்; தினகரன் கட்சிக்கு, 10 சதவீதம் கிடைக்க வாய்ப்புள்ளது.

தி.மு.க., – பா.ஜ.,கூட்டணிக்கு, 40 சதவீதம் கிடைக்க வாய்ப்பு உள்ளது என்ற கணக்கை, மத்திய உளவுத் துறை, பா.ஜ., மேலிடத்தில் வழங்கிஉள்ளது.

தமிழகத்தில், தி.மு.க., வுடன், பா.ஜ., கூட்டணி அமைத்தால், தேசிய அளவில், மாநில கட்சிகளின் மத்தியில் அதிர்வலைகளை உருவாக்கும்.

மற்ற மாநிலங்களிலும் உள்ள கட்சிகளும், பா.ஜ., வுடன் கூட்டணி அமைக்க தயாராகும் என, பா.ஜ., மேலிடம் கருதுகிறது.

தி.மு.க., வட்டாரங்கள் கூறியதாவது:

குட்டையை குழப்பி, மீன் பிடிப்பது போல, திராவிட கட்சிகளில் உருவாகும் பலவீனத்தை பயன்படுத்தி, தமிழகத்தில் வலுவாக காலுான்ற, பா.ஜ., மேலிடம் காய் நகர்த்த பார்க்கிறது.

அ.தி.மு.க., பலவீனப்படும் வகையில், முதல்வர் பழனிசாமி, தினகரன், தீபா, திவாகரன் என, நான்கு அணிகளாக பிரிந்து கிடக்கின்றன.ஜெயலலிதா உயிரோடு இருக்கும் போது, பா.ஜ., வுக்கு கிடைக்கக் கூடிய நடுநிலையான, ஹிந்து மக்களின் ஓட்டுகள், ஜெயலலிதா என்ற பிம்பத்திற்காக பிரிந்து சென்றது.

இதனால், தமிழகத்தில், பா.ஜ.,வினரால் தனிதன்மை ஓட்டுகளை அறுவடை செய்ய முடியவில்லை. தற்போது, ஜெயலலிதா மறைந்து விட்டதால், நடு நிலையான ஹிந்து மக்களின் ஓட்டுகள், இனி, பா.ஜ.,விற்கு அல்லது நடிகர் ரஜினி கட்சிக்கு பிரிந்து செல்ல வாய்ப்பு உள்ளது.

அதே போல், கருணாநிதி மறைவு காரணமாக, தி.மு.க.,விலும் பிளவு ஏற்படுமா என்ற கேள்விஎழுந்துள்ளது. அதற்கு கட்டியம் கூறும் வகையில், தி.மு.க.,வில் இருந்து நீக்கி வைக்கப் பட்டுள்ள, அழகிரியின் செயல்பாடுகளும் உள்ளன.

சென்னை, அறிவாலயத்தில் நடந்த, தி.மு.க., செயற் குழு கூட்டத்தில், முன்னாள் மத்திய அமைச்சரும், தி.மு.க., துணைப் பொதுசெயலருமான
சுப்புலட்சுமி ஜெகதீசன் பேசுகையில், ‘தி.மு.க.,வை இரண்டாக உடைக்க,மத்திய அரசு சதி செய்கிறது’ என்றார்.அவரது பேச்சை, தி.மு.க.,
தரப்பில் யாரும் மறுக்கவில்லை. ஆனால், மத்திய அமைச்சர் பொன்.ராதாகிருஷ்ணன், ‘மத்திய அரசு, எந்த கட்சியையும் உடைக்கும்
வேலையில் ஈடுபடவில்லை’ என, பதிலடி கொடுத்தார்.

தி.மு.க.,வுடன் கூட்டணி வைக்க, பிரதமர் மோடி விரும்புகிறார்.
ஆனால், ஸ்டாலின் விரும்பவில்லை.அதற்கு காரணம், தி.மு.க.,வின்
ஓட்டு வங்கியாக கருதப்படும், சிறுபான்மையினரின் ஓட்டுகளை இழக்க
நேரிடும்.

கருணாநிதி உயிருடன் இருக்கும் போது, பா.ஜ., கூட்டணி ஏற்பட்டால்,
அவர், சிறுபான்மை மக்களையும், அந்த கூட்டணியை ஏற்றுக் கொள்ள
வைப்பார். அதாவது, ‘என்னை மீறி, பா.ஜ., மேலிடம்,
சிறுபான்மையினருக்கு பாதகமாக நடக்காது’ என்ற, உறுதிமொழியை
தருவார். ஆனால், ஸ்டாலினால் அப்படியொரு உறுதிமொழி அளிக்க
முடியாது. அவர் தலைமை, இன்னும் வெற்றியை தரவில்லை.

பகடைக்காய்

எனவே, தி.மு.க., – பா.ஜ., கூட்டணி தோல்வி அடைந்தால், தி.மு.க.,வுக்கு
எதிர்காலம் இருக்காது என்பது மட்டுமின்றி, தன்னுடைய அரசியல் வாழ்க்கையும் கேள்விக்குறியாகி விடும் என்ற அச்சம், அவருக்கு இருப்பதால் தான், கூட்டணி குறித்து, எந்த முடிவும் சொல்ல முடியாமல், குழப்பத்தில் இருக்கிறார்.

பா.ஜ., கூட்டணி குறித்த முடிவுக்கு, ஸ்டாலின் பச்சைக் கொடி காட்டவில்லை என்றால், அழகிரியை பகடைக்காயாக பயன்படுத்தி, தி.மு.க.,வை பிளவுபடுத்தி,நெருக்கடி கொடுக்க, பா.ஜ.,மேலிடம் தயாராக உள்ளது. இவ்வாறு தி.மு.க., வட்டாரங்கள் கூறின.

.
————————————————————————————————————–

\