ஈஷாவில் தொடங்கியது ……

————————

4-5 நாட்களுக்கு முன்னர் ஈஷா யோகா பயிற்சியில் கலந்து கொண்டீர்களா என்கிற தலைப்பில் ஒரு இடுகையை எழுதினேன். கலந்து கொண்டவர்களின் அனுபவத்தை விவரிக்கும்படியும் கேட்டுக் கொண்டேன்.

அதன் பின்னூட்டங்களில் பல தகவல்கள் கிடைத்தன. அவற்றை இன்னும் படிக்க இயலாதவர்கள் இப்போது கூட – செப்டம்பர் 25 தேதியிட்ட “ஈஷா யோகா பயிற்சியில் கலந்து கொண்டீர்களா ..? உங்கள் அனுபவத்தைக் கூற முடியுமா ?” என்கிற இடுகையின் கீழ் அவற்றைக் காணலாம்;

அந்த பின்னூட்டங்களிடையே நான் என் அனுபவத்தைப் பற்றியும் கூறியபோது ஒரு நண்பர் -என் கருத்துக்களை தனியே ஒரு இடுகையாகப் போடும்படி ஆலோசனை கூறினார். ஒரு விதத்தில், மேற்கொண்டு சில கருத்துப் பரிமாற்றங்களுக்கு இது ஒரு வாய்ப்பை உருவாக்கிக் கொடுக்கும் என்பதால் இந்த தலைப்பில் என் கருத்தை கீழே சொல்கிறேன் –

—————————————–

நானும் – ஆன்மிகம்-யோகா துறைகளில்

பல்வேறு அமைப்புகள் நிகழ்த்தும் நிகழ்வுகளில்

(ஜக்கி வாசுதேவ் அவர்களின் ஈஷா,

வேதாத்ரி மகரிஷி அவர்களின் மனவளக்கலை,

“மனசே ரிலாக்ஸ்” – சுகபோதாநந்தா –

ஸ்ரீஸ்ரீ ரவிசங்கர் அவர்களின் வாழும் கலை,

சின்மயா மிஷன் நடத்தும் “வேதாந்தம்” உள்பட )

கலந்து கொண்டு இந்த இந்த அமைப்புகள் அடிப்படையில் எப்படி வித்தியாசப்படுகின்றன என்பதை புரிந்து கொள்ள முயன்றேன் !!

என் கருத்து என்னவென்றால் –

இவர்களில் பெரும்பாலானோர் யோகாவையும், ஆன்மிகத்தையும் சேர்த்து தருவதாலும், வெகு குறுகிய காலத்திற்கே அவர்களது வழிகாட்டுதல்கள் கிடைக்கின்றன என்பதாலும் – உருப்படியான பலன்கள் கிடைப்பதில்லை.

எதிர்பார்த்த பலன்கள் கிடைக்கவில்லை என்பதை அவர்களிடம் வெளிப்படையாகக் கூற முடிவதில்லை. அப்படியே கூறினாலும், அவர்கள் மேற்கொண்டு இன்னும் ஒரு பயிற்சி முகாமில் சேர்த்து விடுவதிலேயே குறியாக இருக்கிறார்கள். ஒரு நண்பர் சுட்டிக் காட்டியது போல் – இறுதியில் அந்தந்த அமைப்புகளின் தீவிர ஆதரவாளர்களாக நம்மை மாற்றும் செயல் தான் நிகழ்கிறது.

நான் எல்லா அமைப்புகளையும் இப்படிச் சொல்ல மாட்டேன். வேதாத்ரி மகரிஷி அவர்களின் “மன வளக்கலை” நிகழ்ச்சிகள் காசு- பணத்திற்காக நடத்தப்படுபவை அல்ல.

ஆனால் – அவர்களது பயிற்சி முறைகள் எல்லாராலும், முழுமையாகச் செய்யக்கூடியவனவாக இல்லை. தீவிரமாக புருவமத்தியில் கவனத்தைச் செலுத்தி தியானம் செய்யும் முயற்சி -தீராத தலைவலியில் கொண்டு போய் விடுகிறது.

இன்னொரு நண்பர் கூறியது போல் – இதிலிருந்து – இந்த தலைவலியிலிருந்து – வெளியே வருவதே பெரிய பாடாகி விடுகிறது.

மேற்கூறிய அமைப்புகளைத் தவிர மேற்கொண்டு பல அமைப்புகளும் இருக்கவே செய்கின்றன. ஆனால் என் அனுபவத்திலும், இத்தகைய முயற்சிகளில் ஈடுபட்ட மற்ற சில நண்பர்களின் அனுபவத்தைக் கேட்டறிந்ததிலும் என்னைப் பொறுத்த வரை சில முடிவுகளுக்கு வர முடிந்தது.

“யோகா” கற்றுக் கொள்வதும், தொடர்ந்து செய்வதும், உடல் ஆரோக்கியத்திற்கு மிகவும் நல்லது . இதில் எந்தவித சந்தேகமும் இல்லை..

இதைச் செய்வதற்கு, ஜாதி-மத வேறுபாடோ, ஆண்-பெண் வித்தியாசமோ இல்லை. இதற்கு எந்தவித ஆன்மிக அடிப்படையும் தேவை இல்லை.

ஆனால் மிக முக்கியமான விஷயம் – –

யோகா கற்றுக் கொள்ள நமக்கு- புகழ்பெற்ற ஆன்மிகத் தலைவர்களோ, 3 நாள், 6 நாள் முகாம்களோ தேவை இல்லை. முறைப்படி யோகாசனம் கற்றுத்தேர்ந்த ‘யோகா மாஸ்டர்’ களின் தொடர்ந்த வழிகாட்டுதலின்படி இதைச் செய்வதே சரியான பலன் கிட்ட உருப்படியான வழி.

. அவரவர் வயது, உடல்நிலை, ஏற்கெனவே இருக்கும் உடற்கோளாறுகள், ஆசனம் செய்யத் தேவைப்படும் உடல் சக்தி – ஆகியவற்றை புரிந்து கொண்டு யோகா மாஸ்டர்கள் கொடுக்கும் அறிவுரைகளின்படி யோகாசனம் செய்வதே சரி. இது நமக்கு ஏற்கெனவே இருக்கும் சில நோய்களின் வீரியம்/ தாக்கம் குறையவும், மேற்கொண்டு நல்ல ஆரோக்கியத்தை தக்க வைத்துக்கொள்ளவும் நிச்சயம் உதவும்.

ஆனால் -யோகாசனம் என்பது தொடர்ந்து செய்யப்பட வேண்டிய விஷயம். அதிகாலையில் பயிற்சி செய்ய வேண்டி இருக்கும். அதற்காக தினமும் தனியே நேரம் ஒதுக்க வேண்டும் – வெறும் வயிற்றில் தான் யோகாசனம் செய்ய வேண்டும். அந்த அளவிற்கு அதில் ஆர்வமும், ஈடுபாடும் – உள்ளவர்கள் மட்டும் இதைத் துவக்கினால் போதும்.

இத்தகைய பின்னணி இல்லாதவர்கள் இதில் ஈடுபட நினைப்பது நேரத்தையும், பணத்தையும் வீணடிக்கும் செயலே.

இதில் ஈடுபடும் முன்னர் சுவாமி விவேகாநந்தரின் “ராஜயோகம்” என்கிற புத்தகத்தைப் படிப்பது ஒரு அடிப்படை உருவாக துணை புரியும். (இந்த நூல் இதே தலைப்பில் தமிழில் ராமகிருஷ்ணா மடத்தில் கிடைக்கும் )

யோகாசனம் செய்ய முடியாதவர்கள் அதனால் எந்தவித வருத்தமோ, தாழ்வு மனப்பான்மையோ கொள்ளத் தேவையேயில்லை.இது  ஒன்று தானா வழி .?

உள்ளத்தில், உடலில் – ஆரோக்கியத்தை உருவாக்கி பாதுகாத்துக்கொள்ள-

அவர்களால் இயன்ற நடைப்பயிற்சி, மூச்சுப்பயிற்சி, சில நிமிட அமைதியான தியானம் – ஆகியவை கூட போதுமானவையே !

மற்றபடி – “ஆன்மிகம்” – என்பது தனி விஷயம்.இது அவரவர் அனுபவம், ஆர்வம், வயது, தேடுதலில் உள்ள தீவிரம் – ஆகியவற்றைப் பொறுத்தது.

முதலில் – நல்ல புத்தகங்கள், பிறகு ஒத்த ஆர்வம் உடைய நண்பர்களுடன் தேடல் – இப்படி – போய்க்கொண்டே இருந்தால் – நமக்குள்ளேயே ஒரு தெளிவு ஏற்படும் – நமக்கு எது தேவை என்பதை நாமே புரிந்து கொள்ளக்கூடிய ஒரு சூழல் நமக்கு ஏற்படும்.

இவை எல்லாம் சில தகுதிகளுடனும் முயற்சிகளுடனும் மேற்கொள்ளப்பட வேண்டியவை.

ஒரு நல்ல சமுதாயம் உருவாக – நல்ல மனிதர்கள் உருவாக வேண்டும்.

அதற்கு – ஒவ்வொருவருக்குள்ளும் –

” நான் நல்லவனாக இருக்க வேண்டும்” என்கிற மன உறுதியை உருவாக்கிக்கொண்டு அதன்படி செயல்பட்டால் போதும் –

ஒருவனுக்கு “நல்ல மனிதன்” என்பதைத் தவிர வேறு என்ன தகுதி வேண்டும் ..?

வாருங்கள் -தொடர்ந்து பயணிப்போம். தெரிந்ததை, நமக்குப் புரிந்ததை பகிர்ந்து கொள்வோம்.

-வாழ்த்துக்களுடன், காவிரிமைந்தன் –