அம்பானி என்ன பொய்யரா..?  இருக்காதே ..! அவர் பெரும் பணக்காரர் ஆயிற்றே ..!! பணக்காரர் என்றால், பெருந்தொழிலதிபர் என்றால் – எதையும் செய்யும் துணிச்சல் தானாக வந்து விடுகிறது. எவ்வளவு அசால்டாக பதில் சொல்கிறார்..! இந்தியாவின் டாப் டென் பணக்காரர்களில் ஒருவர், சர்வசக்தியுள்ள தொழிலதிபர் – சிபிஐ யிடம் கொடுத்த வாக்குமூலத்தை கோர்ட்டில் இல்லவே இல்லை என்கிறார். ஒரு கம்பெனியை அவருடையது தானே என்று கேட்டால் நினைவில்லை என்கிறார். 2005ல் அந்த கம்பெனிக்கு வங்கிக் கணக்கு துவங்க அப்ளிகேஷன் கையெழுத்து போட்டது நீங்கள் தானே என்று பேப்பரைக் காட்டினால், கையெழுத்து என்னுடையது தான் ஆனால் கம்பெனி என்னுடையதா இல்லையா என்பது எனக்கு நினைவு இல்லை என்கிறார். உங்களுடன் கூட போடப்பட்டிருப்பது உங்கள் மனைவியின் கையெழுத்து தானே என்று கேட்டால் – இருக்கலாம் (இல்லாமலும் இருக்கலாம் …!!) என்கிறார். குற்றவாளிக் கூண்டிலேற்றி இருக்க வேண்டியவர்களை சாட்சியாக கூப்பிட்டது எப்படி ? வேறெந்த நாட்டிலாவது இப்படி நடக்குமா ? நேற்று முன்தினம் நடந்த விசாரணையில் பல்டி அடித்து விட்டதால் “hostile witness” ஆக மாறி விட்டதாக சிபிஐ தெரிவித்தது. ஸ்வான் டெலிகாம் பற்றி தான் கேள்விப்பட்டதே இல்லை என்றும் அதைப் பற்றி தனக்கு எதுவும் தெரியாது என்று சொல்லி விட்டார். (ஸ்வான் கம்பெனியில் அனில்அம்பானியின் RADAG கம்பெனிக்கு 9.9% பங்கு உள்ளது எனவே இது அவர்களது பினாமி கம்பெனி என்பது சிபிஐ யின் வாதம்.) இதில் வேடிக்கை என்னவென்றால் ஸ்வான் டெலிகாம் கம்பெனிக்கு புதிதாக ஒரு வங்கிக்கணக்கு துவங்கும் விண்ணப்ப பாரத்தில், அனிலும் அவரது மனைவி(முன்னாள் நடிகை) டினா அம்பானியும் தான் கையெழுத்து போட்டிருக்கிறார்கள் ! “நீங்கள் நிறைய விஷயங்களை மறந்து போகிறீர்கள்- கொஞ்சம் நினைவு படுத்திப் பாருங்கள்” என்று நீதிபதி கூறுகிறார். அப்படியும் வழிக்கு வராததால், “பொய் சாட்சி கூறுவதன் விளைவுகள் பற்றி தெரியுமா” என்று நீதிபதி கேட்கிறார். “என் மீது வழக்கு தொடரப்படலாம். நிரூபிக்கப்பட்டால், தண்டனையும் விதிக்கப்படலாம் – நான் நன்கு அறிவேன்” என்கிறார் தொழிலதிபர் ! அவரைப் பின் தொடர்ந்து மறுநாள் சாட்சி கூறும் தர்ம பத்தினியும் “அய்யோ – கம்பெனிக்கும் எனக்கும் என்ன சம்பந்தம் – கம்பெனிகளைப் பற்றி எல்லாம் எனக்கு எதுவுமே தெரியாது. நான் சும்மா வீட்டை கவனித்துக் கொள்ளும் மனைவி மட்டுமே. என்ன – கூட கொஞ்சம் சமூக சேவையும் செய்வேன் (!). ஒரு ஆஸ்பத்திரி கூட நடத்தி வருகிறேன். 57 படுக்கைகள் உள்ள பெரிய ஆஸ்பத்திரி. நீங்கள் அவசியம் வர வேண்டும் (!!) என்று கோர்ட்டிலேயே – நீதிபதியையே அழைக்கிறார். என்ன துணிச்சலாக பதில் சொல்கிறார் பாருங்கள் – என்று சொல்கிறார் என் நண்பர் ஒருவர். துணிச்சலுக்கென்ன – பாதி மந்திரிகள் இவர் கோட் பாக்கெட்டில். மீதி மந்திரிகள் இவர் அண்ணன் கோட் பாக்கெட்டில். ஏன் வராது துணிச்சல் ? அரசாங்கத்தையே பாக்கெட்டில் வைத்திருக்கும் இவர்களைக் கண்டு தான் மற்றவர்கள் கொள்ள வேண்டும் அச்சம் ! oru suggestion – இந்தியாவில் உள்ள டாப் 100 பணக்காரர்களின் சொத்துக்கள் அனைத்தையும் அரசுடைமை ஆக்கினால் என்ன ? நம் நாட்டின் பாதி பிரச்சினைகள் தீர்ந்து விடுமே !!