ஆனந்த் ஜானை அமெரிக்க சிறையிலிருந்து
வெளியே கொண்டு வர ….
(திருமதி சுஹாசினி….கடைசி பகுதி-3)

ஆடம் என்கிற 18 வயது பெண் கோர்ட்டில்
சாட்சி சொல்லும்போது,  தனக்கு 14 வயதாகும்
போதே தான் எப்படி ஆனந்த் ஜானால்  
ஏமாற்றப்பட்டு சீரழிக்கப்பட்டார் என்பதை
உணர்ச்சி வசப்பட்டு அழுது கொண்டே சொல்லி
இருக்கிறார். “அந்த நிகழ்வுக்குப் பிறகு என்
வாழ்க்கைப் பாதையே மாறி விட்டது.
புகழ் பெற்ற மாடல் ஆக வேண்டும் என்கிற ஆசை
அடியோடு என்னை விட்டுப் போய் விட்டது.
அவ்வளவு சிறிய பெண்ணான என்னை இவ்வளவு
பெரிய மனிதன் அப்படி சிக்கவைத்து சீரழிக்க முடியும்
என்பதை நான் நினைத்துக்கூடப் பார்க்கவில்லை.
வாழ்க்கையில் என்னால் மறக்க முடியாத
ஒரு பயங்கர கனவாகி விட்டது அந்த நிகழ்ச்சி”.

இந்தப் பெண்ணின் சாட்சி ஆனந்த் ஜானின் வழக்கில்
தீர்ப்பு வழங்க மிகவும் முக்கியமான காரணமாக
இருந்தது.வழக்கு நடக்கும்போது இந்தப் பெண்,
ஆனந்த் ஜான் தரப்பிலிருந்து பெரும்
தொல்லைகளுக்கு உள்ளானாள்.
எதிரே குற்றவாளிக் கூண்டிலிருந்த ஆனந்த் ஜானை
சாட்சிக் கூண்டிலிருந்து பார்த்தபடியே
இந்தப் பெண் சீறி இருக்கிறாள்.”உன்னைப் போன்ற
ஒரு  நோயாளியால் இனிமேலும் எந்தப்
பெண்ணும் பாதிக்கப்படாமல் இருக்க நான் எவ்வளவு
துன்பத்தையும் சகித்துக் கொள்வேன்”

(குறிப்பு – இந்த விவரங்கள் அனைத்தும்,
அமெரிக்காவின் ABC news மற்றும்
கலிபோர்னியா டைம்ஸ் -ஆகியவற்றில் இருந்து
சேகரித்து தொகுக்கப்பட்டவை.அமெரிக்காவிலேயே
வசிப்பவர்களுக்கு இன்னும் அதிகம் தெரிந்திருக்கும்.)

ஆனந்த ஜான் சிறை சென்ற பிறகு, அவரது
சகோதரி சஞ்ஜனா ஜானும்,
அம்மா சசி அப்ரஹாமும் –
நியூ யார்க், துபாய் போன்ற இடங்களுக்கு
சென்று கூட்டங்களுக்கு ஏற்பாடு செய்து,
ஆனந்த ஜானின் ஆதரவாளர்களையும்,
உலகம் பூராவும் உள்ள மலையாளிகளையும்
ஆனந்த ஜான் அமெரிக்க சிறையிலிருந்து
வெளிக்கொண்டு வரப்பட உதவும்படி
வேண்டுகோள் விடுத்தனர்.

அவர்கள் தரப்பு வாதம் –

அமெரிக்க நீதி நிர்வாகம் ஒருதலைப்பட்சமாக
நடந்து கொண்டது.அவர்களுக்கு சரியான
நீதியை அளிக்கத் தவறி விட்டது.
ஆனந்த் ஜான் குற்றமற்றவர் –
ஒரு பாவமும் அறியாதவர்.
இது போட்டி கார்பரேட் நிர்வாகங்களின்  சதி.
ஆனந்த் ஜான் விடுதலை பெற –
அவர் தாயும், சகோதரியும் – தங்களால் ஆன
அனைத்தையும் செய்வார்கள்.
மும்பையிலும், நியூயார்க்கிலும் உள்ள
பேஷன் இண்டஸ்ட்ரீ  தங்களுக்கு முழு
ஆதரவையும், ஒத்துழைப்பையும் அளிக்க
உறுதி அளித்துள்ளது.

அவர்கள் மத்திய அமைச்சர் வயலார் ரவி மூலம்
இந்திய அரசுடன் தொடர்பு கொண்டிருக்கிறார்கள்.
கே.ஜே.ஏசுதாஸ் மத்தியில் உள்ள கேரளத்தைச்
சேர்ந்த அமைச்சர்களுடன்
சேர்ந்து முயற்சி செய்து வருகிறார்.
இவற்றிற்கு இன்னும் பலன் கிட்டவில்லை.

சசி அப்ரஹாம் துபாயில்
பத்திரிகையாளரிடையே கூறுகிறார் –

தான் ஆனந்த் ஜானுக்கு அன்னை மட்டுமல்ல.
அவருடன் சேர்ந்து பங்குதாரராக அமெரிக்க
பேஷன் இண்டஸ்ட்ரீயில் பல வருடங்கள்
பணியாற்றி இருக்கிறார். அமெரிக்க நிர்வாகம்,
போலீஸ் துறை, நீதித்துறை அனைத்துமே –
நிறவெறி  காரணமாக
அவர்களுக்கு அநீதி இழைத்து விட்டது.
நிர்வாகமே அவர்களுக்கு எதிராக போலி சாட்சிகளை
உருவாக்கியது. அவர்களது வக்கீல்களே
அவர்களுக்கு எதிராக இருந்தார்கள்.

(ஆனந்த் ஜானின் சகோதரி சஞ்ஜனா,
கற்பழிப்பு ரிப்போர்ட்டை(படங்களுடன்
கூடியது) கூட்டத்தில் காட்டி, காயம்
எங்கே இருக்கிறது சொல்லுங்கள் –
என்று வாதாடுகிறார் !)

பொறாமை காரணமாக வேண்டுமென்றே
ஆனந்த் ஜான் மீது குற்றம் சுமத்தப்பட்டது.
பலவந்தப்படுத்தியதற்கான ஆதாரமே இல்லை.
விருப்பப்பட்டு உறவு கொண்டு விட்டு,
பின்னர் கற்பழித்ததாக குற்றமும் சாட்டினார்கள்.
அந்தப் பெண்கள், விரும்பித்தான்
உறவு கொண்டார்கள் என்பதை
எப்படி நிரூபிக்க முடியும் ?
இதை எல்லாம் சாட்சி வைத்துக்கொண்டா
செய்வார்கள் ?
அந்த பெண்களின் தொடையையும்,
மற்ற பகுதிகளையும் தொட்டதாக குற்றச்சாட்டு.
பேஷன் துறையில்
இருப்பவர்கள் தொடாமல் வேலை செய்ய முடியுமா?

தன் மகனுக்கு பன்றி மாமிசம் பிடிக்காது.
அமெரிக்க சிறையில் பன்றி மாமிசம் கொடுத்து
சாப்பிட வற்புறுத்துகிறார்கள்.

தன்னால் சும்மா இருக்க முடியாது என்றும்
தன் மகனை வெளியே கொண்டு வர
அவர் தன்னால் இயன்ற
அனைத்தையும் செய்வார் என்றும் கூறினார்.

இதன் தொடர்ச்சியாக,
கடந்த வாரம் சென்னையில் ஆனந்த் ஜான்
குடும்பம் மற்றும் சென்னையிலுள்ள மலையாளிகள்
சங்கங்களின் ஒருங்கிணைப்பு சார்பாக ஒரு நிகழ்ச்சி
நடத்தப்பட்டது.

இந்த நிகழ்ச்சியில் –

“ஆனந்த் ஜான் – நியூ யார்க்கிலும்
மற்ற ஊர்களிலும், மீதி இருக்கும் இதர
வழக்குகளை சந்திக்க வேண்டும்.
நடந்து முடிந்த வழக்கில் அப்பீல் செய்து
வாதாட வேண்டும். அமெரிக்காவில்
வழக்கு நடத்துவது அவ்வளவு சுலபம் அல்ல.
பணம் இல்லாமல் ஒரு காரியமும் நடக்காது.
எங்களிடம் இருந்த பணம் அனைத்தையும்
செலவழித்து விட்டோம். எனவே,
ஆனந்த் ஜானுக்கு நியாயம் கிடைக்க –
(justice for anand jon)
ஒரு வலைத்தளத்தை உருவாக்குகிறோம்.
ஒரு ட்ரஸ்டையும் உருவாக்குகிறோம்.

என் மகன் எப்படியாவது வெளியே வர வேண்டும்.
அதற்கு பொருளுதவி தேவை.
பண உதவி  செய்பவர்கள் இந்த வலைத்தளத்தின்
மூலம் செய்யலாம்” –

என்று ஆனந்த்  ஜானின் அம்மா
கூறி இருக்கிறார்.

இதற்காக –

“justice for Anand Jon Trust”
என்கிற பெயரில்  ஒரு அறக்(?)கட்டளையும்,

சென்னை, பெசண்ட் நகர் ஸ்டேட் பாங்க்
கிளையில் அதன் சார்பில் ஒரு வங்கிக் கணக்கும்  
உருவாக்கப்பட்டுள்ளது.

அந்த அறக்கட்டளையை நிர்வகிக்கும்
நிர்வாகக் குழுவில் – கே.ஜே.ஏசுதாஸ்,
அவர் மகன் விஜய் ஏசுதாஸ், ஆனந்த் ஜானின்
அம்மா  சசி அப்ரஹாம்,
மற்றும் சில மலையாளிகளுடன் –

சுஹாசினியும்
ஒரு உறுப்பினராக இருக்கிறார்.

அந்த நிகழ்ச்சியில், இந்த இயக்கத்திற்கான
வலைத்தளைத்தை திருமதி சுஹாசினி துவக்கி
வைத்து பேசும்போது, ஆனந்த் ஜான்
முன்னதாக இந்தியா வந்திருந்தபோது,
தான் அவருக்காக ஒரு விருந்து வைத்ததாகவும்,
அவர் “கருணை உள்ளம் கொண்ட
ஒரு ஆன்மிகவாதி” (“kind” and
“philosophical” person )என்றும்,
ஆனந்த் ஜான் எப்படியாவது வெளியே
வர வேண்டும் என்றும் கூறி இருக்கிறார்.

திருமதி சுஹாசினி – ஒரு நடிகை மட்டுமல்ல.
ஒரு கதாசிரியர்,
வசனகர்த்தா,
ஒளிப்பதிவாளர்,
திரைப்படத்தயாரிப்பாளர்,
இயக்குநர்,
பல சமூக நிகழ்ச்சிகளில் தீவிர பங்கு ஏற்பவர் –
எல்லாவற்றிற்கும் மேலாக அவரே ஒரு விமரிசகர் !

எனவே தான் பொறுக்க முடியாமல் கேட்கிறேன் –

திருமதி சுஹாசினி – உங்களுக்கே
இது கேவலமாகத் தெரியவில்லையா ?