போதை ………

மதுவும், மங்கையும்  தரும் போதை –
வெற்றியும்,  புகழும்  – தரும்  போதை  !

வேறு எந்த தொழிலுக்கும் இல்லாத மவுசு
திரைப்படத் துறைக்கு இருக்கிறது.
காரணம் – அங்கு ஒருவன் தன்னை –
தன் திறமையை நிரூபித்து விட்டால் –
அவனுக்கு கிடைக்கிற  பணம், புகழ்,
மரியாதை, அங்கீகாரம்  (recognition ?) –

மற்றும்  –
அவை அனைத்தும் சேர்ந்து கொடுக்கும் போதை  –
இவற்றிற்கு ஈடு  இணையான சுகம்,
சந்தோஷம் – உலகில்
வேறு எந்த  தொழிலிலும்   கிடைக்காது
என்பது தானே !

ஆனால் இதில் புகழ் பெறவும், கிடைத்த
புகழை தக்க வைத்துக்கொள்ளவும் ஒவ்வொருவர்
என்ன பாடுபட வேண்டி இருக்கிறது !

40 வருடங்கள்  –
35,000  பாடல்கள்,
தமிழ், தெலுங்கு, கன்னடம், மலையாளம், இந்தி
அத்தனை மொழிகளிலும் முறிக்க முடியாத சாதனைகள் !
அத்தனையும்  ஒருவர் தன் திறமையாலும்,
கடுமையான உழைப்பாலும் சாதித்தவை.
திறமையும் உழைப்பும் மட்டும் தானா காரணம்
இந்த பணமும்  புகழும்  வந்து சேர ?

துணை நின்றவை – இனிய பழக்க வழக்கங்கள்,
அனைவரின் பாலும் அன்பு, அரவணைப்பு, நேசம்,
ஒழுக்கம், உயரத்திலும்  பணிவு.
கிடைத்த புகழை தக்க வைத்துக்கொள்ள
ஒரு தந்தை என்ன பாடு
பட்டிருப்பார் ? எவ்வளவு உழைத்திருப்பார் ?

அத்தனையையும்  எவ்வளவு சுலபமாக
நாசம் செய்து விட்டார் மகன் ?

முதல் தலைமுறை உழைப்பைக் கொடுத்து,
உயிரைக்கொடுத்து, திறமையை  நிரூபித்து –
சம்பாதித்தது அத்தனையையும் –
அடுத்த தலைமுறை
மதுவிலும் மங்கையிலும் நாசம் செய்து விட்டதே !
போனது பணம் மட்டுமா  ?
தந்தையின்  நிம்மதி, கௌரவம், புகழ், குடும்ப
உறவுகள் – அத்தனையும்  நாசம்.

கோடம்பாக்கத்தில் இன்று  எத்தனை எத்தனை
இளைஞர்கள் –
தெற்கே மதுரையிலிருந்தும்,
அதற்கும் அப்பாலிருந்தும் வந்தவர்கள் –
இருக்க இடம் இல்லாவிட்டாலும் –
பசியாற  உணவில்லா விட்டாலும் –
எப்படியாவது தனக்கு ஒரு சந்தர்ப்பம் கிடைக்காதா ?
தன் திறமையை இந்த உலகம் ஏற்று பாராட்டாதா
என்று தவித்துக் கொண்டிருக்கின்றனர் !

குடி, சூதாட்டம்,  பொய்யான காதல்,
அடுக்கடுக்கான கொலைகள் – இவற்றை கவர்ச்சியாக
காட்டி அதன் மூலம் தப்பானவர்கள் தான்
வாழ்க்கையில் சுலபமாக ஜெயிக்க முடியும் என்று
காட்ட ஒரு படம் எடுத்து, அதன் வெற்றியை
கொண்டாட – மது, மங்கையுடன் ஒரு விருந்து.
இந்த டீமை கொஞ்சம் உற்று கவனித்தால் தெரியும் –
அத்தனையும் வெள்ளிக்கரண்டியுடன் பிறந்த
பணக்காரக் கூட்டம். தந்தையோ, அவர் தந்தையோ
நல்ல வழியிலோ, கெட்ட வழியிலோ சேர்த்து வைத்த
பணம்.  பெற்றவர் பின்னணியில் துவக்கத்திலேயே
பெரிய அளவில் அறிமுகம் (பேனர் ?).  
ஆட்டம் போடுவதற்கு என்றே
தேர்ந்தெடுத்த துறை !

இதே திரையுலகில் தான்
அற்புதமான கதாபாத்திரங்களுடன்,
சிறப்பான குணசித்திரங்களுடன்,
இயற்கையான  நடப்புகளுடன் – கூடவே
சமூகத்திற்கு மிகவும் அவசியமான செய்தியையும்
அழகாக, மிக அழகாக,
மிகச்சிறப்பாக, சுவையாக,
விறுவிறுப்பாக சொல்லும்  சரவணன் என்கிற
இளைஞனையும் (எங்கேயும் எப்போதும்)  பார்க்கிறோம்.  

கடந்த இரண்டு
ஆண்டுகளில் எத்தகைய  பின்புலனும் இன்றி,
சுயமுயற்சியில் – வெறியுடன்  ஒரு அங்கீகாரத்துக்காக
உழைக்கும் இத்தகைய திறமைசாலிகள் பலரை
தமிழ்த் திரையுலகம்  வெளிக்கொண்டு வந்திருக்கிறது.

பரம்பரை பின்னணியும்,  பணவசதிகளும்
திறமைசாலிகளை  உருவாக்குவதற்கு பதிலாக –
குடிகாரர்களையும், சூதாடிகளையும் தான்
உருவாக்குகின்றனவோ என்று ஒரு அச்சம்
உருவாகிறது.

தகப்பன் சேர்த்து வைத்த பணத்தில்
கொண்டாடும் போது –
மதுவும், மங்கையும்  தரும் போதையை விட –

சுய உழைப்பில், திறமை வெளிப்படுத்தலில்,
அதன் விளைவாகக் கிடைக்கும் புகழில்,
வெற்றியில் – கிடைக்கும் போதை மிக மிக
உயர்வானது  என்பதை  –
வெள்ளிக்கரண்டியுடன் பிறந்த இளைஞர்கள்
புரிந்து கொள்ள வேண்டும்.

அது அவர்களுக்கும்  நல்லது.
சமூகத்துக்கும்  நல்லது !