………………………………..

……………………………………

……………………………………….

திப்பு சுல்தானைப்பற்றி அவதூறு பேசும் சில குழுவினரை
கடுமையாகச் சாடி,

” குப்பைகளால் சூரியனை மறைக்க முடியாது …”

என்று சொல்லி கடுங்கோபத்துடன் நடிகர், இயக்குநர்,தயாரிப்பாளர் –
ராஜ்கிரண் அவர்கள் தனது முகநூல் பக்கத்தில் ஒரு கட்டுரை
எழுதி இருக்கிறார்…. திப்பு சுல்தானைப்பற்றி, இரண்டுவித
நேர் விரோதமான கருத்துகள் அண்மையில் பரவி வருகின்ற
நிலையில் – அவசியம் படிக்க வேண்டிய ஒரு கட்டுரை அது –
அதிலிருந்து கொஞ்சம் கீழே –

……………

மாவீரர் திப்பு சுல்தான் அவர்கள் சுதந்திரப்போராட்டத்தின்
“மூலவித்து” என்பதை சரித்திரத்தில் இருந்து நீக்கும் முயற்சிகள்
தொடர்ந்து நடந்து கொண்டே இருக்கின்றன.

சூரியனை, குப்பைகளால் மூடி மறைத்து விட, ஒருபோதும் முடியாது.
மைசூரை ஆண்ட மாவீரன் திப்பு சுல்தான் இந்து-முஸ்லீம் ஒற்றுமையின் பன்முக ஆளுமையாக திகழ்ந்தவர்.

• திப்பு சுல்தான் குறித்து ‘இந்து-முஸ்லீம் ஒற்றுமையின் உருவாக்கம்’
  என்று, ‘1930 ‘யங் இந்தியா’ இதழில் மகாத்மா காந்தி
  குறிப்பிட்டுள்ளார்.
• “ஆங்கிலேயர்களுக்கு சிம்மசொப்பனமாகவும், பெரும் சவாலாகவும் இருந்தவர் திப்பு சுல்தான்” என்று ஜவஹர்லால் நேரு குறிப்பிட்டுள்ளார்.
• மஹாராஷ்டிர இந்து மன்னன், சிருங்கேரி மடத்தை கொள்ளையடித்து, அங்கிருந்த சாரதா தேவி சிலையையும் சேதப்படுத்தியதை,
  அந்த மடாதிபதி திப்பு சுல்தானுக்கு தெரியப்படுத்த,
  கேரளாவில் பிரிட்டிஷாருடன் போர் புரிந்துகொண்டிருந்த திப்பு சுல்தான்,
  தனது பாதுகாப்புப்படையை உடனே சிருங்கேரிக்கு அனுப்பி,
  மடத்திலிருந்து மஹாராஷ்டிர படைகளை விரட்டியதோடு, மடத்தை சீரமைக்கவும், சாரதா தேவி சிலையை மறுநிர்மானம் செய்யவும்
  தேவையான அனைத்து உதவிகளையும் செய்ததோடு, நிதிகளையும் வழங்கினார்.
• தென்னிந்தியாவில் தொடங்கிய முதல் விடுதலை போரின்
  நாயகர்களான கட்டபொம்மன், கோபால் நாயக்கர், மருது சகோதரர்கள்,
  வேலு நாச்சியார், தீரன் சின்னமலை, போன்ற எண்ணற்ற போராளிகளுக்கு உந்து சக்தியாய் இருந்ததோடு, ஆயுதங்களும் கொடுத்து உதவியவர்
  திப்பு சுல்தான்.
• தான், திப்புவை கண்டு அஞ்சுவதாக 1798-ம் ஆண்டு தமது கும்பினி தலைமைக்கு கடிதம் எழுதினான் கவர்னர் மார்க்வெஸ் வெல்லெஸ்லி.
• சமத்துவம், சகோதரத்துவம் சுதந்திரம் என்ற சொற்கள் இந்த நாட்டில்,
  திப்புவின் மண்ணில்தான் முதன்முதலில் ஒலித்தன.
• பாளையக்காரர்கள், ஆற்காடு நவாப், ஹதராபாத் நிஜாம்,
  தொண்டைமான் ஆகிய அனைவைரும் ஆங்கிலேயர்கள் பின்னால் நிற்க, தன்னந்தனியாக எதிரிகளை எதிர்கொண்டார் திப்பு.
• எந்த சாதி மதத்தை சார்ந்தவராக இருந்தாலும் சரி,
  உழுபவருக்கே நிலம் சொந்தம் என்று திப்பு பிரகடனம் செய்தார்.

• சென்னை மாகாணத்தை போல் அல்லாமல் மைசூர் அரசில்
  தலித் சமுதாயத்தினருக்கு பல இடங்களில் நிலஉடைமையை
  வழங்கினார் திப்பு. ஏழைகளையும், விவசாயிகளையும் சொல்லாலோ செயலாலோ துன்புறுத்த மாட்டோம் என்று வருவாய் ஊழியர்களிடம் உறுதிமொழி வாங்கினார் திப்பு.

1792 போருக்கு பின் வேலூரிலிருந்து வரிக்கொடுமை தாளாமல் 4000 விவசாயிகள் திப்புவின் அரசில் குடியேறினர். கர்நாடகத்தில் கிருஷ்ணராஜ சாகர் அணையை கட்டுவதற்காக 1798-ல் திப்புசுல்தான் அடிக்கல்
நாட்டினார். இந்துஸ்தானம் முழுவதும் 14 இடங்களில் வணிக மையங்கள்,
20 வணிக கப்பல்கள், கான்ஸ்டான்டி நோபிளில் மைசூர் அரசின்
கப்பல் துறை ஆகியவற்றை அமைக்கவும் திப்பு திட்டம் வகுத்திருந்தார்.

• மது விற்பனையை முற்றிலும் ஒழித்து மதுவிலக்கை அமல்படுத்தினார்.
• கஞ்சா விற்பனையை தடை செய்தார்.
• எல்லா சமுதாய மக்களின் ஆலையங்களுக்கும் அவர்களின் மக்கள்
  தொகைக்கு ஏற்ப, மானியம் வழங்கி, அதனை பராமரித்தும் வந்தார்.
  அநாதை இந்து சிறுமிகளை கோவிலுக்கு விற்பனை செய்யும் தேவதாசி முறையையும், விபச்சாரத்தையும் தடை செய்தார் திப்பு.
• எந்த அரசாங்க வேலையானாலும் கூலி கொடுக்காமல்
  வேலை வாங்ககூடாது என்று ஆணையிட்டார் திப்பு.
• கோவில் மணி ஓசைக்கும் பள்ளிவாசலின் பாங்கு அழைப்பிற்கும்
  சம மரியாதை தந்தார் திப்பு. நெப்போலியனை வீழ்த்திய ஆர்த்தர் வெல்லெஸ்லி கூட திப்புவின் முன் நிற்கமுடியாமல் போனது வரலாறு.

தன்னை, நாட்டின் மன்னன் என்று நினைக்காமல், “குடிமகன் திப்பு”
என்று கூறுவதில் பெருமைப்பட்டவர் திப்பு. திருக்குர்ஆனின் அத்தனை போதனைகளையும் தன் வாழ்நாளில் கடைபிடித்து வாழ்ந்து
வந்தார், திப்பு. ஆதலால், பிற மதத்தினர், இஸ்லாமிய மார்க்கத்துக்கு மாறுவதை ஆதரிக்கவில்லை. “இறைவன் நினைத்திருந்தால், எல்லா மக்களையும் இஸ்லாமியராகவே படைத்திருக்க மாட்டானா” என்றதோடு,
அவரவர் மார்க்கம் அவரவர்க்கு என்றார்.

விடுதலை போரில் சரணடைய மறுத்து, வீரத்துடன் போரிட்டு தன்னுடன்
மாண்ட 11,000 வீரர்களுள் ஒரு சாதாரண வீரனைப்போல, வீரமரணம் அடைந்தார் திப்பு சுல்தான். இந்தத்தகவல்கள் எல்லாம், புராண, இதிகாச கதைகள் அல்ல லண்டன் அருங்காட்சியகத்தில், இன்றும் போற்றிப்பாதுகாக்கப்படும் வரலாறு…

(லிங்க் – https://tamil.behindtalkies.com/rajkiran-post-about-tipu-sultan/ )

…………………………………..

ராஜ்கிரணின் இந்த முகநூல் பதிவு, என்னை – திப்புவைப்பற்றி, மேலும் நிறைய தகவல்களை தேடிப்படிக்கச் செய்தது.

நான் படித்தவற்றிலிருந்து ஏற்றுக்கொள்ளத்தக்கவை என்று கருதும்
சில தகவல்களை கீழே தந்திருக்கிறேன்.

……….
முதலில் திப்பு சுல்தான் வரலாறு —-மிகச்சுருக்கமாக –

திப்பு சுல்தான் (நவம்பர் 20, 1750, – மே 4, 1799, ),
மைசூரின் புலியென அழைக்கப்பட்டவர். 1782 ஆம் ஆண்டிலிருந்து
1799 ஆம் ஆண்டுவரை மைசூரின் அரசை ஆண்டவர்.
திப்பு சுல்தான் ஹைதர் அலியின் இரண்டாம் தாரமான ஃபாதிமாவின் மகன்.
பிரித்தானியப் படைகளுடனான இரண்டாம் ஆங்கில-மைசூர்ப் போரில் ஹைதர் அலி வெற்றி பெறுவதற்கு உறுதுணையாகவிருந்த திப்பு தனது தந்தையின் மரணத்திற்குப் பின்னர் மைசூரின் மன்னரானார்.

ஆங்கிலேயர்களை இந்தியாவை விட்டு அகற்றுவதற்காகப்
பிரான்சின் மாவீரன் நெப்போலியனுடன் பேச்சுவார்த்தை கூட
நடத்தினார். மூன்றாம் மற்றும் நான்காம் ஆங்கில-மைசூர்ப் போர்களில் பிரித்தானிய அரசினாலும் அதன் கூட்டுப் படைகளினாலும் தோற்கடிக்கப்பட்டார். மே 4, 1799 ஆம் ஆண்டு தனது ஆட்சித்
தலைநகரமான ஸ்ரீரங்கப்பட்டினத்தில் போரின்போது இறந்தார்.
………….

உண்மையில், ஆங்கிலேயரை எதிர்த்து அதி தீவிரமாக போராடிய
முதல் சுதேசி மன்னன் திப்பு சுல்தான் தான்…

“கிழக்கிந்திய கம்பெனியின் குலை நடுக்கம் ” திப்புவின் மைசூர்
அரசைப் பார்த்து லண்டன் பத்திரிகைகள் வியந்து எழுதின.

“ஆம் நான் அவனைக்கண்டு அஞ்சுகிறேன். அவன் நாமறிந்த
மற்ற இந்திய மன்னர்களைப் போன்றவன் அல்ல. மற்ற மன்னர்கள்
மத்தியில் இவன் ஏற்படுத்தும் முன்னுதாரணத்தை கண்டும்
நான் அஞ்சுகிறேன். ஆனால், அவனைப் பின்பற்றும் தகுதியில்லாத கோழைகளாக மற்ற மன்னர்கள் இருப்பது நம் அதிர்ஷ்டம்”.
என்று லண்டனுக்கு கடிதம் எழுனார் கவர்னர் வெல்லஸ்லி…!!!

திப்புவால் தான் போர்களில் பயன்படுத்தும் – “ஏவுகணை” உலகிலேயே
முதன் முதலில் அறிமுகப்படுத்தப்பட்டது – என்று பெருமையோடு
சொன்னார் நமது பெருமதிப்புற்குரிய மறந்த ஜனாதிபதி
அப்துல் கலாம் அவர்கள்.

மைசூர் ஏவுகணைகள் – திப்பு சுல்தானின் ஏவுகணைத் தொழில்நுட்பமே பிற்கால பிரிட்டிஷாரின் ஏவுகணைத் தொழில்நுட்பத்தின் முன்னோடி.

இலண்டன் அருகில் ஊல்ரிச் எனும் ஊரில் உள்ள ரோதுண்டா அருங்காட்சியகத்தில் திப்பு சுல்தான் பயன்படுத்திய ஏவுகணைகள் வைக்கப்பட்டுள்ளன. இவற்றைப் பார்க்க இந்தியாவின் முன்னாள்
குடியரசுத் தலைவர் அப்துல் கலாம் முயற்சி எடுத்துக்கொண்டார்.
உலக அளவில் முதல் இராணுவ ஏவுகணைகள் அவையே என்பதையும் பிற்காலத்தில் பிரிட்டிஷார் ஆய்வு நடத்தி அவற்றைத் திருத்தியமைத்துப் பயன்படுத்தியதையும், மேலும் இது இந்தியாவில் திப்பு சுல்தானின்
சொந்த தொழில்நுட்பம் என்பதையும், பிரெஞ்சு நாட்டினரிடமிருந்து
கற்றது அல்ல என்பதினையும் சர் பெர்னார்டு லோவல் எனும்
பிரபல பிரிட்டிஷ் விஞ்ஞானி எழுதிய ’விண்வெளி ஆராய்ச்சிகளின்
தோற்ற மூலங்களும், பன்னாட்டுப் பொருளாதாரங்களும்
(The Origins and International Economics of Space Explorations) எனும் நூலின் உதவியோடு அப்துல் கலாம் நிரூபிக்கிறார்…

திப்பு சுல்தானை இந்துக்களின் விரோதியாக சித்தரிப்பதை
கீழ்க்கண்ட உதாரணங்கள் மறுக்கின்றன –

திப்பு, தனது அரசில், திறமையான இந்து அதிகாரிகள் பலரை
நியமித்திருந்தார்….

திப்பு சுல்தானின் பொருளாளராகக் கிருஷ்ணா ராவ் என்பவரும்,
ஷாமையா ஐயங்கார் அவரது தபால் மற்றும் காவல்துறை அமைச்சராகவும், அவரது சகோதரர் ரங்கா ஐயங்கார் ஒரு அதிகாரியாகவும்,
பூர்ணையா என்பவர் “மிர் அசாஃப்” எனும் மிக முக்கியமான
பதவியையும் வகித்தனர். மேலும், மூல்சந்த் மற்றும் சுஜன் ராய் அவரது தலைமை முகவர்களாக இருந்தனர், மேலும் அவரது “பெஷ்கர்”
தலைவரான சுபா ராவும் என்பவரும் ஒரு இந்துவாக இருந்தார்…

……………..

1930 ஆம் ஆண்டு யங் இந்தியாவில் -காந்தியால் எழுதப்பட்ட
ஒரு கட்டுரை கூறியது:
“மைசூர் ஃபதேஹலி திப்பு சுல்தான், தனது இந்து குடிமக்களை
ஒடுக்கி அவர்களை வலுக்கட்டாயமாக இஸ்லாத்திற்கு மாற்றிய
வெறியராக வெளிநாட்டு வரலாற்றாசிரியர்களால்
குறிப்பிடப்படுகிறார். ஆனால் அவர் அப்படி இல்லை.
மறுபுறம், அவரது இந்து குடிமக்களுடன் அவரது உறவுகள் முற்றிலும் இணக்கமான இயல்புடையவை.

….

திப்பு சுல்தானைப்பற்றிய எதிர்ப்பு பிரச்சாரங்கள்
தேவையற்றவை,
அரசியல் காரணமாக எழுப்பப்படுபவை –
என்றே நான் நினைக்கிறேன்.

.
………………………………………………..