…………………………………….

…………………………………….

வாசக நண்பர் – bandhu …கேள்வி –

கேள்வி பதில் பகுதியை வரவேற்கிறேன்.
என் மனதில் நெடுநாளாய் துருத்திக்கொண்டிருக்கும் கேள்வி.

நாமெல்லாம் ஒரு வேலைக்கு சென்றோ
பிசினெஸ் செய்தோ வருமானம் ஈட்டி பிழைக்கிறோம்.
அதே சமயம் அரசியல்வாதி என்பவருக்கு பதவிக்கு
வந்ததும் தான் சம்பளம் என்று ஒன்று கிடைக்கிறது.
அதுவரை கட்சி சம்பளமாக கொடுப்பது எதுவும்
கிடையாது. அப்படி இருக்கும்போது, அரசியல்வாதிகள்
நேர்மையாக இருக்கவேண்டும் என்ற எதிர்பார்ப்பு எப்படி சரி?
By Design, அவர்கள் ஊழல் செய்துதான்
பிழைக்கவேண்டியிருக்கிறது! இந்த predicament-ஐ
சரி செய்வது எப்படி?
…………………………

ஜூனியர் பதில் –

தொழில், வருமானம், பிழைப்பு- ஆகியவற்றோடு அரசியலை சம்பந்தப்படுத்துவதால் உங்களுக்கு இந்த கேள்வி வருகிறது….
அரசியல் எப்படி பிழைப்பு என்று ஆகும்….?

வருமானத்திற்காக அரசியலை தேர்ந்தெடுப்பது சரி
என்கிற இந்த மாதிரி எண்ணம் ஏன், எப்படி – உருவானது….?

இந்த கேள்வி உங்களிடம் உருவாக அடிப்படை காரணம்,
இந்த நடைமுறையை நீங்களும், உங்களைப்போல் மக்களில்
பெரும்பாலோரும் ஏற்றுக்கொண்டு விட்டது தானே…?

1967-க்கு முன்னால், அரசியலுக்கு வந்தவர்கள்,
பிழைப்புக்காகவா வந்தார்கள்…?

1947-ல் சுதந்திரம் பெறும் முன்னர் அரசியலில் இருந்தவர்கள்
பிழைப்பிற்காகவா அரசியலுக்கு வந்தார்கள்…?

நடைமுறையை மாற்ற நம்மைப் போன்றவர்கள் முயற்சிக்க
வேண்டும்…நியாயமானவர்கள், நேர்மையானவர்கள்
அரசியலில் ஈடுபடத் தூண்ட வேண்டும்… ஆதரிக்க வேண்டும்.

” இது இப்படித்தான் இருக்கும் –
By Design, அவர்கள் ஊழல் செய்துதான்
பிழைக்கவேண்டியிருக்கிறது “
என்று நினைத்து போய்விடக் கூடாது….

……………………………………………

வாசக நண்பர் புதியவன் கேள்வி –

கா.மை. சார் என்ன சொல்கிறார் என்று பார்க்க
எனக்கும் ஆசைதான். இதற்கு ஒரு துணைக்கேள்வி
எனக்கு உண்டு.

நாமெல்லாம் நல்ல வேலை கிடைக்கும் என்று எல்.கே.ஜி
முதல் முதலீடு செய்து (நம்ம பெற்றோர் செய்கிறார்கள்)
படிக்கிறோம். பல்வேறு தேர்வுகள் எழுதி அரசு
வேலையைக் கைப்பற்றுகிறோம் (நான் சொல்வது லஞ்சம்
கொடுக்காமல் வாங்கும் வேலை). அப்புறம் நாம் எப்படி
நேர்மையாக இருப்போம்? அதாவது வேலை கிடைக்கும்
வரை நாம் பணம் செலவழித்திருக்கிறோம், நல்ல வேலை
கிடைக்கும் என்ற நம்பிக்கையில். அப்புறம் எப்படி
நேர்மையாக இருப்போம்? அதிலும் லஞ்சம் கொடுத்து
வேலை பெற்றால், சுத்தமாகவே ஊழல் செய்துதான்
சம்பளத்துக்கு அதிகமாக கிம்பளம் பெறவேண்டும்.

ஜூனியர் பதில்-

உங்களுக்கும் அதே வியாதிதான்…
ஒரு நல்ல அரசு வேலை கிடைக்கும் வரை, அதற்காக செலவு செய்த
பணத்தை லஞ்சம் வாங்காமல் வேறு எப்படி சம்பாதிப்பது என்று கேட்கிறீர்கள்…!!!

ஏன் – அரசு வேலை ஒன்று தான் பிழைக்க வழியா…?
வேறு தொழில்கள், வியாபாரம், விவசாயம், உடலுழைப்பு,
கணிணி, பொறி இயல், மருத்துவம் என்றெல்லாம் இல்லையா…?

படிப்பு – என்பது ஒரு மனிதனை, சமுதாயத்தில், ஒரு விதத்தில், தகுதியுள்ளவனாக ஆக்க உதவும் ஆரம்ப படிக்கட்டுகள்..
அதன் பின்பு, தன் படிப்பை, தன் அறிவை, தன் உழைப்பை –
மூலதனமாக்கி -நேர்மையான வழியில் பணம் ஈட்டிப் பிழைப்பது
தான் சரியான வழி அல்லவா…?

அது சரி …. அரசு வேலை என்றாலே லஞ்ச வரும்படி என்று நீங்கள்
முடிவுக்கு வருவது சரியா..? நான் 39 ஆண்டுகள் அரசுப் பணியில்
இருந்தவன்…. என் 19-வது வயதிலிருந்து 59-வயதில் வி.ஆர்.எஸ்.
வாங்கும் வரை கடனில் தான் இருந்தேன்…. நான் ரிடையர் ஆன அன்று
கூட, எனக்கு 1.30 லட்சம் ரூபாய் கடன் இருந்தது… ரிடையர்மெண்ட் பணம்
வந்த மறுநாள் தான் நான் 40 ஆண்டுக்கால கடன் வாழ்விலிருந்து
விடுதலை பெற்றேன்….
ஆனாலும் நான் – 5 காசு கூட லஞ்சம் வாங்கியதில்லையே….?
லஞ்சம் வாங்காமல் நேர்மையாக உழைக்கும் நிறைய பேரை நான் அறிவேன்.
அப்படிப்பட்ட பல ஆயிரக்கணக்கான மனிதர்களோடு நான் பணியாற்றி இருக்கிறேன்.

நல்லவர் – கெட்டவர் எந்த துறையில் தான் இல்லை…?
ஏன் நீங்கள் பணிபுரிந்த துறையில் இல்லையா….?

மாற்றப் பாருங்கள்…. சமுதாயத்தை…
நாமெல்லாம் சேர்ந்தது தான் இந்த சமுதாயம்….
ஆளுக்கு 5 பேரையாவது மாற்றுவோமே…
( என் பங்குக்கு நிறைய செய்திருக்கிறேன்…)

……………………………………………….

வாசக நண்பர் bandhu -கேள்வி –

இன்றைய தேதியில் கொள்கைகளுக்காகவோ,
கரிஸ்மாவுக்காகவோ, திறமையான பேச்சுக்காகவோ
யாரும் எந்த கட்சி கூட்டங்களுக்கும் யாரும் போவதில்லை.
இருநூறிலிருந்து ஐநூறு ரூபாயும், பிரியாணியையும்,
க்வார்ட்டரையும் கொடுத்து தான் எல்லோருமே.
மக்களை கட்சி கூட்டங்களுக்கு கூட்டி வருகிறார்கள்.
இந்த வாரம் மட்டும் திமுக 70 பொதுக்கூட்டங்களை
நடத்தியதாக சொல்கிறது. பேச்சாளர்கள் எல்லோருக்கும்
பணம் கொடுக்கப்படுகிறது. குறைந்த பட்சம் ஒரு
கூட்டத்துக்கு ஐந்து முதல் பத்து லட்சங்கள் செலவாகும்.
அப்படி பார்த்தால் ஒரு வருடத்துக்கு ஏகப்பட்ட பணம்
செலவாகும். இவ்வளவு பணத்தை கொட்டி நடத்தப்படும்
கட்சி நேர்மையாக இருப்பதற்கு சாத்தியம் இருக்கிறதா?

ஜூனியர் பதில் –

புதன் கிழமை, ஸ்ரீரங்கத்தில் பாஜக அலுவலகம் புதிதாக திறக்கப்பட்டது.
அதையொட்டி 3-4 கி.மீட்டர் ஊர்வலம் ஒன்று நடந்தது. அதில், தான்
போய் கலந்து கொண்டு வந்ததாகவும், அதற்காக 100 ரூபாய் பணமும்,
ஒரு பிரியானி பொட்டலமும் கிடைத்ததாக எங்கள் வீட்டில் பணி புரியும்
பெண்மணி சொன்னார்…
இதை எப்படி எடுத்துக் கொள்வது…..?
பணம் பண்ணாத அரசியல் கட்சி இன்றைய தினம் இந்தியாவில்
எதுவுமே இல்லை… யாருமே தூயவர்கள் இல்லை…
யாருமே முழு யோக்கியர் இல்லை. பர்செண்டேஜ் மாறலாம்…அவ்வளவே.

அது மாநில …………..தி-யாக இருந்தாலும் சரி.
மத்திய …………….ஜி- யாக இருந்தாலும் சரி…

தேர்தல் சட்டங்களில் நிறைய மாற்றங்களை கொண்டு வந்தால்,
இதை கொஞ்சம் திருத்த முடியும்….
எனக்கே நிறைய யோசனைகள்உண்டு…. ஆனால், யார் கேட்பார்கள்…?
மற்றொரு டி.என்.சேஷன் எப்போது வருவார்….?

…………………………………………..

ஒரு வாசக நண்பர் –

வள்ளுவர், மற்றும் இந்து மத சம்பந்தமான எவரையும்
‘மதச்சார்பற்றவர்கள்’ என்ற ஜாடியில் ஏன் அடக்க
நினைக்கிறார்கள்? கிறித்துவரான வைரமுத்துவுக்கு
திருவள்ளுவர் இந்துமதம் என்று ஒத்துக்கொள்வதில்
என்ன பிரச்சனை இருக்கமுடியும்? இதிலெல்லாம்
வெளிநாட்டுச் சதி இருப்பதாக நீங்கள் நினைக்கவில்லையா
(உங்கள் பதில் வந்த பிறகு ஆதாரம் தருகிறேன்)

‘மதச்சார்பற்ற’ என்றால் என்ன அர்த்தம்? இந்திய அரசியலில்
இதைப் போன்று, அர்த்தமற்ற வார்த்தைகளை வைத்து
அரசியல் செய்வதை நீங்கள் எப்படி நினைக்கிறீர்கள்?

ஜூனியர் பதில் –

கிறித்துவரான(???) வைரமுத்துவுக்கு திருவள்ளுவர் இந்துமதம் என்று ஒத்துக்கொள்வதில் என்ன பிரச்சனை இருக்க முடியும்?
திருவள்ளுவர் வாழ்ந்தது நிச்சயம் கிறிஸ்தவம் தோன்றுவதற்கு
முன்னர் தான். இந்த மாதிரி நபர்கள் இப்படி பேசும்போது,
செய்தியாளராக இல்லாமல், பொதுஜனங்களில் ஒருவராக
அங்கே இருந்தாலும் கூட- பொட்டில் அடித்தாற்போல் எதிர்க் கேள்வி
கேட்க வேண்டும்…. அன்று பொதுமக்கள் வாய்மூடி மவுனம்
சாதித்ததால் தான் கோவில் எதிரிலேயே-
” கடவுளை நம்புபவன் முட்டாள் ” என்று எழுதி,
போலீஸ் காவலுடன் சிலையும் வைக்க முடிந்தது.
உடனுக்குடன் ரீ-ஆக்ட் செய்ய வேண்டும்….
யாராக இருந்தாலும் சரி. முதலில் 4 பேர் ஆரம்பித்தால், பிறகு
அது 40 ஆகவும், 4000 ஆகவும் மாற அதிக காலம் பிடிக்காது.

(பின் குறிப்பு – இதிலெல்லாம் வெளிநாட்டுச் சதி இருப்பதாக நீங்கள் நினைக்கவில்லையா..? (உங்கள் பதில் வந்த பிறகு ஆதாரம் தருகிறேன் – )

• பதில் வந்துவிட்டது… உங்களிடம் இருக்கும் ஆதாரங்களை எனக்கு அனுப்பலாம்…!!!)

‘மதச்சார்பற்ற’ என்றால் என்ன அர்த்தம்?

எனது புரிதலின்படி,
இந்திய அரசியல் சட்டத்தின்படி,
மதச்சார்பற்ற என்றால் –
“அனைத்து மதங்களையும் ஒரே நிலையில் பார்ப்பது”
என்பது தான் சரியான நிலையாகும்.

அதாவது, அரசாங்கம் எந்தவொரு தனிப்பட்ட மதத்திற்கும்
ஆதரவாகவோ – அல்லது எதிராகவோ,
பாரபட்சத்துடன் இயங்கக்கூடாது.

இந்தியாவில், சில( மாநில/மத்திய) அரசுகள் – இதை,
அரசு நாத்திக அரசாக இருக்க வேண்டுமாக்கும் என்று அபத்தமாக
புரிந்துகொண்டு இயங்கின. உண்மை அர்த்தம் அதுவல்ல.
( அதன் விளைவே பாஜக ஆட்சிக்கு வந்தது…!!! )

• உண்மை அர்த்தம் அனைவரும் அவரவர் விரும்பும் மதத்தை
  அடுத்தவருக்கு தொல்லையாக இல்லாத விதத்தில்
  பின்பற்றி வாழலாம்…
  –
• அரசு இயந்திரம், அனைத்து மதங்களுக்கும் ஆதரவாக,
  அனைத்து மதத்தினரும் நல்லுறவுடன் வாழ
  உதவியாக, ஆதரவாக இருக்க வேண்டும் என்பதே.

( நண்பர்கள் கேள்விகளை அனுப்பி வைக்க வேண்டிய முகவரி –
kavirimainthan@gmail.com ) (இன்னமும் பதில் வராத நண்பர்களுக்கு – தயவுசெய்து கொஞ்சம் காத்திருங்களேன்…….)

.
………………………………………………………………………………………………………………….…..