ஸ்விஸ் அரசு அறிவித்துள்ள ஒரு முக்கியமான முடிவு
பற்றியும், அதன் தொடர் நிகழ்வுகளையும் பற்றிய
ஒரு செய்தி கீழே –

இந்த செய்தியைப்பற்றி வாசக நண்பர்கள் என்ன நினைக்கிறார்கள்
என்று அறிந்து கொள்ள விரும்புகிறேன்….

………………………….

தற்கொலை மெஷின்: இதில் படுத்தால் ஒரே நிமிடம்தான்.,
வலியில்லா மரணம் உறுதி- சட்டப்பூர்வ அனுமதி அளித்த நாடு! Published: Wednesday, December 8, 2021,

ஒரு நிமிடத்தில் வலியற்ற மரணம் வழங்கும் தற்கொலைக்கு
உதவும் இயந்திரத்துக்கு சுவிட்சர்லாந்தில் சட்டப்பூர்வ அனுமதி அளிக்கப்பட்டுள்ளது.

இதில் குறிப்பிடத்தக்க அம்சம் எனனவென்றால்
இயந்திரத்தை பயன்படுத்துபவர் லாக்-இன் சிண்ட்ரோம் நோயால் பாதிக்கப்பட்டிருந்தால்

கண் இமைப்பதன் மூலம் கூட இந்த
இயந்திரத்தின் உள் இருந்து இயக்க முடியும்.

வலியற்ற மற்றும் அமைதியான மரணம்…

ஒரு நிமிடத்திற்குள் வலியற்ற மற்றும் அமைதியான மரணத்தை
உறுதியளிக்கும் சவப்பெட்டி வடிவ கேப்ஸ்யூல்-க்கு, சுவிட்சர்லாந்தில்
சட்டப்பூர்வ மதிப்பாய்வுக்கு ஒப்புதல் அளித்துள்ளதாக அதன்
தயாரிப்பாளர்கள் கூறினார். ஆஸ்திரேலியாவை சேர்ந்தவர் டாக்டர்
பிலிப் நிட்ச்கே. இவர் பிரபலமான கருணைக்கொலை ஆர்வலர்
ஆவார். இவர் சில ஆண்டுகளுக்கு முன்பு தற்கொலை இயந்திரத்தை கண்டுபிடித்தார்.

ஆக்ஸிஜனை ஒரு முக்கியமான நிலைக்கு
குறைப்பதன் மூலம் இதில் படுப்பவர்களை ஹைபோக்ஸியா மற்றும்ஹைபோகாப்னியா மூலம் மரணம் ஏற்பட செய்கிறது.

சார்கோ கேப்சூல் என அழைக்கப்படும் இயந்திரம்

இந்த 3டி பிரிண்ட் இயந்திரம் ஆனது சார்கோ கேப்சூல் என
அழைக்கப்படுகிறது. இந்த இயந்திரத்தை எக்சிட் இன்டெர்நேஷனல்
நிறுவனம் உருவாக்கி இருக்கிறது. இதில் குறிப்பிடத்தக்க விஷயம் என்னவென்றால்

இந்த இயந்திரத்தை எங்கு வேண்டுமானாலும்
எடுத்து செல்லலாம் என்பதாகும். இந்த இயந்திரத்தை பயன்படுத்தும்
நபர் லாக்-இன் சிண்ட்ரோம் நோயாளியாக உடலில் உள்ள
அனைத்து தசைகளும் முற்றிலும் செயலிழந்த நிலையில் இருந்து
பேச முடியாத சூழலில் இருக்கும் போதிலும் கண் சிமிட்டுவதன்
மூலம் கூட இந்த இயந்திரத்தை இயக்க முடியும் என
இன்டிபென்டன்ட் யுகே குறிப்பிட்டுள்ளது.

டாக்டர் டெத் என்று அழைக்கப்படும் இயந்திரம் ( மாறாக, இதற்கு DOCTOR RELIEF (நிவாரணம் ) என்று பெயர் வைத்திருக்கலாம்….

இந்த இயந்திரத்தை எங்கு வேண்டுமானாலும் எடுத்து செல்லலாம்,
இந்த கேப்ஸ்யூல் மக்கக்கூடிய வகையில் வடிவமைக்கப்பட்டுள்ளது.
இதில் படுத்திருப்பவர்கள் உயிரிழந்ததும் இந்த கேப்ஸ்யூலை
அப்படியே சவப்பெட்டியாக பயன்படுத்தலாம். . டாக்டர் டெத் என்று
அழைக்கப்படும் இந்த இயந்திரத்தை எக்ஸிட் இன்டர்நேஷனல்
என்ற லாப நோக்கற்ற அமைப்பின் இயக்குனரான டாக்டர் பிலிப்
நிட்ச்கே பின்னணியில் இருந்து தயாரித்துள்ளார்.

சுவிட்சர்லாந்தில் கடந்த ஆண்டு 1300 பேர் “உதவி தற்கொலை”
மூலம் இறந்திருக்கின்றனர் என இயந்திரத்தை உருவாக்கிய எக்சிட் இன்டர்நேஷனல் தெரிவித்துள்ளது.

பட்டனை அழுத்தினால் என்ன நடக்கும்

இந்த இயந்திரத்தின் செயல்பாடு குறித்தும் விளக்கம் அளிக்கப்பட்டுள்ளது.
இந்த இயந்திரத்தின் உள்ளே சென்று படுத்துக் கொள்ள வேண்டும்.
அதன்பின் இந்த இயந்திரம் அவர்களிடம் கேள்விகள் கேட்குமாம்.
கேள்விகள் விவரங்கள் தெரியவில்லை. இந்த கேள்வி டாஸ்க்
முடிந்ததும். அதில் இருக்கும் பட்டனை அழுத்த வேண்டும்.
இந்த பட்டனை அழுத்திய சில விநாடிகளில் நாம் நமது இல்லை.

இந்த பட்டனை அழுத்தினால் என்ன நடக்கும் என்ற கேள்வி வரலாம்.
இந்த பட்டனை அழுத்தியதும் உட்புறத்தில் முழுவதும் நைட்ரஜன்
நிரப்பப்படுகிறது. இதன்மூலம் ஆக்ஸிஜன் அளவு 21 சதவீதத்தில்
இருந்து 1 சதவீதமாக குறைக்கப்படுகிறது. அடுத்த சில விநாடிகளில்
சுயநினைவை இழந்து கோமாவுக்கு அழைத்து செல்லப்படுகிறது.
அடுத்த சில நிமிடத்தில் உயிர் பிரிந்துவிடும்.

சட்டப்பூர்வ அனுமதி

இந்த இயந்திரத்துக்கு சட்டப்பூர்வ அனுமதி வழங்கப்படுகிறது.
ஹைபோக்ஸியா மற்றும் ஹைபோகாப்னியா, ஆக்ஸிஜன் மற்றும்
கார்பன் டை ஆக்சைட் குறைவை ஏற்படுத்தி இறப்பை சந்திக்க
செய்கிறது. கருணைக் கொலை என்ற வார்த்தை
கேள்விப்பட்டிருப்போம் அதற்கு சுவிட்சர்லாந்து அரசு இந்த
இயந்திரத்தை பயன்படுத்த அனுமதி வழங்கி இருக்கிறது.

இந்த இயந்திரம் தயாரித்ததற்கு நிட்ச்கே எதிர்மறையான
எதிர்விளைவுகளை பெற்றுள்ளார். இது ஒரு புகழ்பெற்ற எரிவாயு
அறை எனவும் சிலர் குறிப்பிட்டதாகவும் இன்டிபென்டன்ட் செய்தி வெளியிட்டுள்ளது.

இந்தியாவில் தற்கொலை சட்டபூர்வமாக அனுமதிக்கப்படவில்லை.

ஆனால், சில நாடுகளில் தற்கொலைக்கு சட்டப்பூர்வமாக அனுமதி வழங்கப்படுகிறது.

இதை கருணைக் கொலை என்றும் கூறலாம்.
மோசமான நோயால் பாதிப்படைந்தவர்கள், கடும் வலி, தீராத நோய்
என்ற நிலையில் இருப்பவர்கள் தற்கொலை செய்து கொள்ள
சில நாடுகள் அனுமதி வழங்குகின்றன. இதில் ஐரோப்பிய நாடுகளில்
ஒன்றாக இருக்கும் சுவிட்சர்லாந்த் தற்கொலை செய்து கொள்ள
சட்டப்பூர்வமாக அனுமதி வழங்குகிறது.

சவப்பெட்டி வடிவ கேப்ஸ்யூல்

சவப்பெட்டி வடிவ கேப்ஸ்யூல் பயன்படுத்தி வலியற்ற மரணம்
என்பதற்கு நிறுவனம் தயாராகி உள்ளது. இயலாதவர்களுக்கு
வலியற்ற மற்றும் அமைதியான மரணத்தை வழங்க இந்த இயந்திரம்
வழிவகுக்கிறது. வினாடிகள் கணக்கில் உள்ளே இருப்பவர்களை
செயலிழக்கச் செய்து நிமிடக் கணக்கில் அவர்களின் உயிரை எந்த
வலியும் இன்றி அமைதியாக பிரித்தெடுக்கிறது.

…………………………………………

பின் குறிப்பு – என் கருத்து என்ன என்று கேட்பவர்களுக்கு –

நான் இதை மனப்பூர்வமாக வரவேற்கிறேன்…
தீராத வலியாலும், குணப்படுத்த முடியாத நோயாலும்,
நரக வாழ்க்கை வாழ்ந்து கொண்டிருப்பவர்களுக்கு –
இது ஒரு விடியல்…. அமைதியான மரணம் அவர்களுக்கு
எல்லா வேதனைகளிலிருந்தும் நிவாரணம் அளிக்கும்.

இதற்காக எல்லாரும் ஸ்விட்சர்லாந்து போக முடியாது.
எனவே, நம் நாட்டிலும், இந்த மாதிரி ஒரு நிவாரண முறையை
அமலுக்கு கொண்டு வருவது பற்றி யோசிக்க வேண்டும். இதை தற்கொலை என்று வகைப்படுத்துவதே தவறு….வலியாலும், தீராத நோய்களாலும் துன்பத்தில் துடித்துக் கொண்டிருப்பவர்களுக்கு அளிக்கப்படும் நிவாரணம் என்று தான் சொல்லப்பட வேண்டும்.

.
………………………………………………..