” க்ரிப்டோ கரன்ஸி ” பற்றி உங்களுக்கு தெரியுமா…?
அதை தெரிந்து கொள்ள வேண்டும் என்கிற ஆர்வம் உண்டா…?

இந்த இரண்டுக்கும் “இல்லை” என்பது உங்கள் பதிலானால்,
நீங்கள் கொடுத்து வைத்தவர்…. அப்படியே இருந்து விடுங்கள்.

ஓரளவு அதைப்பற்றி கேள்விப்பட்டு, தன்னிடம் இருக்கும்
சேமிப்பை அதில் போட்டு, பெருக்க முடியுமா என்று
நப்பாசையில் துடிப்பவர்கள், அந்த வலையில் வீழ்ந்து –
தங்களிடம் இருக்கும் கொஞ்ச பணத்தையும் இழந்து விடாமல்
காப்பாற்றிக் கொள்ள இந்த இடுகை தரும் தகவல்கள் ஓரளவு
உதவுமென்று நம்புகிறேன்.

……………………

கிரிப்டோகரன்சிகள் என்றால் என்ன?
அவற்றில் முதலீடு செய்யலாமா?

உலகில் இறையாண்மை பெற்றுள்ள நாடுகள்தான்
செலாவணிகளாக நோட்டுகளையும் காசுகளையும் அச்சிட
முடியும். ஆனால், அதற்கு மாற்றாக தனியார் உருவாக்கியுள்ள

செலாவணிதான் கிரிப்டோகரன்சி எனப்படுகிறது.

ரூபாய் நோட்டுகள் என்பவை வெறும் காகிதங்கள். ஆனால்,
அவற்றுக்கு மதிப்பு எப்படி வருகிறதென்றால், அரசு என்ற
அமைப்பின் மீது உள்ள நம்பிக்கையால்தான் வருகிறது.
புழக்கத்தில் உள்ள ரூபாய் நோட்டுகளுக்கு இணையாக
ரிசர்வ் வங்கியில் தங்கம் இருக்கிறது என பெரும்பாலான
மக்கள் கருதுகிறார்கள்.

ஆனால் அவ்வாறில்லாமல் –
நாடுகள் தங்கள் விருப்பம்போல நோட்டுகளை அடிக்க
ஆரம்பித்துவிட்டன. அமெரிக்காவிலும் அதுதான் நடக்கிறது.

இந்த நிலையில்தான், சிலர் ஒன்று சேர்ந்து, கிரிப்டோ
கரன்சியை உருவாக்கினார்கள். நாடுகள் எந்த அடிப்படையான
ஆதாரமும் இல்லாமல் பொறுப்பற்ற வகையில் நோட்டுகளை
அடித்துத் தள்ளுவதால் அதற்கு மதிப்பில்லாமல் போவதாகக்
கூறி இந்த செலாவணியை உருவாக்கினார்கள். இதற்கு
பிளாக் செயின் என்ற கம்ப்யூட்டர் தொழில்நுட்பம்
பயன்படுத்தப்படுகிறது.

இந்த கிரிப்டோகரன்சியில் மிக முக்கியமான விஷயம்,
அது மிகக் குறைந்த எண்ணிக்கையில்தான் இருக்கும். புதிய

கிரிப்டோகரன்சிகளை டேட்டா மைனிங் செய்து எடுப்பது
செல்லச்செல்ல கடினமாகிக்கொண்டே போகும்.

சென்னையில் ஒரு யூ டியூப் சேனலில் பணியாற்றியவர்கள்,
அதன் உரிமையாளருக்குத் தெரியாமல் மிக விலை உயர்ந்த
சக்திவாய்ந்த கம்ப்யூட்டர்களை வாங்கி, ஒரு பிட்காயினை
மைனிங் செய்துவிட்டார்கள்.

ஆனால், அடிப்படையில் பிட்காயின் போன்ற கிரிப்டோ
கரன்சிகளுக்கென எந்த மதிப்பும் கிடையாது. அவை மிகக்
குறைந்த எண்ணிக்கையில் இருக்கின்றன என்பதுதான்
அவற்றின் ஒரே மதிப்பு.

ஒரு நாள் கிரிப்டோ கரன்சிகள் தான் உலகை
ஆளப்போகின்றன என்று சொல்லி நம்மை நம்பவைக்கிறார்கள்.
அதானால் தான் இவற்றின் மதிப்பு ஏறிக்கொண்டே போகிறது.

( ஏமாறத் தயாராக இருக்கும் வரை –
ஏமாற்றுபவர்களும் இருக்கத்தானே செய்வார்கள்…)

பிட் காயினுக்குக் கிடைத்த வெற்றியால் பலரும் இது
போன்ற கிரிப்டோ கரன்சிகளை உருவாக்க ஆரம்பித்தார்கள்.
ஈதரம் என ஒரு கிரிப்டோகாயின் உருவாக்கப்பட்டது.
இதற்குப் பிறகு ஈலோன் மஸ்க் ஒரு கிரிப்டோவை
உருவாக்கினார். இப்போது ஆயிரக்கணக்கில் கிரிப்டோ
கரன்சிகள் வந்துவிட்டன.

இன்றைய தின – க்ரிப்டோ கரன்சிகளும் அவற்றின்
(பொய்) விலை மதிப்பும் –

பிட்காயின் – 42,212 டாலர்
எதிரியம் – 2,906.30 டாலர்
ரிப்பிள் – 0.9177 டாலர்
கார்டானோ – 2.09 டாலர்
போல்காடாட் – 27.45 டாலர்
டோஜ்காயின் – 0.199 டாலர்

( மேலே புகைப்படங்களில் இருக்கும் அத்தனையும்
ஏமாற்றுவேலை – பிட்காயின்’கள் எதற்குமே உண்மையாக
உருவம் என்று ஒன்றும் கிடையாது….(ஆண்டவன் மாதிரி –
அவரவரவருக்கு பிடித்த வடிவத்தில், உருவாக்குபவர்கள்
கவர்ச்சிகரமாக, வடித்துக் கொள்கிறார்கள்…!!!)

தமிழ்நாட்டின் இரண்டாம் நிலை நகரங்களில் பெயர்
தெரியாத கிரிப்டோ கரன்சிகளை வணிகம் செய்து
கொண்டிருக்கிறார்கள்.

இப்போது சீனா கிரிப்டோ கரன்சிக்கு தடை விதித்துவிட்டது.
இதனால், முதல் மூன்று – நான்கு இடங்களில் உள்ள
கிரிப்டோகரன்சிகள் பாதிக்கப்படாது.

ஆனால், மிகச் சிறிய அளவிலான கிரிப்டோ கரன்சிகள்
காணாமல் போகக்கூடும். நம் ஊரில் இந்த சிறிய
கரன்சிகளில்தான் வர்த்தகம் செய்து கொண்டிருக்கிறார்கள்.
ஆகவே நம் மக்கள் பாதிக்கப்படும் வாய்ப்பு மிக அதிகம்.

வேறு சில நிறுவனங்கள், ஒரு பிட் காயினை வாங்கி,
அதனை பிரித்து விற்கிறார்கள். ஆனால், உண்மையில்
அவர்களிடம் பிட்காயின் இருக்கிறதா என்பது தெரியாது.

இது யாராலும் கட்டுப்படுத்தப்படாத, கண்காணிக்கப்படாத
பரிவர்த்தனை என அவர்களே சொல்கிறார்கள்.
ஏமாற்றப்பட்டால் ஒன்றும் செய்ய முடியாது. இதில் அந்த
நிறுவனத்துக்கு உள்ளே தான் வர்த்தகம் நடக்கும்.

இப்படி கிரிப்டோ கரன்சிகளை வளர விடுவது தேசத்திற்கு
ஆபத்து என மெல்லமெல்ல நாடுகள் உணர
ஆரம்பித்திருக்கின்றன. சீனா முதலில் விழித்துக்
கொண்டுவிட்டது. அதைத் தடைசெய்துவிட்டது.
மற்ற நாடுகள் இதனை உணரும்போது, அவர்களும்
தடைசெய்வார்கள்.

( இந்தியாவில் இது குறித்து ஆராய – ரிசர்வ் வங்கி
ஒரு குழுவை அமைத்துள்ளது…. அதன் முடிவு அறிக்கை
நல்லபடியாக, உருப்படியாக – விரைவில் வெளிவந்து –

இந்திய அரசு நம் நாட்டில் க்ரிப்டோ கரன்சிக்கு
விரைவில் தடை விதிக்க வேண்டும் என்று எல்லாம் வல்ல
அந்த இறைவனை வேண்டிக்கொள்வோமாக….!!!
( ஏனெனில், அரசியல்வாதிகள் யாரும் தாமாக இதைச்செய்ய முன்வரப்போவதில்லை….)

(சில தகவல்களுக்கு நன்றி – பிபிசி செய்திகள்….)

பின் குறிப்பு – இது குறித்து, என் கருத்துக்கு எதிரான கருத்துள்ள வாசக நண்பர்களும் இருக்கலாம்… அத்தகைய வாசக நண்பர்கள் தங்கள் கருத்துகளை பின்னூட்டம் மூலம் தெரிவிக்கலாம். “பிட் காய்ன்” அபிமானிகளின் தரப்பு வாதத்தையும் நான் தெரிந்துகொள்ள விரும்புகிறேன்.

…………………………………………………………………………………………………………………………………………………..