( செங்கல்பட்டில் உள்ள ஹெச்.எல்.எல்.தடுப்பூசி மருந்து தயாரிக்கும் நிலையம் )

செங்கல்பட்டில் உள்ள மத்திய அரசின் ஹெச்எல்எல் பயோடெக் தடுப்பூசி வளாகத்தை செயல்பாட்டுக்குக் கொண்டு வரக் கோரி வெரோனிகா என்பவர், உயர் நீதிமன்ற மதுரைக் கிளையில் மனு ஒன்றைத் தாக்கல் செய்தார். இந்த மனு கடந்த 17 ஆம் தேதி தலைமை நீதிபதி சஞ்சிப் பானர்ஜி முன்னிலையில் விசாரணைக்கு வந்தபோது, மத்திய அரசு தரப்பில் பதில் மனு ஒன்று தாக்கல் செய்யப்பட்டது. அதில், `செங்கல்பட்டு ஹெச்எல்எல் தடுப்பூசி வளாகத்தில் உற்பத்தியைத் தொடங்க டெண்டர் கோரப்பட்டுள்ளது.

இதன்படி – தடுப்பூசி வளாகத்தை அமைத்த மத்திய அரசு பொதுத்துறை நிறுவனமான எச்.எல்.எல் பயோடெக், செங்கல்பட்டு தடுப்பூசி வளாகத்தை தனியார் நிறுவனங்களோ, பிற அரசுத்துறை நிறுவனங்களோ –

15 ஆண்டுகளுக்கு பயன்படுத்திக் கொள்வதற்கான ஒப்பந்தப்புள்ளிகளை கோரியுள்ளது. இதற்கு விண்ணப்பிக்க மே 21 கடைசி நாளாகும்’ எனத் தெரிவித்திருக்கிறது.

மத்திய அரசு இந்த டெண்டரை விடுவதற்கு முன்னரே –
செங்கல்பட்டு தடுப்பூசி வளாகத்தை தமிழக அரசே ஏற்று நடத்த
உடனடியாக முன்வந்திருக்க வேண்டும்….. ஆனால், இப்போது கூட இதுவரை தமிழக அரசு இன்னும் முடிவேதும் எடுத்ததாகத் தெரியவில்லை; மத்திய அரசுடன் பேசுவோம் என்று தான் கூறிக்கொண்டிருக்கிறார்கள்..

தமிழ்நாடு அரசு தனியாரிடமிருந்து மூன்றரை கோடி தடுப்பூசிகளை கொள்முதல் செய்ய ஒப்பந்தப் புள்ளிகளை கோரியுள்ளது. இவற்றை ஜூலை மாதத்தில் தொடங்கி டிசம்பர் மாதத்துக்குள் விநியோகிக்க வேண்டும் என்று நிபந்தனை விதித்துள்ளது. இதற்காக குறைந்தது ரூ.1,500 கோடி செலவாகக் கூடும். தனியாரிடம் இருந்து தடுப்பூசிகளை கொள்முதல் செய்வதில் காட்டப்படும் ஆர்வம் தமிழ்நாட்டிலேயே தயாரிக்க இருக்கும் வாய்ப்பை பயன்படுத்திக் கொள்வதில் இருப்பதாகத் தெரியவில்லை;

தமிழக அரசின் குளோபல் டெண்டரை பார்த்து, தடுப்பூசி
சப்ளை செய்ய யாரும்/உலகின் எந்த நிறுவனமும் தாமாக முன்வந்து நிற்கப் போவதில்லை. உலகம் பூராவும் தடுப்பூசிகளுக்காக
அலைந்து கொண்டிருக்கையில், நமது டெண்டரை யாரும்
லட்சியம் செய்யப்போவதில்லை; தேவையென்றால் நாம் தான் தேடிப்போக வேண்டும். இப்போது தேடியலைந்தாலும் கிடைக்கப்போவதில்லை. சப்ளை, டிமாண்ட் பொசிஷன் அந்த நிலையில் இருக்கிறது.

தடுப்பூசியை க்ளோபல் டெண்டர் விட்டு வாங்கி விடலாமென்று யார் ஆலோசனை சொன்னார்களோ தெரியவில்லை; இது நடக்கக்கூடிய காரியமே இல்லை.

இதேபோல், முன்னதாக மும்பை மாநகராட்சி நிர்வாகம், ஒரு கோடி தடுப்பூசிக்கான டெண்டரை கோரியது. இதற்கான தேதி
முடிந்தும் யாரும் தடுப்பூசி சப்ளை செய்ய முன்வரவில்லை.
எனவே, தற்போது மகாராஷ்ட்ரா அரசு, விடுவிடுவென்று
அடுத்த நிலைக்கு சென்று, மத்திய அரசின் ஒப்புதலுடன் கோவாக்சின் தடுப்பூசியை அந்த மாநிலத்திலேயே உற்பத்தி செய்யும் பணிகளைத் தொடங்கிவிட்டனர்.

செங்கல்பட்டில் இருக்கும் ஹெச்.எல்.எல். தடுப்பூசி தயாரிப்பு மையம் தனியார் கையில் போனால், அவர்கள் யாருக்கு வேண்டுமானாலும் விற்கலாம்.

அவர்களின் தயாரிப்பை தமிழ் நாட்டிற்கு தான்
கொடுக்க வேண்டும் என்கிற கட்டாயம் அவர்களுக்கு இருக்காது.
தமிழக அரசே கூட்டுத் தயாரிப்பில் ஈடுபட்டாலொழிய, அந்த தடுப்பூசிகள் தமிழகத்திற்கு கிடைக்கும் என்கிற உத்திரவாதம் இல்லை;

தமிழக அரசு `பாரத் பயோடெக் நிறுவனத்துடன் கூட்டு ஒப்பந்தம் போட்டு தடுப்பூசிகளைத் தயாரிக்கலாம். கோவேக்ஸின் தடுப்பூசி மட்டுமல்லாமல், ஸ்புட்னிக், ஜான்சன் அண்ட் ஜான்சன், போன்ற, இந்தியாவில் தயாரிக்கக்கூடிய நிலையில் உள்ள இதர தடுப்பூசி நிறுவனங்களுடனும் தமிழக அரசு ஒப்பந்தம் போட்டுச் செயல்படுத்தலாம். நமக்குத் தேவை தடுப்பூசிகள்தானே…?

செங்கல்பட்டு தடுப்பூசி வளாகத்தில் தடுப்பூசியைத் தயாரிப்பதில். எந்தவிதச் சிக்கலும் இருப்பதாகத் தெரியவில்லை;. அங்கே ஏற்கெனவே பணிபுரியும் 200 ஊழியர்கள் தற்போது சானிடைசர் உள்பட மருந்துப் பொருள்களைத் தரம் பார்க்கும் சாதாரண வேலைகளில் தான் ஈடுபடுத்தப்படுகின்றனர். அவர்களையும் பயன்படுத்திக்கொண்டு, மேலும் தேவைப்படுவோரையும்
ஈடுபடுத்தலாம்.

அங்கு பணிபுரியும் ஆராய்ச்சியாளர்கள் –
“300 கோடி ரூபாய் பணமும், 3 மாத அவகாசமும் கிடைத்தால் போதும், தடுப்பூசி தயாரிக்கும் பணியைத் உடனடியாகத் துவக்கி விடலாம்” என்று சொல்கிறார்கள்.

எனவே, உலகநாடுகளிலிருந்து தடுப்பூசியை இறக்குமதி/கொள்முதல்
செய்து விடலாம் என்கிற, நிறைவேற வாய்ப்பே இல்லாத கனவை மறந்து விட்டு,

தமிழகத்திலேயே செங்கல்பட்டு ஹெ.எல்.எல் வளாகத்தில் தடுப்பூசிஉற்பத்தியைத் தொடங்குவதற்கான பணிகளை – மத்திய அரசுடன் கலந்துபேசி, தமிழக அரசு துரித கதியில் முன்னெடுக்க வேண்டும்.

இதில் ஒவ்வொரு நாளும் விலைமதிப்பு மிக்கது. அவசரமாகச் செயல்பட வேண்டியது மிக மிக அவசியம். அமைச்சர்களை விடுங்கள்… அரசு அதிகாரிகளுக்கு இது புரியாதா என்ன…? ஏன் இந்த மந்தகதி….?

.