….

….

….

4 வருடங்களுக்கு முன்னர் இதே விமரிசனம் தளத்தில்
கோவையை அடுத்த சிங்காநல்லூரில் முழுக்க முழுக்க
தன் சொந்தப்பணத்தைக் கொண்டு “சாந்தி சமூக நிறுவனம்”
என்கிற தொண்டு நிறுவனம் ஒன்றினை நிறுவி, செயல்பட்டு
வந்த திரு.சுப்ரமணியன் அவர்களைப் பற்றியும், அவர்
செய்துவரும் அற்புதமான மக்கள் தொண்டைப்பற்றியும்
விவரமாக எழுதி இருந்தேன்…( அந்த இடுகையை, இதைத்
தொடர்ந்து கீழேயே மீண்டும் பிரசுரித்திருக்கிறேன்…)

78 வயதாகும் அவர், கொஞ்ச காலமாக உடல்நலம் குன்றி
மருத்துவமனையில் அனுமதிக்கப்பட்டு சிகிச்சை பெற்று வந்த
நிலையில் கடந்த 11/12/2020 அன்று காலமானார் என்கிற
துயரமான செய்தி கிடைத்தது.

அவரால் பயன்பெற்ற பல்லாயிரக்கணக்கான மனிதர்களைத்தவிர,
அவரது அற்புதமான தொண்டுகளைப்பற்றி, பார்த்தும், கேட்டும்
அறிந்த மேலும் பல்லாயிரக்கணக்கான உள்ளங்கள் இந்த செய்தி
கேட்டு மிகவும் வருத்தமடைகின்றன.

திரு.சுப்ரமணியன், பணம் உள்ள பெரிய மனிதர்கள் எப்படி
நடந்து கொள்ள வேண்டும் என்பதற்கு மிகச்சிறந்த உதாரணமாக
திகழ்ந்தார்.

“ஊருணி நீர் நிறைந்தற்றே- உலகு அவாம்
பேரறிவாளன் திரு…”

என்பதைப்போல், நல்லவர் ஒருவரிடம் சேரும் செல்வம் எப்படி
பல்லுயிர்களுக்கும் போய்ச்சேருகிறது என்பதற்கு சுப்ரமணியன்
அவர்களின் வாழ்க்கையே ஒரு மிகச்சிறந்த உதாரணம்.

திரு.சுப்ரமணியன் அவர்களுக்கு இறைவனடியில், மிகச்சிறந்த இடம்
கிடைத்திருக்கும் … அவர் நினைவை நாம் என்றும் போற்றுவோம்.
எதிர்காலத்தில் மேலும் பல சுப்ரமணியன்’கள் உருவாக
அவர் காரணமாக இருப்பார் என்று நம்புகிறோம்.

.
——————————————————————————
விமரிசனம் தளத்தில் 4 வருடங்களுக்கு முன் வெளிவந்த இடுகை –
—————————————
k.d., p.c., k.c.- ஆகியோர் பிறந்த மண்ணில் தான் இப்படியும் ஒரு அதிசயம்….!!!
Posted on மார்ச் 3, 2016 by vimarisanam – kavirimainthan

.

சில நாட்களாக தொடர்ந்து எதிர்மறையான செய்திகளையே
படித்து நொந்து கொண்டிருந்ததற்கு மாற்றாக இன்று ஒரு
நல்ல தகவலை பரிமாறிக்கொள்ள நினைக்கிறேன்.
( நன்றி – நண்பர் திரு.அப்பண்ணசுவாமி…! )

k.d., p.c., k.c. ஆகியோர் பிறந்த இதே தமிழ் மண்ணில்
பிறந்த ஒரு அதிசய மனிதரைப்பற்றியும், அவரது
பணிகளைப் பற்றியும் இங்கு ஒரு சிறிய அறிமுகம் செய்ய
விரும்புகிறேன்.

கீழ்க்கண்ட புகைப்படங்கள் அவற்றின் தரத்தை
உங்களுக்கு உறுதி செய்யும் –

 

இதில் முக்கியமான விசேஷம் என்னவென்றால் –
இத்தனை உதவிகளைச் செய்யும் அவர், எந்த இடத்திலும்
தன் பெயரையோ, புகைப்படத்தையோ போடக்கூடாது
என்றும் – தன் தொண்டு நிறுவனம் வெளியார் யாரிடமும்
எந்தவித பண உதவியையும் (நன்கொடையை) ஏற்காது
என்றும் ( அனைத்து செலவையும் தாமே ஏற்பதாகவும் )
அறிவித்திருப்பது தான்.

இந்த வள்ளல் நீண்ட நெடுங்காலம் நல்ல உடல்நலத்துடனும்,
மனநிறைவோடும் வாழ வேண்டும் என்றும்,
இவரைப் பார்த்து, இவரைப்போல் இன்னும் பல தொண்டு
உள்ளங்கள் உருவாக வேண்டும் என்றும்
இறைவனை வேண்டுவோம்.

—————–