…

…

தகவல் பெறும் உரிமை சட்டத்தின்கீழ் சமூக
ஆர்வலர்கள் அஞ்சலி பரத்வாஜ் மற்றும்
அம்ருதா ஜோரி ஆகியோர் பெற்றுள்ள சில
தகவல்கள் –

———————–
ஜனவரி 2, 2018 -லிருந்து கடந்த வாரம் வரை,
அதாவது கடந்த 2 ஆண்டுகளில் மட்டும் –
ரூபாய் 5,936.7 கோடி ரூபாய் அளவிற்கு,
ஸ்டேட் பாங்க் ஆஃப் இந்தியாவின்
23 கிளைகளிலிருந்து தேர்தல் நன்கொடை
பத்திரங்கள் ( Electoral Bonds ) வாங்கப்பட்டிருக்கின்றன.

இந்த 6000 கோடி ரூபாய் அளவிற்கான
தேர்தல் நன்கொடை பத்திரங்களை வாங்கியது யார்…?
அது யாருக்கு கொடுக்கப்பட்டது என்கிற விவரங்களை
வெளியிட சம்பந்தப்பட்ட அலுவலகங்கள் “ரகசியம்”
என்று கூறி வெளியிட மறுத்து விட்டன.

மேற்படி பத்திரங்களில் 92 % ஒரு கோடி ரூபாய்
மதிப்பிற்கான பத்திரங்கள். எனவே – ஒவ்வொரு
சமயத்திலும் குறைந்த பட்சமாக ஒரு கோடி
ரூபாயாவது சம்பந்தப்படுகிறது. அதிக பட்சம் எத்தனை
வேண்டுமானாலும் இருக்கக்கூடும்.

—————

இது குறித்த முழு விவரங்களும் வெளிவராத
நிலையிலேயே – தற்போது மேலும் விற்பனையை
அனுமதித்து மத்திய அரசு உத்திரவிட்டிருக்கிறது…
( டெல்லி சட்டமன்ற தேர்தல்கள் நடக்க
இருக்கின்றனவே… !!! )

வங்கியில் பத்திரங்களாக வாங்கப்பட்டிருப்பதாலும்,
அந்த பத்திரங்கள் வங்கிக் கணக்குகளிலேயே
பணமாக வரவு வைக்கப்பட்டிருப்பதாலும் – இவை
கருப்புப்பணம் அல்ல… சட்டப்படியான வருமானம் தானே…
என்று, இந்த திட்டத்தை உருவாக்கிய ஆளும்கட்சியின்
தரப்பில் வினவப்படுகிறது…

கம்பெனிகளும், தொழிலதிபர்களும், கணக்கில் வராத
கருப்புப் பணத்தை அரசியல் கட்சிகளுக்கு நன்கொடையாக
கொடுத்து வந்தது இதன் மூலம் தடுக்கப்பட்டு விட்டதே
என்றும் கேட்கப்படுகிறது.

…

…

கருப்பை, கருப்பாக கொடுப்பது தடுக்கப்பட்டு விட்டது –
உண்மை தான்…

ஆனால், இதை வாங்கியது யார்..?
எந்த தொழிலதிபர்…? எந்த நிறுவனம்…?

கொடுக்கப்பட்டது எந்த அரசியல் கட்சிக்கு…?
என்கிற விவரங்களை வெளியிட மறுத்து,
சட்டபூர்வமாகவே “ரகசியம்” காப்பது … ஏன்…?

இது – லஞ்சத்தை அதிகாரபூர்வமாகவே
கொடுக்கும்/ வாங்கும் வழக்கத்தை உருவாக்கி,
உறுதிப்படுத்தி இருக்கிறது என்கிற குற்றச்சாட்டை
உறுதிப்படுத்துவதாக இருக்கிறதே..!!!

அரசாங்கத்தில் தங்களுக்கு வேண்டியதை சாதித்துக்
கொள்ள விரும்பும் தொழிலதிபர்கள், அதற்காக
ஆளும் கட்சிக்கு கொடுக்க வேண்டிய லஞ்சப்பணத்தை
சட்டபூர்வமாக, Electoral Bond -களின் மூலமாக
கொடுக்க, இந்த “ரகசியம்” காக்கப்படும் திட்டம்
உதவுகிறதே….

இந்த “ரகசியம்” காக்கும் விதியை கைவிட,
அரசும், ஆளும் கட்சியும் மறுப்பது ஏன்…?

எந்த கம்பெனி அல்லது நபர் – லஞ்சத்தை
நன்கொடை என்கிற பெயரில் Electoral Bond-ஆக
கொடுத்து காரியத்தை சாதித்துக் கொண்டார்கள்/
பயன் பெற்றார்கள் என்பது வெளியே தெரிந்து விடும்
என்பது தானே காரணம்….?

லஞ்சத்தை ஒழிக்க வேண்டுமானால் – அரசின்
செயல்பாடுகள் வெளிப்படைத்தன்மை உடையதாக
இருக்க வேண்டும் என்றால் – இந்த “ரகசிய” விதி
நீக்கப்பட்டு, Electoral Bond சம்பந்தப்பட்ட அத்தனை
விவரங்களும் வெளிப்படையாக அறிவிக்கப்படுவது
உறுதி செய்யப்பட வேண்டும்.

இந்த திட்டம் மக்களின் நம்பிக்கையை
பெற வேண்டுமானால் – இது அவசியம்…

செய்வார்களா…?