கலைஞர் பற்றி  திருமதி
ராஜாத்தி அம்மையாரின் திடுக்கிட வைக்கும் பேட்டி !!

இன்றைய தினம் கலைஞரின்  துணைவியார்  திருமதி
ராஜாத்தி அம்மையார்  அவர்கள் நீண்ட யோசனைக்குப்பின்
விகடன் இதழுக்கு அளித்துள்ள பேட்டியிலிருந்து சில
பகுதிகளும்  அதை ஒட்டி நமது எண்ணங்களும –

கேள்வி -உலகத்தமிழர் மாநாடு முடிந்ததும் ஓய்வு
பெறப்போவதாக முதல்வர் அறிவித்துள்ளார்.அடுத்த
முதல்வர் ஸ்டாலின் தான் என்ற எதிர்பார்ப்பு ஏற்பட்டுள்ளது.
ஆனால் வரும் தேர்தலிலும் கலைஞர் தான் முதல்வர்
என்று அழகிரி சொல்லி இருக்கிறாரே –
நீங்கள் என்ன சொல்கிறீர்கள் ?

பதில் -அடுத்த முறையும் கலைஞர் தான் முதல்வர்.
அதைத்தான் நானும் விரும்புகிறேன்.இப்போது தான்
அழகிரி சொல்கிறார்.நான் பல வருடங்களுக்கு முன்பே
சொல்லி விட்டேன்.

நம் எண்ணம் -இவ்வளவு  நாட்களாக முக்கியமான
முடிவுகளை எல்லாம்  கலைஞர் தான் எடுக்கிறார் என்று
பைத்தியக்காரத்தனமாக  நினைத்திருந்தோமே !
இப்போது தான் தெரிகிறது முடிவுகளை எல்லாம்
எடுப்பவர் யார் என்று !

கேள்வி -ஆனால் அரசியலில் இருந்தே ஓய்வு பெறப்
போவதாக கலைஞரே அறிவித்திருக்கிறாரே ?

பதில் – இது   பத்தி தலைவர் கிட்ட ஆயிரம் தடவைக்கு
மேல் பேசி இருக்கேன். இருக்கிற காலம் ( ! )
வரையில் நீங்க தொடர்ந்து அரசியலில் இருக்க வேண்டும்
என்று. ….அரசியலில் இருந்து ஓய்வு பெறாமல் அவர்
உழைக்க வேண்டும்  என்று மக்கள் விரும்புகிறார்கள்.
அதை நிச்சயம் தலைவர் ஈடேற்றுவார் !

நம் எண்ணம் – அப்படியா  மக்கள் நினைக்கிறார்கள் ?
மக்களில் ஒருவராக இருந்து கொண்டு இது கூடத்தெரியாமல்
இருக்கிறோமே !

இது நாள் வரையில்,கலஞரின் துணைவியாரும்,
கனிமொழியும், அழகிரியும் மட்டும் தான் அப்படி
நினைக்கிறார்கள் என்று
எல்லாம் தெரிந்தவர் போல்  நினைத்திருந்தோமே !

ஒரு வேளை ஸ்டாலின் கூட
அப்படித்தான் நினைக்கிறாரோ ?

கேள்வி -கலைஞர் தேர்தல் பிரசாரம் கிளம்பும்போதெல்லாம்
ச்.ஐ.டி. காலனியில் இருந்து ( திருமதி ராஜாத்தி
அம்மையாரின் இல்லத்திலிருந்து )  தொடங்குகிறாரே..
என்ன காரணம் ?

பதில் – எங்க கல்யாணம் நடந்த இரண்டு மாசத்திலேயே
அவர் பொதுத்துறை அமைச்சர் ஆனார்.(என் ராசி ?)
எல்லாமே இந்த வீட்டில் இருந்தபோது நடந்தது.(! ?)
(அதனால்) தேர்தல் பிரசாரத்துக்கு இங்கே இருந்து தான்
தொடங்குவார். அண்ணாவுக்குப் பிறகு தலைவர்
பொறுப்புக்கு வந்த பிறகு … அது இன்று வரையில்
தொடருது.

நம் எண்ணம் – நாம் நிச்சயம் வடிகட்டிய  மடையர் தான்.
கலைஞரின் உழைப்பினாலும், கொள்கைப் பிடிப்பினாலும்,
மக்கள் அவர் மேல் வைத்துள்ள நம்பிக்கையாலும்,
அன்பினாலும்  தான் அவர் இது வரை ஜெயித்துள்ளார்
என்று அல்லவா நினைத்திருந்தோம் !

பகுத்தறிவாவது – வெங்காயம் !
திருமதி ராசாத்தி அம்மாளின் ராசியான வீட்டிலிருந்து
துவக்குவதால் தான் எதிலும் கலைஞர் வெற்றி பெறுகிறார்
என்பது இப்போது தான்  விளங்குகிறது !

இந்தப் பேட்டியிலேயே கலைஞரின் மஞ்சள் துண்டு
மகிமையைப் பற்றியும் அம்மையார் விளக்கி இருந்தால்
இருக்கிற கொஞ்ச நஞ்ச சந்தேகமும் போயிருக்குமே !
விகடன் நிருபர் அவசரப்பட்டு பேட்டியை முடித்து
விட்டாரே !

திருமதி ராஜாத்தி அம்மையார்  இது போல் அடிக்கடி
பேட்டி கொடுத்து மக்களின் சந்தேகங்களைத் தீர்த்து
வைத்தால்  (நமக்கு ? ) நல்லது !